Nuthlawi hmeltha a thi maw? Zai thiam kha a bei a dawng maw? Hringnunah hian harsatna a va han tam em! Hringnun lazaite hi an chat then Nuthlawi hmeltha a thi maw? Zai thiam kha a bei a dawng maw? Hringnunah hian harsatna a va han tam em! Hringnun lazaite hi an chat then fo lo thei si lo ale.. %%%%%%%%% HRUI KHAT CHAUH Niccolo Paganini chu kum zabi 19-na chhoa violin tum thiam hmingthang a ni a. Tum khat chu mipui tam tak hmaah rimawi harsa zet mai a tum a, rimawi tumtu pawl (orchestra)-in an lo puibawm bawk a. Tui taka rimawi ngaihnawm lutuk a tum lai chuan vawilehkhatah a violin hrui khat chu a rawn chat ta hmawk mai a. Tawpsan mai theih a ni si lo! A chalah thlanfim a rawn bawl tiam tiam a, thawk la halh chungin a insiam rem a, hrui khat chat chung chuan mawi takin a tum zui zel tho a. Chutia harsa taka a tum mek lai chuan mak tak maiin hrui hnihna a rawn chat leh hmawk a! Hrui thumna pawh chu a rawn chat leh ta zel a! Paganini violin atang chuan hrui thum chat chu a uai thla hnuang tawh mai a. Mahse hrui khat la chat lo hmang chuan engtin tin emaw rimawi chu a tum zo thei ta tho a nih chu! An han tawp chuan mipui chu an ding suau a, Italian hoin an ngaihsan zawng an tihlan dan dik takin, “Bravo! Bravo!” tiin pindan khawk rum rumin an au ta a nih chu! Mipui au thawm a zawh chuan Paganini chuan mipui chu thu turin a’n zap a. Hrui khat chauh nei chung chuan rimawi tawpa a han tihnawn mawi danglam bik thin dan kha beisei tur a awm tawh lo tih hre chungin mipui chuan an nghak ta thuap mai a. Mipui zawng zawng hmuh theih turin a violin chu a lu chungah a’n lek chhuak a. A vaitupa ‘conductor’ lam hawiin a lu a’n bu zauh a. Mipui lam chu a rawn hawi leh a, nui chungin, “Paganini leh hrui khat aw!” tiin a’n au ta a. Stradivarius violin hrui khat chauh nei tawh chu a khabe hnuaiah a’n chep bet a. Hrui khat chauh hmang chuan rimawi tawpna tur chu a’n tum zo leh ta hram a nih chu! Mipui chuan au nachang pawh an hre tawh lo, mak leh ropui tiin an lu an thing an thing ringawt tawh mai a ni. Kan nunah hian hrui zai tam tak a awm. An vaia an him dam thap hian nun hi a nuam a, kan hlim a, hmuh pawh kan nuam thin. Mahse hringnunah hian harsatna tawh tur a tam hle mai si. Kan innghahna hrui pawimawh tak takte hi a chat ve fo lo thei lo. Lungngaihna te, hrilhhaina te, thlaphanna te, mangannate’n min bawm fo thin. Chutih hunah chuan kan tihdanglam theih hauh loh thil thleng tlat site chuan min tibuai a, kan hrui la neih chhun aiin a chat chhe tawh zawk buaipuia phili a awl thin. Hrui chat tawh, zawm theih tawh loh, tihngaihna awm tawh chuang lo lungngaihpui chang a va tam thin em! La neih chhun hmanga hringnun rimawi tum chhuah tum hram hram aiin tawpsan vek mai duh chang a awm thin. Khawvela awm ve reng pawh awmze nei tawh lo, dam ve reng pawh sawt tawh loa ngaia thih daih chaknate pawh neih a awl khawp. Hrui chat lo chhun hian rimawi engmah siam thei tawh lo ang maia ngaiin rimawi han tum chhin leh pawh kan peih tawh lo fo. Kan nuna hrui pawimawh tam tak an chah chuan nun hi a buai lo thei lo reng a. Hrui kim thap ai chuan hrui chat then phung chuan a hma a tluk pha tawh kher lo ngei ang. Mahse hrui zawng zawng a chat a nih si loh chuan engmaw tih theih chu a la awm ang a! Hrui chat lo a la awm chhung chuan rimawi engemaw hi a la chhuak thei ngei ang maw le! Paganini-a’n violin hrui kima rimawi nalh tak tak a tum thin ai khan hrui khat chauh hmanga rimawi a tum tum khan ngaisangtu au aw a ri ring zawk asin! A harsaa ang tih mipuiin an hre vek chunga a tih hramna kha alawm a ropuizia tilangtu chu! Kan nuna hrui pawimawh tam tak an chat ta a nih pawhin a la chat lo en chung hian, “Hrui khat nen chauh pawh hian aw,” tiin han insangmar sauh ila, rimawi nalh tak chhuah tumin hringnun hi han hmachhawn chhin teh ang u. Vawi khatnaah kan tum mawi nghal lo a nih pawhin han hmet kual ila, a ‘key’ dik hmeh chhuah hun a awm ang a, rimawi nalh tak kan tum leh thei ngei ang maw le! Hrui zawng zawng a la chat em hlei nem, hrui khat chauh pawh hian mi dang awi tlei khawp rimawi kan la tum thei ang a! Mahni lunglen hnemna khawp tal chu kan tum thiam ngei ang maw le! Beidawng mai loin a dam hi han hauh phawt mai ila maw le.. fo lo thei si lo ale..