Dr Hrekima Titi

Engnge i hmuh ve?

Dr. C. Lalhrekima - Apr 26, 2014

Engnge i hmuh ve?

Nu pakhat hi a pasal indona awm zawm turin Mojave thlalerah a kal ve a. A pasal chu a ngai a, a mamawh a, a pan a, a bulah engemaw chen a va khawsa a ni. Mahse chu hmun chu a ning ta thuai a. A lum thei em em mai a, tuar hleih theih pawh ni lo tur hial khawpin thingbuk hlim hnuaiah pawh 125 degree fareinheit a ni vui vui mai reng a. Thlaler vaivut thli a thaw vuk vuk a, hawi lam apiang chu vaivut hlir vaivuit hlir hi a ni mai si. A tawpah phei chuan a nu leh pate lehkha thawnin, chulai hmun chu arang aranga chhuahsan a, an hnen lama hawn a tum thu a thawn ta nge nge a. A chhanna chu rang takin a lo thleng a, a pa kutziak ngei chuan, thu tawite - “Mi pahnih hian tan in pindana thir kar atangin pawn lam an thlir dun a, pakhat chuan chirhdup hlir a hmu a, pakhat chuan arsi a hmu thung” tih chiah hi a lo inziak a. Chu thu chu a chhiar a, thinlung leh tihtakzetin a inngaihtuah vang vang a. Haw lova chu lai hmuna awm chu a thlang zui leh ta zawk a. Chulai rama mi chengte chu a kawmngeih a, a ram chu hmangaih leh ngainat tumin a zir a, chumi ram leh a mi chengte chanchin lehkhabu a ziak ta hial a. An awmna thlaler chu a ngai reng a la ni a, a danglam lo. Mahse a rilru puthmang leh thil thlir dan chu a lo danglam ta a. A pa thu rawn thawn tawite chuan a tan khawvel thar a rawn hawnsak ta a ni. Khawvel hi thlaler ang mai a ni. Nihphung sa, danglam thei lo, ze nghet a nei tlat. Kan rilru erawh hi chu a danglam thei. Thil thlir dan thlakthleng thiam tura finnaa thuam kan ni. Mahni dinhmun mek nin hluah hluah chang a awm thin. Kan chhehvela thil thleng thinah hian kan tihdanglam theih loh a tam si. Kan thu lohna khawvelah hian nun ram a chauh chang a tam a. Hlim a har fo. Kan thil tawn azirin kan rilru a hah viau thei. A then phei chuan nun kan ning a, thih daihte kan chak thin. Hlimna hi kan chhehvela thil thlengah aiin thil thleng leh nihna kan dawnsawn danah hian a innghat thui zawk. Kan thil thlir dan azirin kan rilru hi a hlimin a hlim lo a, kan lawmin kan lawm lo mai thin a nih hi. Mi thenkhat tan chuan khawvel hi thlaler khawlum hrehawm leh vaivut hmun ninawm leh huatthlala pawh a ni mai thei a. Mi thenkhat tan erawh arsiin a cheimawi, hlimna hmun a ni thei bawk. A pasal mamawh leh thlahlela pantu nu khan a pasal awmna thlaler khawlum leh vaivut chu a ngaithei lo. A nun a chau a ni. An pa leh thlaler lah chu lakhran theih a ni bawk si lo. A rilru siam danglama thlaler chu cham chilh a, a kawmngeih a, thianah a siam hnu khan a nun a lo hlim ta zawk a nih kha. Tanin tukverh thir kar atanga ‘lungaihna chirhdup’ ringawt hmutu an awm laiin ‘beiseina arsi eng’ hmutu an awm a nih kha. I awmna pindan atang khan khawvel hi eng angin nge i hmuh ve le? Tuna i dinhmun mek leh thil tawn mek kha han ngaihtuah la, lungngaihna chirhdup chunga beiseina arsi eng kha i hmu ve thiam em le?
Share now