Rilru na, nun beidawng leh mangangte’n thih daih an chak thu leh mahni intihhlum hial an duh thu hi min rawn hrilh thin a. Mahse hei hi chu a zia a dang thung. %%%%% “SAZU TUR KA PE MAI DAWN” Inrinni tlaia ka chaw ei kham inkhawm tur insiam pah chuan ka phone chu kan kheuh hawng zuai a. Thuthawn a lo awm leh tuar tawh a. Inkhawm ka tum avangin chhan hmanhmawh ngai a awm em tiin kan bih kual thuak thuak a. Pakhat chu a danglam khawp mai. Ka dawn thin tam zawk hi chuan harsatna an tawh avanga rilru na beidawng mahni intihhlum mai an duh thu an rawn sawi thin. He hmelhriat loh nu mangang thu rawn thawn hi chu ka chan loh khanah a lo chhuak a, min barakhaih deuh thut a ni ber. A phalna ka lak thlap hnuah kan inbiak tantirh dan chu ka’n tlangzarh dawn a nih hi. “Ka Pu, sazu tur hi engtiang chiaha hlauhawm nge ni ang le? Ka pasal hi tih ngaihna ka hre tawh lo.. a zu in turah ka telh ang a, a thi mai ang em? Zaninah?” A rawn thawn hun chu kan en a, tlai dar 6.05 a ni. Ka chhiar chuan dar 6.40 a ni tawh. Sazu tur chu a nei sa nge a lei chawp dawn? A tlai zu in turah chuan a lo telh hman tawh ang em? Inkhawm kal pah chuan thu tawi tein ka va chhang zuai a. Min rawn zawhna tak erawh chu ka chhang lo. “Engati ta nge? Enge tihngaihna i hriat tawh loh chu?” Inkhawm ban veleh ka phone chu ka en nghal a. “A rui hi a sual lutuk, ka fate chungah a tuan zel si a..” a rawn ti a. Ka thaw huai mai. Sazu tur chu a la telh lo a ni ngei ang. Sazu tur hlauhawm dan leh a thih theih dan chu sawi zui ka tum miah lo. Min zawhna kha chu chhan chi a ni lo. “I pasal chu remchangah rawn hruai la, zu nghei tir dante kan zawng ang a. A nih loh chuan Police-ah report mai rawh. I thil tih tum kha chu a tha lo,” ka va ti a. Sazu tur chu pawlhin lo thi ta se, tualthat a ni dawn a, police in an man ang a, a duat duh em em, hlim takin awm se tih a duh em em a fate pawh enkawl thei loin tan inah a tansan daih ang tih te, tuman lo hrechhuak loin zu ngawlvei pum naa thi angin mi zawng zawngin pawm vek mahse a damchhungin mahni inthiam lo leh rilru hah zawkin a nun a hmang reng tawh zawk ang a, vanram ah pawh kal tlak lo chatuan hremhmun chang tur a nih theih thute chu hrilh duah chiah ka ngai hrih lo. Min rawn chhang ta lo a. A tuk nileng pawhin engmah a rawn sawi ta si lo a. Zanah chuan ka va be hmasa ve ta thung a. “Sazu tur chu i pawlh ta em? A thi ta em?” tia va zawh pawp mai kha ka chak viau a. Mahse sazu tur hi a thinlungah rik nawntir ka duh lo. Ka hriat duh chu ka hre thei tho ang. “Engtin nge in awm tak zel? I rawn hruai thei ang em?” ka va ti ta zawk a. “A duh lo..keimah ka rawn leng ang, a rem veleh..ka lawm e, ka pu,” a rawn ti ta a. Ka thaw huai mai. A telh lo. A thi lo. Tual a la that lo e. Mi nula ina awm tha hle hle, nu leh pa thlazar hnuaia thlamuang taka awm kha, ‘hmangaih a, enkawl a, rawngbawlsak turin’ kan va thlem chhuak a. Anni lahin patling tihtakzeta rawn rimtu, hmangaihna hmatheha si-ar lak hial chotu chu thlipui leh doral karah thlamuanpui thamah min ngaiin, mipa chak tak awm nghenga thlamuang taka zan mu an chhin theih beiseiin min lo pawm ve a. Lungmuang taka an awm mekna bu zawl chhuahsanin thlamuanna famkim zawk beiseina nen min han zui ta kha a ni a. Ka rei maw! A tak ram chu a va mak si em! An sawi zu tha chi chu kan han in ta a, huat tur kan zawng a, phunna tur kan dap a, engkim kalsana min zuitu chu ngaihzawng neiah kan puh a, buangruain a tuar a, kan ngam sa reng hmeichhe awm nem chu kan tum thum ta dawt dawt mai a, kan rila rah kan fate muhil laite chu kan han phih tho ta awrh awrh zan tin ta mai thin a nia! Chhimthlipui hrang an sawi ang main patling zu tha in thiam lo chuan nu leh naupangte thinlung a nuai pherh zo ta a nih hi! Sazu tur min pek mai hi a chakawm rum rum reng ang chu! Chatuan hremhmuna kal tih velte chu ngaihtuah phak a ni lo, a hla lutuk! Tuna an inchhung hremhmun an tawrh mek hi a rapthlak em a, hremhmun hnaivai zawk hi pumpelh dan zawn hmasak a tul ta zawkte pawh a ni ta ve ang! Nupuiten sazu tura min hrai hlum hial an duh lohna turin pasal tha nih i tum hlawm tawh teh ang u!