Nupui pasal kan han nei a, karah fanau an lo piang a, chhungkua kan han din ve nawk nawk a, nu leh pa nih ve mai hi chu a har lo. Mawhphurhna hlen nu leh pa nih erawh a kawng a dang daih a, a har viau mai bawk. Taksa, rilru leh thlarau lam thlenga kan fate than lenna kawnga mawhphurtu bulpui ber chu nu leh pate hi kan ni.

Thlarau nun kawnga kan fate chim chin a hniam viau a, sakhuana an ngaihsak loh a, Pathian awm pawh ring mang lo an nih phei chuan he lam kawnga nu leh pate chim chin hi a sang bik vak lo a ni mai thei. An sentet laiin baptisma kan chantir a, Pathian leh Kohhran hmaah thu kan tiam a, Pathian hriatna leh tihna kawnga kaihhruai tlat kan intiam a. Nu leh pa tam tak chuan chu lam hawi chuan kan kaihruai chhunzawm ta reng reng lo. Thangkura tawngkam takin kan tiam liam puat a, kan intiam ni kha a hnaih lai ber chu a ni deuh mai.

Tlangval senior tawh tak pakhat, nupui neih hun zet mai hi a chhungte’n nupui nei turin an tur a, chu tlangval chuan, “Pathian lam hi ka hawi tha peih mang si lo a, nupui ka neih chuan fa kan nei ve emaw a ni ang a, hremhmun kal tur kan tam phah mai mai,” a ti daih mai a, a chhungte pawh an dang der a sin. High School kan kal laia kan headmaster ve thung chu Kohhran upa a ni a, a fate tan ni tin a tawngtai thin. Titi phungleng kan sawi tuma a thusawi chu ka hre chhuak fo thin. “Ka fate hi an lo than len hunah humsual an dai palh a nih pawhin, ka tawngtaina avang hian engtik niah emaw chuan Pathian lam an hawi ngei ngei ang tih ka chiang a ni,” a ti hmiah mai.

Kan fate hian mi zinga awm dan an thiam loh a, an nungchanga chhiat viau a, zahpuiawm taka an khawsak fo chuan nu leh pate’n nungchang tha kan zirtir ngai lo a, entawntlakin kan nung lo a ni mai. An thinchhiat viau chuan an nu leh pate kan thinchhia tihna a ni mai. An thinrim changa an ânhla a chhiat viau a, hlawk tak taka ân dan an thiam viau chuan nu leh pate pawh kan ân a chhe hle thin tih a chiang leh mai. Tihtauh an hrat a, kawhmawh bawl an chin viau chuan an hmuh laiin nu leh pate kan innghirngho thin tih a chiang leh mai. Mi rel an hrat viau chuan an nu leh pate hian an hriat laiin mi kan rel fo thin tihna a ni mai a, mi chanchin chhe lam an sawi peih viau chuan he lam kawnga entawn tur nu leh pa an nei tihna a ni mai. Kan fate hian thenawm nu tha tak emaw, veng lehlama pa tha tak emaw kha an chhun ngawt dawn lo a, nu leh pate tho hi a ni an chhunber thin ni. Mizo thufing pawhin, ‘Sunhlu kungah thei dang a rah ngai lo’ a tih kha maw. Nu leh pa mawhphurhna hi a namai lo mang e.

Humsual dai laklawh tlangval pakhat chuan, ‘Ka tetlai khan ka nu leh pate khan Pathian thu min lo hrilh thin se la, nun kawng dikte min lo kawhhmuh se, zilhna thu thate dawng thin ila, hetiang hi chu ka ni bik lo tur,’ a ti vang vang mai. Fate nun kaihhruai kawnga mawhphurhna hlen chu sawi loh, mawhphurhna pawh hre lo nu leh pa kan tam poh leh nun kawng bo tur thangthar an tam ting a ni mai.

Mihring hi chu enkawl ngai, zilh ngai, fuih ngai leh kaihhruai ngai kan ni bik hliah hliah a, thil siam dangte nen kan dang hlak a ni. Thil siam dang, entir nan bawngte hi, an tet lai chuan a puiin hnute tuiin a chawm a. Tlemin an han hram deuh a, an tla hrang mai a, bawng ze dik tak kha an pu nghal tawp mai a ni. ‘He bawng hi chu a tet laiin a puiin a ngaihsak tawk lo a, thu tha a hrilh ngai lo a, mi huana luh ruk a chin phah ta alawm maw le,’ tih tur hi an awm chuang reng reng lo. Ran rilru a piang sual thei lo a, mihring rilru erawh enkawl danin a zir loh chuan nasa takin a piang sual thei a ni.

Mi sual leh kawhmawh bawl ching tam zawk hi chhungkaw inenkawlna mumal lo atanga rawn zi chhuak an ni tlat zel. Nutling patling, fa nei ve duah tawh, fate zilh ngai reng reng lo, thu tha hrilh ngai lo, entawntlaka nung chuang bawk si lo, chhungkaw boruak hrehawm bawk si hi a awm theih khawp ang. ‘A chawrchhuahna chhungkua ngaihtuah chuan a fel zawk ngawt alawm,’ tih tur hi an awm leh thin. Kan fate hi kan enkawl that loh chuan a tawpah a chhe lamin a rah kan la seng tho tho dawn. Fate awm khawloh vanga upat hnua rilru hah tam tak hi tuh rah seng an ni. Bible pawhin, “Naupang thlahthlam chuan a nu zahna a thlen thin,” a ti mai a, Thufingah pawh, “I fapa chu thunu nfel la, chawlhna a pe ang che,” (Thufingte 29:17) tih kan hmu bawk.

Mi thenkhat, fate enkawl kawnga fimkhur tak, entawntlak tak an awm bawk a. Chung mite chuan an fate an enkawl that lawmman chu leiah leh vanah an la hmu ngei ang. Mipa naupang pakhat chu a sikul kalnaah thian a chhar thar a, chu a thian chhar thar chu eng ang chhungkua atanga sei lian nge a nih a, a fapa tan kawm chhunzawm zel chi a ni em tih hre turin a pa chuan an awmna vengah a kalchilh a, a bel chiang ngat a ni. Hetiang nu leh pa, fate enkawl kawnga duhtui tak hi Zoram hian a mamawh viau reng a ni. Nang, eng ang nu leh pa nge i nih ve le?