Zawhna: Ka pu, khawngaihin thil ka lo zawt lawk mai che. Kum 37 ka ni a, kar hmasa vel atang khan ka sazu hi a fawk tha thei lo va, keimah lamah chuan ka insawiselna chu ka ke hi a sa thin a, tunlai hian a nasa zual a, eng emaw châng chuan ka sazu pawh hi a sa tel thin. Ka blood sugar ka test-tir a, random-in 116 a nia, ka triglyceride hi chu a lo sang deuh va, 370 lai a ni thung.

Chhanna: Hetiang lam zawhna hi ka dawn tam pawl tak a ni awm e. Sazu fuk (a thenin fawk an ti bawk a, a dik ve ve ang chu maw; kei chuan fuk hi ka sawi dan a ni mah) tha thei lo hi a medical term chuan Erectile Dysfunction (ED) an ti a, kan ziak fo tawh a, i zawhna bikah hian pawimawh lai a awm a, chuti lai tak chu chhiartute tan sawifiah ka’n tum ang e. I kum zat i sawi a, hriat belh atana pawimawh a awm nual mai. Chung zingah chuan BP sang te, i thau over hret em tih te, zuk leh hmuam lam i khawih nasa em, zu i in ngai em/in nasa em tih te, damdawi ei lai i nei em tih te han hriat belh thei ila, ka chhang chipchiar thei zawk ngei chuan ka ring.

Mipa sazu hi tube (tui pipe ang deuh) thuang hnih a awm a ni a, a chhungah hian a inphan tluan a, chumi chu châkna a lo chhuah khan thisen a rawn in-pump lut ta vak a; tichuan, a tube chu a rawn puar a, sazu kha a lo fuk ta thin a ni. Chutiang chu a nih vangin sazu fukna tura pawimawh chu thisen zâm tha te (blood flow), hriatna thazam (nerve conduction) function tha te a ni. Blood flow (sazu a thisen lut tur) leh nerve conduction-te hi natna hrang hrang avangin a buai thei a, chung zinga a common zualte chu zunthlum, thisen sang, thau lutuk (obesity), thin tha lo/hnathawh buai (liver dysfunction) te, tuna i rawn sawi Triglyceride (TG) sang lutuk (Dyslipidemia an tih zinga mi a ni) te hi an ni.

I blood sugar hi chu a la normal a, mahse TG hi a sang mah mah chu a ni (normal level hi 150 hnuai lam tur a ni). TG san chhan hi hriat a pawimawh viau mai. Ke sa i rawn sawi tel avang hian Thyroid function buai hian ke sa an nei duh khawp mai a, tin, TG san chhan pakhat zinga mi a ni bawk. Thau lutuk te, zu in nasat vanga liver buaiah te TG hi a sang duh viau bawk. Nunphung dik lo vanga natna (Lifestyle disease) an tih zinga kan ngaih a ni. Chuvangin, TG sang hi control a pawimawh dawn a, damdawi a enkawl theih a nih rualin ei leh in control leh taksa sawizawite a tel loh chuan a normal mawh khawp mai. Thyroid function test te pawh lo ti thei la a tha hle.

ED hi a chhan hrang hrang kan han sawi a; mahse, a common ber chu chhan hriat loh a ni thung. Chuvang chuan damdawi leh eng emaw tak hmanga enkawl ai mahin counseling sessions hmangtein an enkawl hlawhtling fo a ni. Mipa tan chuan thil nuam lo tak mai a ni a; mahse, a reh thei a ni tih hriat a tha a. Vawi khat a awm zeuh hian huphurhna a siam nghal fo thin a, kan sawi angin thluak lam control a nih vangin chutiang huphurhna chuan a hnu zelah a rawn awm chhunzawmtir duh fo. Damdawi thenkhatte a pui theitu a awm a, amaherawhchu heng damdawi te hi chu i kum a la tam loh avangin la ei hrih lo la chu a tha viau.

Kan sawi tawh thin angin sex hman hi mipa leh hmeichhia inkar a ni a (kan tunlai khawvel hian mahni anpui kawpte chawi lar tum mah se kei erawh chuan kan thangthar zel tan tha ka tih loh avangin sex chu mipa leh hmeichhe inkar ka ti kher zel ang), inhriatthiam tawnna a pawimawh em em a ni. Indawhtawn thiam te, nupa inhmangaihna ti thar fo turte a tan lak a pawimawh em em a, ED pawh hi hmeichhia zawkin an hriatthiam ve a pawimawh khawp mai. Sawi dunte hreh lo ila, inpawh taka inhriatthiamna hi a enkawl kawnga pawimawh ber pakhat a ni. Nangma dinhmunah hi chuan engpawh nise Medicine Specialist lo inentir phawt thei la, i TG sang hi control hmasak a tha hle a, a phenah harsatna dang i lo nei palh a nih phei chuan chu chu enkawl ngei nise, chuti lo chu i harsatna hi a reh mai lo palh thei a ni.