Zu a tam si! In an tam si! Zu in hi a hlauhawm a, nghei dawn pawhin fimkhur a tha! &&&&&& ZU NGHEI NGHAWNG An phalna ka la bawk a, thawnthu lungchhiatthlak tak ka’n sawi teh ang. Zir chhuah tur kan neih tak hlauh dahin! Nu pakhatin min rawn pan ve a. “Ka pasalin zu a nghei a, a buai leh riau mai a..“ tiin tun hmaa lo enkawl tawhna lehkha hluite chu a rawn phawrh a. Zan thum vel chu an mu tawh lo a ni awm e. Kan inbiak mek laiin phone-a min be duh an awm thu min hrilhin pawn lam atangin phone min rawn pe a. “Tuna a pasal tana rawn kal mek kha.. hei, a pasal kha a inawkhlum tlat mai! Kan lo tlan mek a, ti khan in hnenah khan lo awm se, kan rawn hruai dawn e!” an rawn ti ta mai a. A pasal dam nana rawn fehchhuak mek chu, chu chanchin lungchhiatthlak tak chu ka hrilh ngam hauh lo. “Lo nghak lawk la, i pasal kha engtin emaw a awm a, i chhungte an lo tlan mek a, an thu rawn ken ngaichang phawt ang aw, damdawi kan ziah hmain,” ka ti a. “Aw le,” tiin a lo nghak ta kha a nia! A va hrilhhaithlak tehlul em! Thil duhawm lo engemaw a thlen hian dem tur zawn maite a awl khawp. Thihna a lo thlente hian inhnemna tawngkam tul lo hi a awm theiin ka hria. “Kal hma deuh ula chu..in inngaihsak har deuh a ni..in rawn tlai hret a ni..phaiah inhruai ve ula chu..chumi damdawiinah kher chuan in kal a nih chu maw le..chu daktawr kher in lo pan chu a va’n pawi em!” tih ang chi, mahni an inthiam loh zui theihna tur tawngkam leh tu emaw dem zawnga han tawng hramte hi kan hrat fu mai. He thihna duhawm lo tak maiah hian dem tur zawng dawn ta ila, kei leh hriselna kawnga mipui zirtirtu turte hi dem tur kan ni ang. Kan zirtir tam tawk lo a ni mai. Se bo hnua se kawng khar ang em a la ni lo turah ngaiin ka’n sawi nawn leh ang e (Hmanah Zalen Titi-ah hian zu nghei chungchang ka sawi tawh a). Zu nghei hi awmze nei taka kalpui a tha khawp mai. Zu in mite dinhmun azirin a nghawng a inang lo thei viau si a. Taksa chak leh chak loh dan te, an ei in that leh that loh dan te, taksa lam natna an neih tel leh tel loh te, depression an neih leh neih lohte hian zu nghei nghawng an tawrh nat dan a hril tel fo. Mi thenkhatin, “Kei chu chiri chi ka ni lo..ramhuai ka hmu ve ngai lo,” an tih hi pawimawh tho mahse, zu an in tirh lama thleng ngai lo hi zu in rei tawh chuan a thleng thei vek tawh tih hriat a tha. A tlangpui chuan zu nghei atanga darkar 6-8 hnuah kut khur a awm tan a, ramhuai hmuh leh aw hriat leh buai hi darkar 8-12 hnu velah a lang a, kaih (chiri) hi darkar 12 – 24 inkar velah an nei thin a, nikhaw hriatna buai leh mumal lo, a ruai (Delirium tremens) hi darkar 72 chhungin a lang fo. Hetiang thlap erawh hi a ni vek kher lo. Ni 7 hnu daiha chiri pawh ka hmu tawh. Thil dang awm hmasa mang loa ni 3 hnu vela buai thut a awm thei bawk. Zu nghei nghawng dang : Thlan tla, lungphu rang, hlauthawng, BP sang, mu thei lo, phu zuk zuk, phili ruai emaw mu chawrh chawrhte a awm thin. Zu in rei poh leh, zu in tam poh leh, hriselna a chhiat poh leh, zu nghei ngawng hi a na a ni mai. Zu nghei an buai viau hian fimkhur a tul hle. An thil hmuh leh hriat, dik si lo chu a tak emaw an ti fo a, chumi mila chet phut an ching thei. Mi dang tihnat leh mahni nunna lak thlengin a awm thei. Zu nghei tur hi damdawia enkawl a tha ber. Ven leh khuahkhirh an tul fo. Nunna chhan nana phuar beh hial pawh a tul thei. Zu nghei nghawng hi sawi lawk vek theih a nih loh avangin mi thiam rawn chunga nghei hi a him ber e. Zu in miah loh hi invenna tha ber a ni thung!