Ruihhlo ngaite enkawl buaithlakzia hi aw! Mahse puih an ngai si. Mi huaisen drugs nghei thei ka hmuh leh zauh thinte avang hian ka beidawng duh lo hram hram a. Mahse anni puih dan tur hi ka va hre tlem si em! %%%%%%%%% DR. HREKIMA’N A HRE KIM RENG EM? Facebook-a group pakhatah mi pakhat-in heti hian a post a: DR HREKIMA HIAN A HRE KIM RENG EM : Pu Hrekima, sum lakluhna tha tak i thiamna hmanga la lut theia i awm hi ka lawmpui che a, mahse kan thalai ruihhlo timi ten kan rama ruihhlo a black-a lei tur an hriat loh changa i hnena damdawi ruihtheih i chawh zel avangin i hnenah nu leh pate buma i damdawi chawh hmanga an rui thin leh thian dun pawhin ruihhlo beiseia i hnen an rawn pan thin hi, i hre lo a nih chuan i hnaah khan fimkhur la, hriat fo loh kan in beisei e.. Ka lo hmu ve mai lo a. A tawpna phei chuan keini ang mi dawihzepte chu min tikhur lek lek alawm maw le! Min hmangaihtute’n ‘Hei hi i hmu em?’ an rawn ti tliar tliar a. Dan hremi pakhat phei chuan ka thianpa hnenah, ‘Khing rawh se, civil defamation a file theih,’ a rawn ti a. Mahse chuti zawngin ka rilru a kal lem lo. Ruihhlo ngaite enkawl hi a buaithlak khawp a. Lehkhabu-a inziak lo ngaihtuah chawp ngai a tam lutuk! Pathian thu atanga teha dik nia ka hriat leh ka thinlung chhungril ber atanga ka ngaihtuaha an tana tha ber tur nia ka ngaih ang hian theihtawp ka chhuah ve thin a. A va lo tawk zo lo tak em! “Drugs ka nghei duh, min pui rawh,” tia lo kal te chu ‘ kan ramah a black-a lei tur an hriat loh changa lo kal’ an ni tih hi hriat a har kher mai! Hrekima hriatna hian a phak ngang lo! Miin, “Ka nghei duh e,” an tih si chuan thu tha nena fuihin damdawi kan chawh a. “Min enkawl atang khan ka la nghei ve zel asin,” tia lawm taka min chibaitu ka tawn leh nawlh thin karah hian kan damdawi chawh lo ruihpui ta daihte pawh chu an awm ve thei tlat a lo nih hi! ‘Hei hian a nghei duh tak tak a, hei hi chuan ruihpui a tum thung’ tihte hi hre hrang chat chat thei ila chu hmalak dan tha zawkte pawh a awm mai thei! Mahse mihring hriatna hian a hre kim thlawt si lo a le! Ruihhlo nghei duha damdawi ina awm duh hial zingah pawh damdawi in chhunga rui duh, chhuahtir leh ngaite an la awm tho! Damdawiina awm duh si lo, nghei duh inti si pawh enkawlna pek tho an ngai. In lama nghei theih dan tha ber hrilhin damdawi kan han chawh a. “Aw le, ka lawm lutuk,ka nghei ngei ngei ang,” hi an ti vek bawk si a. ‘Nu leh pa buma ka damdawi chawh rui tura lo kal’ nge an niha nghei duh tak taka lo kal tih lo thliar hran hi har ka va ti em! Mihring mihrinna hian a tlin ngang lo a ni!! ‘Thian dun ruihhlo beiseia lo kal’ ka la hmu lo a, kan damdawi chawh thin ruih nana hman tuma lo kalte chu an awm mahna le! Chumi hriatlawkte hlei hlei chu a har. “Ruih tur duha lo kal em ni i nih?” tia han puh fiam tak ngial pawh ngamawm loh khawpin ruihhlo an kham tawhzia an sawi vek hlawm bawk si! Pum na rawn inentir ta se, “I na lo ang,” a lo tih ngawt theih loh ang chiah hian, “Drugs nghei ka duh,” an tih chuan awih sak an ngai. Kei misual hian rinhleh deuh leh enkawl chak loh deuhte pawh ka nei ve fo alawm! Damna beiseia kan hnen lo thleng chu kan hmelma pawh nise pui tura thutiam la kan ni lawi si! Ka rinhlelh vang leh ka ngei zawng tak a nih vang ngawta enkawl duh lohte hi a thiang der si lo! Veng hrang hranga NGO hruaituten, “Hei drug addict kan man a, a rui nasa mai a, Dr. Hrekima min chawh a ti si a, kan rawn be tawp che,” tiin min rawn phone fo mai. Han zawh chian chuan dawt a lo ni fo. Hman ni phei chu a daw hnai deuh a, kan in bul atang maiin min rawn phone si a, ka chho nghal a. An mi man chu ka hmelhriat loh a ni. “I rawn inentir tawh em ni?” ka ti a. A daw ngam ta lo va, “Ka thianpa a rawn inentir a..” te a ti ta niah niah a. Hruaitute thinin a tuar ta lo va, “Dawtin engvangin nge kan veng pa tihhmingchhiat i tum,” tih pahin an hlap ta thuai thuai mai a! Awm reng nuam ka ti lo a, ka chhuk san ta thuai a. Drugs nghei dawna a ‘suffer’ hi hrehawm an ti khawp. A nghei duh chu an hrehawm chhawkna tha tak pek hi damlo an nih angin an phu. An nghei tir puihna damdawi zingah hian ei teuha ruih theihte pawh chu hman a ngai miau si. A hrehawm em avang nge an rui duh hrim hrim, ni 10 ei tura kan chawh ni khata lo ei zo ta maite hi an awm ta thin a!! Nghei duha lo kal inti vek si, atu nge ruih tur duha lo kal a, atu nge nghei duh tak taka lo kal zawk tih thliar hran hi har ka va ti thin tak em! Ka hriatna hi a tlem lua a ni e. Heti teh nuaih kan nih avang hian ‘drugs nghei duh chu chhungten kalpui ngei ngei tur’ te kan han ti a. A chang leh an ‘chhungte lem’ an rawn hruai thul! Tum khat pawh OPD ah mi pakhat a lo lut a, a rawn luhpui nu nau pua, ui dawih zawk ang maia khup dai mai chu kawkin, “Hei hi ka nupui a nia,” a ti zat zat a. OPD kawta lo thu chu ‘min luhpui lawk teh’ tia a rawn ‘nupui’ chawp a lo ni pek a!! A va buaithlak thin tak em aw! Chutiang vel karah chuan ‘thian dun pahnih ruihhlo beiseia lo kal’ te chu ka lo hre lo ang a, min lo bum fo te pawh a ni ta ve ang! Hre kim vek thei bik hek lo i! Facebook-a post-tu ‘streetdog’ hian chakai nufa inhau ang ngawt lo deuhin tih dan tur hi hmaichhanah min zirtir duh nghe nghe se la, tun ai hian drugs ngawlveite hi ka pui nasa leh zual thei mai thei asin!!! Ka fanuin, “Pa, Hrekima i ni ve ringawt a, i hre kim der si lo a,” min tihte kha ka hre chhuak uai uai mai a nih hi!