Zan khat zu hlimpui avanga chatuana tah tak zawkte hi a awm thei dawn a ni awm e.. %%%% ZU HI AN HLIMPUI REI EM? Zu in tantir reng rengin an hlimpui an beisei thin. Thian zaho picnic-ah te, chaw ei khawm tum leh huau huau ni-a in tum, “Sawi sawi mah sela, ka nghei dawn chuang lo” tia hlim tak zai rual thup thup chi kan tam viau a ni awm e! Kristian thalai zingah kristiante hunpui thlen dawna in duhte hi an tam e an tih chu! Hlim zual kan duh a, zu hian min tihlimin kan hria a ni. Sap ram hi kan entawn teh fo a. Social drinks alawm tiin engemaw nikhuaa thian ho han intihhlim nan leh hun han hman ho naah kan phawrh fo mai. Vawi khat chauh zu in ve chu a pawi thei em? Zan khat chiah zu in ve, a zu in chatthla leh si, mipain an lo khawihchhiat hman nula mangang takte pawh an sawi ka hria! Zu ngawl vei leh taksa chhiatpui tur khawpa in ni si lo, zu in avanga harsatna tawk dang pawh ka hmu nual. Vawi khat zu in mualpho pui te, vawi khat ruih sual avanga jail bang zutte pawh an awm ngei ang. Zan khat zu in hi a pawi thei a, vawi khat zu in hian chhiatna a thlen thei khawp mai tih hi hriat tur a ni. Hlimpui kan tum hi chhiatna thlentu a ni hma khawp. Zan khat zu hlimpui avanaga chatuana tah tak zawkte pawh hi a wawm thei dawn a ni awm e! Zu leh ruihtheih thil reng reng buaithlakna chu : a dawt leh a awm fo hi a ni. No khatin no hnih a hring a, vawi khatin vawi hnih a hring a, zu ngawl vei tum hauh lo khan a ngawl an vei ta fo mai. Zu in chhin miah lo chuan a ngawl a vei ngai dawn lo thung. Zu ngawl vei duh lo tan vawi khat mah in chin loh mai tur a nih chu. Zu leh ruihtheih thil dang reng reng buaithlakna dang leh chu : a intu leh a rui chauh hian tuar loin mi dangin an tuar tel fo hi a ni. Sum leh pai, chhungkua, khawtlang leh ramin kan tuar zel tlat. Miin zu ngawl a vei tawh si chuan hlimpui aiin chhiatpuina a ni ta vek zawk si! Ni tinin ngaihtuah bera neih a lo ngai a, engkim dang aia a lo pawimawh tak si avangin sum leh pai leh tha a hek ta hle thin. Thil nuam dang aiin dah pawimawh hmasak berah an nei lo thei lo a. A tira an ruihpui theih kha an ruihpui zawh tawh loh avangin an in tam zual zel a. In loh hlek leh in tlem deuha an buai zel tawh si avangin an in lo thei tawh lo a. Zing zu thlenga in a lo ngaih tawh chinah phei chuan ruih nawmna avanga in pawh an ni tawh lo, loh theih loh thil, tihmakmawh a lo ni ta hial a. An hlimpui ngai tawh lo. Zu chu an nuna an No.1 a nih miau tawh avangin nun peng dang a buai lo thei lo a. Mi dang nena inlaichinna a chhe telh telh a, ni tin hnain a tuar a, zu khawvel lo chu khawvel dang an nei ta mang lo a. Taksa leh rilru hriselnain a tuar bakah nupa nun a buai a, chhungkaw nun a chhe telh telh a, khawtlang leh kohhranah an tlangtla lo tial tial a. Anmahni an inthlahrun bakah lawm an hlawh tawh lo bawk a. Khawtlang tana hnawksak, thenawm khawveng tibuaitu leh tiraltitu an lo ni ta fo mai a. Nupa an inhau a, an inngur a, a tawpah an inthen phah ta hial thin. Naupang an mangang a, an tap a, an rilru a na a, chu chuan nghawng tha lo tam tak a nei zui ta a. Chhungkua a keh a, khawtlang a nghawng a, ram leh hnam hial a chhiat phah thei. Zu hian chhiatna a thlen nasa em em a, a sawp chu nasa tak a ni! Hlim nana zu in kha lungngaiin an kun ta thung a. Pawr taka au thin kha thlaphanga an rum ni a lo thleng ta! Intipa taka zu rim nama invaivung thin kha pum puarin a mu eng ta pup mai a, an thawm a zawi ta riau zel! Thihna khuma an han inhmuh chhuah meuh chuan a tlai lutuk tawh thin si! Khawvela beisei tur awm a tawh miah loh hnuah Pathian lamah beisei tur kan nei hlauh hi a vanneihthlak asin! Hemi beisei tur hi awm ta lo phei se chu tah khua a sei dawn em mai! Zu seh hlumte thih niah hian camping an lo luh ve tuma an inhlan thu te, an thih dawn tepa Lal Isua nen an intawh thute kan ngaithla leh ta hlauh thin zawk a. Chhungte pawhin thlamuang takin kan vui liam thei ta thin zawk a ni. Zu kha in lo se, min la dampui zawk se, chhungkaw kimin biakbukte panho zawk ila a thlamuanawm leh zual zawk tur a nia le! Zu chauha hlimna hmuh tumte hlimna hi a chuai hma khawp. Zu ruih hlimna ni lo, nun dan dika nun avanga hlimte hlim dan hi a tak zawk a, an hlim rei zawk bawk. Zu hian hlimna min pe ve a nih pawhin hlimna lem, chhum rei lote lo langa ral leh ta mai ang hi a ni e! Damdawi lam thlirna atang phei chuan zu hi Depressant, thluak hnathawh nem hniama nun tinguaitu a ni e, an tih pek chu! Hlimpui rei theih chi a lo ni hauh lo e.