Naupang sualna nei lote chu an laina hnai leh an hmelhriat tha ten an titap asin! &&&&&& I FATE AN HIM MEUH MAW? Nula khawngaihthlak, thih hial duh khawpa mangang lo kal zingah hian an naupan laia khawih chhiat tawk, tumah hrilh ngam lova rei tak zepa thih hial duh ka hmu ta zeuh zeuh mai! Hman hmanah khan tu emaw sawipui tur neiin tanpuina dik dawng ni hlawm se chu an khawvel hman mek chu a danglam ngei ang maw le! Mahse phengphehlepa khua a tlai zo tawh si! Rilru an va tina tak em! ‘Bawlhhlawh leh thianghlim lo’ nia inhriaa tap chunga lo kal thenkhat erawh chu ‘thianghlim leh sualna nei lo’ in hlim takin an nui chhuak fo bawk. Sawi fel theih hi a va tam em! Mahse an sawi chhuak har thin em a, a pawi zo ta a ni. Sawi chhuak hauh lo tura vau an nih avangin an sawi chhuak ngam lo fo a, thih an hlauh avangin an ngawi ta reng thin asin! A then erawh chuan an chhungkua a buai vak an hlauh avang leh chhungkaw kehchhiat an hlauh avangin an tuar tlawk tlawk a, chhungkaw hlim nan an lo in sacrifice ve thin a lo ni reng a! Anmahni khawihtute kha an chhungte hnaivai tak an ni hlawm maiu si a..! A rapthlak asin! Sawi chhuak ta se an awihsak lo ang tihte an hlau ve bawk. Tleirawl pakhat chuan a nu a hrilh a, a awihsak loh satliah a ni mai lo a, sawi tawh ngai hauh lo turin zuk vau a maw le! A then chuan an hmalam hun atan ngawih an chuh ve thung. Miin an hmuhsit phah ang tih hlauin an zep a, nuihzat hlawh an hlauh avangin an ka an chip a, pasal hmuh loh an hlauh avangin engmah an sawi ngam lo fo. Mahse an nun chhungril chu a hlim chuang si lo. Khawvel pumah hian kum tin naupang khawihchhiat (sexual abuse) hi 80,000 vel report a ni a. Hei aia tam hi hriatchhuah loh, report loh a ni ang an la ti lehnghal! Zirnain a hmuh chhuah dan chuan khawihchhiat tawk za zela 30-40 vel chu an mahni inchhungkhur mi leh sa ngeiin an khawih chhiat an ni a. Zaa 50 chu pawn lam mi, mahse an mi hriatchian, an inchhunga tlangnel taka lawi lut thei, an rin ngam leh an hmelhriat thate khawichhiat an ni a. Zaa sawm chauh chu hmelhhriat lohin an khawih an ni e an ti! Hmeichhe naupang zawng zawng zinga zaa 20 vel hian kum 8 an tlin hmain sexual abuse an tawk an ti zu nia! Hmeichhe pali zinga pakhat zel hian kum 18 an nih hmain chutianga khawih nawmnah chu an tawk an ti nia! Kan inchhung ngeiah hian, kan chhungte zinga mi leh kan mikhual te, kan ina leng luta kan thingpui intu, kan ina riaka kan chi liak mekte hian kan fate an khawih chingpen thei asin! Chhungkaw tin hi fimkhur a va tha em! Kan fate nungchang hi uluk takin zir fo tur a ni. Mipat hmeichhiatna kawnga khawihchhiat tawkte hian na leh hliam an neih loh a, an sawichhuah loh chuan hriat chhuah a har fu mai. Na an neih loh vang leh an sawi loh avangin engkim a fel vek tihna a ni der si lo! Nu leh pa, mahni buai buaia buai ta chuan fate kan chik hman meuh lo a. Lehkha an zir a, ina tha taka an awm chuan kan lungawi viau zel mai si. Kan fate thinlung na kan hmu thiam lo a, chhungrila an tap ri chu kan ngaihthla thiam lo a, ngawi renga an rum ri chu kan hrethiam si lo! Kan fateah dik lo awm nia kan hriata tu emaw kan panpui meuh chuan khua a lo tlai lam nasa hle tawh a, zan thimin min lo nang hman tawh thin a nih hi! Kan inchhungah hian kan fate hi an him meuh maw? I fate an him tih i chiang chiah maw??