DENDRITE HLAUHAWMNA Dendrite power min show ngam loh hnu chuan Dendrite hnim hlauhawmna leh a that lohna ka zawt zui a. Sawi tur mumal a hre der si lo. Thalai ruih tur duhho hian an ruih tur hlauhawmna hi hre ta se an ruih duh loh phah takin dendrite hnathawh dan hi in titi pui zui teh ang. ---------------- Miin rei tak chhung Dendrite a hnim chuan hmui bawr vel a tipan thei phawt. An rihna a tlahniam a, an cher telh telh a. Tihrawl a tichhia a, a sek theih loh a, chawnban a te a, an chak lo em em thin. Chu chu pawn lam an lan dana langsar zual a ni. Dendrite hian thluak a tisawngin a tiro thei a, chu chuan ngaihtuahna a tibuai a, hisap a tawi tut mai a, hriatrengna a tha lova, tawng an harsat tawlh tawlh a, an a deuh chhuih a, an tawp tulh tulh thin. Pum leh ril a khawih chhe nasa thei a, pum na, luak chhuak leh thia luakte a thlen thei. Thawkna kawng a tibuai a, thawk a harsa thin. Dendrite hian thisen a tichhe thei bawk. Thisen a tibal a, thisen tisentu a titlem a, mi a tidawldang dawl thei. Thisen cancer pawh a thlen thei niin an sawi. Kal (Kidney) a khawih chhe nasa thei bawk. Dendrite-in kal a tihchhiat tawh ngat chu a dam leh thei tawh lo. Kal a chhiat tawh chuan zun a insiam thei tawh lo a, taksa atanga thil tha lo a inpaihfai thei tawh lo. Taksaa tur inchhekkhawl tur paih fai nan thisen tihfaina dawt lianpui dula vuah run chunga tawngtai char char bak tih theih a vang tawh thin. Lung (Heart) a khawihchhe thei bawk. Lung tihrawl a tichhia a, harsatna hrang hrang a thlen zui thin. Lung chhia hi chu a lungchhiat thlak teh mai a nia! Ruih chapo inchhuanna a bo zo tawh a, khawsak a nuam thei thin lova, ngaihtuahna a sang tawh lova, duhthusam a hniam tawh thin. Mi dang aia an la sanna awmchhun chu an BP chauh a ni tawh mai. Thin (Liver) a tichhe thei bawk. Hei pawh hi kal a khawih dan ang tho, tha leh thei tawh lo bawk a ni. Thin berin hna a thawh theih tawh loh chuan nuihna tur hi a vang tawh a, ei theih loh a tam em em a, thin a chhe tuk mai a ni. Nau pai laiin Dendrite a hnim ve fo phei chuan pum na leh luak vak vak an nei thei a, BP te a tisang vak thei. A hun hmain nau an vei phah thin a, thla kim lovin nau an hring fo. Zu ngawl vei nuin fa a hrin thin, “Fetal Alcohol Syndrome” ang deuh - hmui hmai dik lo, hnar chiam bi bei, mit kar zau deuh, chal lawk bir ber naute an hring duh hle leh nghal. Mahni fa na na chu chhia tih thu awm hek suh, mi erawh chuan tha an tihpui lo fo. Dendrite ruih avang hian thihna a thleng chawk a. Thawkna dawt a tiping thut thei a, lungphute a tibuai vak thei a, chumi avang chuan a thih theih. Tin, an rui luhai luakchhuak, insaseng thei tawh si lote chu luak hakin an thi fo bawk. An nghet lova, che a muang tawh si a, inveng hlei thei lovin an tlu a, an insawhhlum thei bawk. Nikhaw hre lo khawpa ruih avang leh kaih avangin a thih theih bawk. Dendrite ruih tih vel hi chu a thing ve hrim hrim tih i hria ang u. Hnam changkang lo leh mi changkang lo apiangin an ching uar. A ngawl vei khawpa tizui rei duh pawh hi an tam vak lo. Engemaw chhung atana han tive zawk an ni tlangpui a, mahse heng ho reng reng hi chuan ruih tur dang dapin an pakai kual zel duh viau. Dendrite hnim fo chuan thil dang ngawl pawh an vei duh tihna a nih chu. Ruihhlo dang ang lo takin Dendrite hian nghei thut nghawng ‘suffer’ a nei ve lo. Hnim ngar ngar thin pawhin thlah ta thut se, taksa lamah harsatna an nei ve lo tihna a ni. Chuvang chuan “Ka nghei thei lo, min thing nasa tawh,’ tih a awm thei lo. Nghei nan hrim hrim hian damdawi emaw, na chhawkna emaw an mamawh hran lo. Dendrite avanga taksa leh rilru lama harsatna thleng thenkhatte chu damdawia enkawl a ngai ve fo. Chu ai bera enkawlna pawimawh zawk chu ruih theih thil an tih duhna chhan hriatchhuahsaka chinfel dan kawng dappui a ni. Chhungkaw inkaihhruaina mumal loh vang emaw, chhungkaw boruak nawm loh vang emaw, rilru lama harsatna dang an neih vang emaw, an thil thlir thin dan fel hlelh vang emaw, decision tha siam an thiam loh vang emawa ruihtheih thil ti an ni thei. A chhan dik tak hriatchhuaha chinfel a nih si loh chuan Dendrite pawh chu lo bansan ta tehreng se ruihtheih thil dangah an lut zui chawk. Mi tinin ruih theih thil kan do tlan a, chhungkaw tinin inkaihhruaina mumal leh inzirtirna tha kan neih a, ngawl veiin counseling tha tak a dawn hi a enkawlna tha ber chu a ni.