Kar kalta khan North East Red Ribbon Quiz Competition, Kohima-a neihah zirlai pahnih te nen Mizoram aiawhin kan kal a, MSACS atangin official pakhatin min ho bawk a. Lengpui airport atanga Guwahati pana kan thawh chhuah dawn lai chuan kan hmaa mi pathum thut theihna seat-ah chuan thu tur an awm lo a, airhostess chuan, “Ka pu, tukverh bulah hian i thu duk zawk em?” tiin kan hmaa thutna awl chu min kawhhmuh a, lawm takin ka in sawn a, kan zirlai pakhat pawh chu ka bulah chuan a rawn in sawn ve a. Ka thutna bul chiah chu emergency exit a ni a, airhostess chuan rikrum thila tum (landing) a ngaih thulha emergency exit hawn dan chu min hrilh zat zat a.

Airhostess kal bo hnu chuan kan zirlai hnenah chuan, “Tukverh bulah hian thu zawk ta che” tiin duhsak takin ka thutna chu ka kian a. Chumi hnu chuan airhostess chu a lo kal leh a, thutna kan inthleng tih a hmuh chuan, “Ka pu, instruction kan pek laia in thutnaah khan in thu leh thei ang em? A nih loh chuan ani hi emergency exit hawn dan a bul atangin ka hrilh leh a ngai dawn a” a ti a. “E, a nih tak chu, kan lo hre lo a ni” tiin thutna chu kan inthleng leh ta a ni.

Zel din thu han bawl ta ila, kha airhostess kha vawi tam tak kha thawhnaah thlawkin a zin kual tawh ngei ang a, mi za tam tak hnenah emergency exit hawn dan pawh a hrilh tawh ngei bawk ang. Amaherawhchu, tun thlengin emergency exit hawn ngai khawpin rikrum thil vanga tum lohna tur hmuna an tumna thawm hriat tur a la awm lo. Chutiang thil chu tawk nise chanchin tharah kan hre ngei ang. Chuvangin, zirlai pakhat nena thutna kan inthleng kha amah bakin an hre lo a, ‘Vawi tam tak thlawhnaah ka zin kual tawh a, emergency exit hawn ngai khawpin harsatna kan la tawk ngai lo. Tun tumah pawh hian eng em kan tawk lo ang. Duh leh thutna chu lo inthleng mai mai teh se’ ti thei a ni. Mahse, chutiang chuan a ti lo a, dan ang takin hna a thawk a ni.

Keini mizo te hi kan ngaihsam ang reng a, ‘Ni mai mai teh se, eng em kan ti lo ang’ tih a pui hi kan ngah khawp mai. Dan ang diak diaka thil tih hi kan peih vak lo. Amaherawhchu, mipui lalna, democracy ramah chuan dan reng reng hi kan himna tur leh kan hmasawnna tlanna tura duan a ni a, a nihna ang taka dan kan zawm hi kan tih tur a ni a, khua leh tui tha nihna pawh a ni. Ram changkang apiangah dan an zawm tha a, dan hmaah mitin an intluk a, dan a lar ber thin. America ramah pawh President fanu pawh ni raw sek sek, dan a bawhchhiat chuan dan ang takin an hrem hmak hmak mai a ni. Ram changkang loah chuan dan palzutna a nasa a, dan hrula thil tih a tam a, dan bawhchhetu pawhin sawipuitu leh hmelhriat a neih that chuan hrem lohin an chhuak leh mai thin. 

Chuvangin ngaihsam taka ‘Ni mai mai teh se, eng em kan tawh lo ang’ tia dan kan palzut fo thinna hi kan sim a tha khawp mai. ‘A tha a lawm’ tia kan pal bawrh bawrh, tha hauh lo hi a tam khawp mai. Hman deuh khan MLA election-ah sawrkar hnathawk officer pakhat chu Presiding Officer-ah an ruat a, thingtlang khaw hla takah a duty a. Vote thlakna khawl (EVM) kha tlai dar 5 ah khar (close) a, pack fel thlap hnuah hawn pui chauh tur a ni. Mahse chu presiding officer chuan ‘Vote thlak tur an awm tawh chuang lo’ tih changchawiin EVM chu tlai dar 5 rik hma daihin a hawn pui ta liah liah mai a, kawng lakah tlai dar 5 a rik chiahin close button chu a hmet a, a pack fel a, tlai dar 5 a EVM khar ang chu a ni ta tho a. Amaherawhchu, an hawn hnu, tlai dar 5 rik hma si khan vote thlak tum mi pakhat lek pawh lo kal leh si se a va pawi dawn em. A mawhphurhna a sang khawp ang. Kei ni ila khatiang risk sang tak kha ka la ngam kher lo ang. Kan rilru hian dan hrula thil tih dan hi a dap chhuak zung zung a, dan hrulah kawng awlsam kan dap chhuak zung zung thin. ‘Ni mai mai teh se, eng em kan ti lo ang’ tihna rilru hi kan nei lian fo thin. 

He zawmthawtna leh inthlahdahna rilru hian harsatna lian zawkah min hruai lut fo thin bawk. Kan fate an dam loh pawhin mi tam tak chuan, ‘Eng em a ti lo ang, a tha ve leh mai ang’ kan ti a, kan ngaihthah lui a, an nat viau tawh hnuah doctor kan rawn chauh thin. Mahni ngei kan damloh  pawha doctor rawn duh tlat lo, nutling patling pui si doctor rawn tura chhung te tur ngai, tur chhuah hleih theih loh hi kan awm fur mai. “Hmanah pawh hetiang chiah hian ka na tawh, ka tha ve leh mai’ tih tanin kan tang a, a tawpkhawkah doctor kan rawn a, a pawi tur ang a pawi hman tawh thin.

Miin min hriatpui emaw hriatpui lo emaw, mi min hmuh lai leh hmuh loh lai pawhin dan hi zawm tha ila, dan hrulah kawng awlsam rek fo lo hian dan ang tak hian hna thawk ila, kan ram hi ram nuamah kan siam ngei ang. ‘Eng kan tih phah lo ang, tu’n min hre chuang lo ang’ tia dan kan palzut fo chuan dan tha pawhin awmzia a nei lo thei lo ang a, hma kan sawn tak tak thei hek lo ang.