Mi thiam rual, an finna leh thiamna chu a petu ta a nih hriaa a petuin a pek chhan, mi dang tana malsawmna atana hman tum reng hi an lo awm fur nia! &&&&&& DOCTOR-HO EM EM HI A! Indian Medical Association (Mizoram) chuan “Khaw hla taka Mizo awm, dam lo ve thin bawk si, daktawr pan hlei thei lo tan Special Clinic nei ila,” tiin feh chhuah thu an rel ve tawp mai a. Tuman an phut vang pawh a ni lem lo, sawrkar tirh pawh an ni lo, khawi khaw VC ngenna emaw pawh a ni lo, daktawr indaih lohzia tihlan an tumna pawh a ni lo, sawrkar demna tura an tih pawh a ni hek lo. Mi tan tangkai an duh a, ban phak lote tan ban phaka inchhawp hnaih a, mipui tan engemaw tih ve an duh a ni. Khawi lam nge niang tia uluk taka khua an chuan hnuin Farkawn khua an thlang ta a. Khaw lungtileng Farkawn-ah ngei Khuangchawi Thlahleinga zan hmang turin October ni 26 khan Aizawl an chhuahsan ta a. Daktawr pension tawh hoin, kum inthlau tak tak, thiamna inang lo tak tak, daktawr leh anmahni puitu tur mi thiam dang nen, mi 40 rual zet mai chuan inlungrual leh phur em emin khawchhak khaw kawng bumboh leh khu tak mai chu an zawh chho ta nguai nguai mai a. “Kal ta vek vek, mipui tana a hlawk thei ber turin aw,” tiin Dr. Baruaha’n a endoscopy khawl a thawhchhuahpui a, X-Ray film an lei chawp a, Durtlang Hospital Ultrasound khawl an keng a, damdawi thahnem tak an paipawn chho bawk a. IMA in hemi atan hian a member daktawr rualte thawhkhawm sa atangin Rs. 25,000/- a sanction a. Mi tana inpe duh awm na na chu sawrkar lam a ngawi thei bik lo a, kalna tur motor leh tul dang a lo ngaihtuah ve bawk a. Mahni motor keng an awm a, mahni sum sen belh inhuam vekin ‘damlo tanpui ngai puih tur an awm takin’ tiin hnathawh kawr inbelin an feh chhuak rawih mai kha a nia! Dr. N. Pallai leh Dr. D. Baruah hoin Mizorama kan daktawr thiam thiamte : Dr. Hmuchhuaka (naupang specialist), Dr. Sawmtea (DHS), Dr. Maseni (DHS), Dr. Huthangi leh Dr. Nuntluangi (Mit specialist), Dr. Zothantluanga (Medicine specialist), Dr. Rinchhana (Ruh specialist), Dr. Manguri (Gynae specialist), Dr. Hmingmawia (Surgery specialist), Dr. Don Halliday (Chest Medicine specialist), Dr. Doris, Dr. Lily leh Dr. Mickey (Hnimhlum thiam vek), Dr. Rinmawia (ENT Specialist), Dr. Zothantluangi (Dental surgeon), Dr. R. Lianhnuna (Radiologist), Dr. Chatea (Durtlang Hospital), Dr. Rama (SMO) Dr. Ringmaia (Forensic) te leh anmahni pui bawmtu mi thiam dang rualte chuan October 27 khan Farkawn khuaah damlo an en ta a. Khaw chhehvel, Vaphai, Thekte, Thekpui, Khankawn, Samthang atangin damlo an lo kal bawk a. Damlo an en zawng zawng chu mi 1114 (Gynae - 120, Paediatric - 85, Surgery - 97, Medicine - 250, Dental - 114, ENT- 80, Ortho - 80, Eye – 248, Audiology – 40) zet zuk nia! Heng zinga mi 70 hi endoscopy khawlin an chaw kawng, pumpui leh rilfang endik an ni a, mi 32 chu X-Ray a endik an ni a, hmeichhe 5 chu naupai thei lo tura zai (tubectomy) an ni a, mit naute paw (cataract) avanga mitdel mai tur mi 5 an zai nghal a. Ha 100 chuang an phawi a, tha na leh ruh na mi 40 zet an chiu bawk. Ultrasound khawl erawh an hmang thei lo tlat! Nikhat hna atan chuan a lungawithlak khawp mai! Hah taka nilenga an buai hnuin hahdamna damdawi tha chi, Khuangchawi thla bial, mi tin lunglen kaithotu, thla eng azawnga mawi ber ngei mai chu Farkhawpui-ah an lawm a. Chhun lamah hna an thawh hah tehlul nen, an zan lam nui ri thawm chu a va la ngaihnawm rawih rawih tho si ve le! Hnathawh hi hlimna a ni a, mi tana inpete nui ri hi a ngaihnawm bik reng asin! Haw kawngah motor bang beng dup dup chungin, “Ka thiamna finna zawngte, Lalpa i ta a ni, Hei hi ka thupui ber, Nangmah fak hi” tih hlate hi rawn sa thla dual dual lo mah se, thiamna leh finna petu fakna tha ber chu mahni lam inhlan ral chunga mi tana inpek hi a ni tih an thinlungah a chiang! Aia lalte thupek avang leh tu emaw nawr luih ni miah loa mahni thua pen chhuaka puih ngai pui tura rammute hi zahna chibai ka buk e. IMA Hony Secretary Dr. Zohminga’n Farkawn-a feh chhuakte lo kir leh a lo lawmna hian kan tlip teh ang. “Nangni ho (medical) hi chu e, indonaah pawh a hmatawng, hripui leh hrileng karah pawh a hmatawng bawk, thisen, zun leh ek karah pawh nui vur vur thei reng, hunbi pawh nei hleithei lo, midum lei lai ang maia a hmun ngeia thawk thin, engmah awm lohna hmunah pawh engti emaw tala tangkai tum, mahni pay scale pawh hre lo, VIP room chang ngai miah lo tur, bandh leh curfew-ah pawh bawnghnute sem ho nen pass nei sa in ni. Fak hlawh lo profession in thlang ta sa sa, thawk zel mai rawh u le,” tiin. “Doctor-ho em em hi a!” tia deusawh selna anka in dawn fo thin kha tun tum chu fakna tawngkam atan ka it tlat bawk nia! In titha em mai, em em ana!