Harsatna leh manganna karah pawh mi rilru hrisel chu an lo danglam tlat zel! &&&&&& PU HAWLA MUT A TUI TLAT! Mizorama ruihhlo ngaite enkawltu pawl inzawmkhawm hoin, ‘Ruihtheih thil laka invenna programme’ an kalpui tur khuhhawnna, October ni 18, 2016 chawhma dar 11-a Chanmari YMA Hall-a an neih turah thusawiah min sawm ve a. Ka’n pha viau dawn na a, Pu Lal Thanhawl, CM zahawm tak chu Khuallian a ni dawn a, Khualzahawm atan Pu Lalthanliana, Social Welfare Minister an sawm bawk tih ka hriat chuan ka phur ru deuh viau lawi a. Hall chhunga thutna awmsa bakah thutna rem belh zawng zawng khat tlata pungkhawm NGO hruaitute, sawrkar officer ropui tak tak leh Govt Mizo HSS Class XI zirlai duhawm tak takte hmaah chuan mi pathumin thu kan sawi a. Social Welfare Minister leh Chief Minister-te thusawi hmain sawi hawngtuah ka tang roh a. Chief Minister thusawi hun chu a lo thleng ta a. Eng thu tak sawi ang maw? tiin tunhma thil deuhte ka ngaihtuah let mai mai a. Kum 1995 vel khan CM zin hi Medical team-a telin ka zui ve fo thin a. Bengkhuaia lungphun a hawn tum phei chuan a zawna ni nga zet ka zui ve avangin a thusawi dan chu ka hre fu mai a. (Keini ang rual CM zui ve chu Isua khenbeh dawn lai vela, ‘hmeichhiate pawh hla taka thlirin an awm a’ tih ang deuh kha kan ni mai a!Kan hnaih lai ber chu chaw ei kham apianga an nupaa Digene mum hnih veve kan pek lai kha a ni mai!! ‘Pharoa no petu’ ang deuhahte khan ka inchan deuh roh thin! An hrisel nupa viau bawk si a, hna kan ngah lo khawp mai.) Thu chu a sawi ta a. Ring tak leh uar tak chuan a au lem lo na a, hemi nia a thusawi zet hi chu ka bengah a ri ring ngang mai. Thu tha tam tak a sawi karah chuan, “Pathian hi kachungah hian a tha khawp a. Hun harsa leh manganthlak tam tak hi ka paltlang ve tawh a. Mahse mut tui loh zan leh chaw ei tui loh tum hi ka la nei miah lo. Ka fapa mal neih chhun hi kum 32 mi niin kum 2002 khan a thi a. Chumi tum pawh chuan ka mut leh chaw ei a buai lo,” zuk ti pek a! Kan CM hi ka bel chiangin ka hrechiang ve lo na a, lo ralkhat thlir ringawt pawh hian thu harsa pui pui leh hun khirh pui pui hmachhawn tumte a ngah hmel si a, sawiselna leh demna mak pui puite a tawng nasa ve hian ka ring thin. Thlan sa bat bat khawpa ngaihtuahna sen ngaih nite a tam awm hian ka hre khawp a. Keini ang duang tana muthilhpui theih miah loh tur rilru hahna leh hun manganthlak tak takte a tawng tama ka rin tehlul nen, Pu Hawla hi zuk mu tui tlat reng sia maw le! A chaw ei zuk tui tlat reng pek a! Kan naupan laiin kan han intipem hlek a, a thi ser ser tawh chuan tah tumin kan men puai a, nu leh pate’n a na lai min han chhemdamsak paha, “Chaw ei titui tawk lek a nih kha!” an tih thinte khan kan dam mai thin tak khan maw le! Tunlaiah erawh ‘chaw ei titui tawk hliam’ hi a awm ta lo nge, thalaite hi kan no ta deuh zawk? Kan inchhuih palh a, ngaihzawng kan then a, kan tifuh tawk lo a, kan dai sual deuh a, lu kan sun a, nupa kan inthen a, harsatna kan tawk ve deuh a, rilru hliam kan han tuar ve deuh a, “Ka mu thei lo, chaw ka ei thei lo, dam reng pawh ka peih lo, thih daih ka duh,” kan ti ta zel mai thin chu a ni sia! Pu Hawlataksa lam hriselzia kha 1995 vel khan ka hre tawh a. A rilru hrisel bikzia ka hre thar leh ta a nih hi. Hun harsa leh manganthlak karah pawh Pu Hawla chu a mut a tui tlat! A chaw ei a tui tlat! Amah hi Psychiatrist atan ka awt ta roh riau mai!!(Zawngte hmaihup!!) Harsatna leh manganna hi engtin nge a hneh zel theih dan kha ka zawt zui hman ta lo va, ka zawt ngam mai bawk hek lo a. Nakinah, thingpui inahte min sawm ta a nih leh ka la zawt ngei ngei ang maw le!! Kan ram hotu lu ber hnen atang hian zirtur kan ngah hmel. Lungkham tur ngah hmel ber, ertu leh dotu ngah hmel ber, sawiselna leh hekna ngah hmel ber,mipui nuai tam enkawlna mawhphurhna rit tak mai koa latu Pu Hawla a mut a tui tlat! Rilru hrisel hi chu an heti tlat zel. Tirhkoh Paula’n, “Kei zawng, eng ang pawhin awm mah ila, lungawi zel ka ching tawh si a,” a ti thei nen hian a inhlat loh hmel riauin ka hria a nih chu! Paula pawh hi a muttui thin ka ring khawp mai! Paula tih theih chhan hi chu amah Tichaktu vang a ni. Tichaktu nei vekristian-tehi engkima kan lungawi tlat chuan kan nun hi a hahdam ve ngawt hlawm ang maw le!