Hman deuh khan nu pakhat hian a pasal a lo hau hlak hlak a, “Chawhma lamah i mu vum thur a, chawhnuah i rawn tho chhuak chhur chhur a, tlaiah i rui leh a, i awm awl leh lutuk hi i zo lo a ni. Hetiang hi chhungkaw pa ber awmdan tur a ni lo. Pathianin mihringte awm dan tura a tih hi a buk thelhin i thelh a ni” a ti a, an pa chu a ngawi reng a.

    He nu anhla hi ka ngaihtuah ta a, kan dam chhung reiloteah hian engtia nun tur nge? Pathianin kan nun dan tura a phut chu enge ni ta ang le? Kan duh dan ang anga kan nun a, nuam kan tih dan ang anga kan khawsak hian a tawk a ni mai lawm ni? Hei baka damchhung hun tawi te hman nawm dan a awm chuang dawn em ni? Amaherawhchu, mihring te hi thil siam zawng zawnga ropui ber kan ni a, chatuan pawha thi ve lo tur thlarau kawltute kan ni. Chuvangin a nuam a piang um a, duh duh dana tal a, ramsa u awrha khawsa mai mai tur kan ni lo. Kan taksa, rilru leh thlarau thanlenna hi kan ngaihtuah fo tur a ni.

    Nuam hi kan thlahlel em em a, kan tisa chakna hian min thunun a, tisa chaknaa hruai boin kan awm fo thin. Zuk leh hmuam leh ruihtheih thil te hi kan taksa tan a tha lo tih kan hria. Hre mah ila kan tisa chakna chu kan thunun zo lo a, kan chakna avang leh nuam kan tihna avang chauhin a bawihah kan intulut thin. A sawp erawh na tak a ni. Taksa, rilru leh thlarauin hliam pui a tawrh phah thin.

    Tin, mihring te hian awm awl hi kan thlahlel fo thin a. Amaherawhchu, tih tur neih loh leh awm awl lutuk hi kan that pui lo khawp mai. Kar hmasa khan covid-19 ka kai ve a, kar khat chhung inhnuaiah ka inkhung hrang a, kar khat chhung zet engmah ti loa inkhung ngawt ngawt mai chu a nuam miah lo. Ka ei a, ka mu leh a, a ninawm duh viau mai. Khatiang khan engmah ti loin kum khat inkhung ila, a hrehawm ngawt ang. Engmah ti loa awm mai mai hi thil nuam a ni lo, Pathian min siam chhan pawh a ni chiah lo. Mi hman lutuk leh awm awl lutuk chu an inthlahdah a, an dawngdah chawk thin. Mi dawngdah chuan ama tan leh mi dang te tana thil pawi a khawih nge nge thin. Chuvangin mihring kan nih chhunga pawimawh tak pakhat chu taima taka hna tangkai thawh hi a ni. Intodelh tur pawhin taimakna hi a pawimawh hmasa ber bawk. Thawk mang loa sum lak luh kan tum a, a thawna sum sem leh therhlo sem kan thlakhlelh em em chuan intodelh kan la hlat hle tihna a ni. 

    Kan pi leh pute kha an taima a, an thawkrim a, an intodelh a, an nun kha a zahawm bawk. Mi thatchhia leh zawmthaw te chu an ngainep em em a, chutiang mi chuan nupui pasal pawh an hnawng hial thin. Keini pawh intodelh tur chuan kan eizawnna kawng hrang hrangah tun aia kan thawhrim a, taimak kan chhuak a tul a ni. Tun thlenga a hnam anga kan intodelh thei lo fo hi enge a chhan ni ang? Kan eizawnna kawng hrang hrangah hian taimak kan chhuah tawk loh vang a ni mai ang em? Mi taima chu an intodelh nge nge a, a hnam ang pawhin an ding chhuak nge nge thin. Ram buai hma khan Samthang khuaah khian pa pakhat, taima rum rut mai hi a awm a, a hming chu Hrangzama a ni. Ruah a sur buan buan pawhin hlo thawh a thulh chuang lo a, a fate hnenah pawh, “Tuihawkin ke a phah dat dat hma chu chawlh loh tur” a ti mai thin. Chutiang taka a taimak avang chuan kum tin buh ei sen loh a thar thin a, kak zawn, hreiha zawn, silai zawn tih te hi a kum tin buh thar dan a ni thin. Ani ang hian taima theuh ila, mizo te hi khawvela hnam intodelh ber kan ni hial awm a sin.

    Sawrkar hnathawk te hi thla tin hlawh bi mumal tak la thin an ni a, an taimak pawhin an hlawh a pung chuang lo a, an thatchhiat pawhin an hlawh a kiam chuang lo. Hei tak hi sawrkar hnathawk thenkhat chuan inthlahdahna remchangah an hmang bawk thin. Thingtlangah chuan zirtirtute hi sawrkar hnathawk awm chhun an ni deuh mai a. Zirtirtu taima, mahni hnaa thahnem ngai tak an awm laiin zirtirtu thenkhat erawh run dala thawk mai mai, inthlahdah bawk si, zirtirna hna pawh thawk tha peih chuang lo, hawn hma ching bawk si, zirtirna hna aia ram vak leh sapel nuam ti zawk hi an awm ve nawk thin. Naupang pawhin zirtirtu taima leh taima lo deuh chu kan hre khawp mai. Tun hnua ka ngaihtuah hian zirtirtu taima leh mahni hnaa inpe tak te khan malsawmna pawh an dawng nge nge a, an fate pawh zirna leh eizawnna kawng hrang hrangah an hlawhtling nge ngein ka hre thin. 

    Chuvangin, mahni eizawnna hna theuh rinawm tak leh taima taka kan thawh hian mi dangte tan malsawmna kan ni a, chu chu mahni tan pawh a tha em em a ni. Zawmthaw tak leh inthlahdah taka kan nun a, kan eizawnna ki pui ber pawh kan thawh that peih loh chuan tu tan mah malsawmna thentu kan ni thei ngai lo ang a, siamtu min siam chhan chu a buk thelhin kan thelh tihna a ni bawk ang.