Nuin vaimim chi a tuh a, vaimim a lo to a, vaimim keh thar ngei chhungkuaa han eiho chu hlimawm tak a ni! &&&&&& A LET LEH A AWM ZEL NIA! A hming chu Fleming-a a ni. Scotland rama lo neitu rethei berh ve tak a ni a. Ni khat chu ramhnuaiah ei zawnga a kal laiin a piah lawk chirhdup hmun atang chuan tanpui ngai au thawm a hre ta thut mai a. A hmanraw ken lai chu a dah thuai a, hmanhmawh takin au ri awmna lamah chuan a tlan nghal a. Naupang pakhat hi a kawng chen pilin chirhdupah chuan a lo tang a, tal chhuah tumin mangang takin a lo invai buai nasa mai a, tanpuitu auin a lo te teng tung mai a lo ni a. Tanpuitu nei lo se chu hrehawm tak leh muangchanga chirhdupah chuan pila thi ngei tur a ni. Fleming-a chuan a va chhanchhuak ta a. A tukah chuan Fleming-ate inkawtah chuan sakawrtawlailir nalh tak mai hi a rawn ding rup mai a. Pa inchei nalh tak mai, hausak leh zahawm hmel tak mai hi a lo chhuak a, “Nimina naupang i chhanchhuah kha ka fapa a ni a,” tiin a rawn inhmelhriattir nghal a. “Ka fapa i lo chhanchhuak a, rulh let ve ngei che ka duh a ni,” tiin lawmthu sawiin kut thing meuhin chibai a rawn buk a. Fleming-a chuan, “Ka thil tih kha rulh let atana ti ka ni lo,” a lo ti tlat a. Chutia an inbiak lai chuan Fleming-a fapa chu inchhungah a lo tlan lut that that a. Mi hausa pa chuan, “Kha khai fapa em ni?” a ti a. Fleming-a chuan chhuang ru tak chungin, “Ni e,” a ti a. Chu pazahawm chuan, “Tihdan tur ka hria e. I fapa hi ka hruai ang a, sikul tha takah lehkha ka lo zirtir ang e. A pa a chhun phei chuan mi chhuanawm tak a la ni ngei ang,” a ti ta a. Chutiang chuan an ti ta a. Hun a lo kal zel a, loneitupa Fleming-a fapa chuan London-a St. Mary’s Hospital Medical School atangin doctor a lo zir zo ta der mai a. Rim taka hna thawkin, khawvela mi ropui berte zinga chhiar tel kumkhua tawh tur, Sir Alexander Flemming-a, natna hrik that thei damdawi tha eltiang,Penicillin hmuchhuaktu hi a lo ni zui ta a. Kum engemaw zat a vei hnu chuan, kha mi hausa pa fapa kha Pneumonia natnain thih ngamin a lo na a. Eng damdawiin nge chhandam ta le? Sir Alexander Fleming-a hmuhchhuah damdawi tha lutuk Penicillinngei khan an enkawl a, a lo dam chhuak ta a nih chu. Chu mi hausapa hming chu Lord Randolph Churchill-a a nia, a fapa, Penicillin hmanga an chhanchhuah tak chu maw.. Winston Churchill-a, British PM ropui berte zinga mi kha a ni e. Thil tha kan tih hian a rah tha seng tur a lo awm zel thin alawm. Thil tha pakhat kan tih hian rah tha a chhuah a, a rah sengtu an tam telh telh a, a sengtu an tam poh leh thil tha titu a hlim telh telh a, malsawmnain a umzui ngei bawk thin. A let leh a awm zel nia! Vaimim tuhtu chuan vaimim a seng ngei ang. Mauruangi chuan taima taka a tuh rah sengin vaimim a phur haw thur thur a. A tuh ve peih lo Bingtaituki erawh chuan a vaimim chi tur chu rawhinthlam chhuatah mu huat huat chungin a ei zo ta mai mai a, a, seng tur a neih ve loh kha maw le! Miin a theh apiang, chumi ngei chu a seng bawk dawn si a. Mahni tisa lama thehtu chuan tisaa mi chhiatna a seng ang a; Thlarau lama thehtu erawh chuan Thlarauva mi chatuanna nunna a seng dawn a ni. Tichuan thil tha tih i ning suh ang u, kan inthlahdah loh zawngin a hun takah chuan kan seng dawn si a. (Galatia 6: 7-9)