Tunhnai kum 2010 chho (keima lo chhinchhiah dan atangin) atang khan nu naupai inentir, a bikin khawpui lam ami te hian an naupai hi mipa nge hmeichhia a nih hriat lawk an châk ta fo mai a. An hriat châk chhan han zawh hian a tam zawk chuan lo inrin lawk nan, thawmhnaw lo inbuatsaih dan hriat nan te a ni deuh ber a. |henkhat chu mipa emaw, hmeichhe emaw neih châk vang hrim hrim te an ni bawk. India ram hmun dangah hian naute an pai laia mipa/hmeichhia a nih hriat (pre-natal sex determination) duhna chhan hi hmeichhe dinhmun chhiat avangin leh naute an pai laia hmeichhia a nih chuan a pian hmaa tihtlâk an duh thin vang a ni ber a. Hei hian mipa leh hmeichhe awm zat male:female sex ratio a tihbuai avangin Supreme Court chuan dân khauh tak mai a zam a, chu chu Pre-Conception and Pre-Natal Diagnostic Techniques (PNDT) Act an ti a, phal loh a ni a, he dan bawhchhiate chu a hremna pawh a na hle.
He PNDT Act hi kan ramah chuan India ram dang ang lo takin hmeichhe duh lohna leh hmeichhe dinhmun chhia angte a awm ve lem lo va. Tin, mipain nupui an neih dawna Dowry an dil vak vak thinte a awm ve lem loh avangin a tulna em em pawh a awm lem lo thei awm e. Mahse, Supreme Court dan siam a nih miau avangin kan zawm ve vek a ngai a, nu naupai ultrasound-a en pawhin he dan avang hian protocol zawm tur tam tak a awm phah a ni. Engpawh nise, a tha zawngin ngai ta ila, India ram dang khaikhin chuan kan ramah hian hmeichhe dinhmun hi a la ziaawm hle a ni tihte pawh a tilang thei awm e.
Nau pai theih (Fertility) hi Pathian malsawmna ropui em em mai a ni. Hmeichhia, thil danga insawiselna nei miah lo; mahse, chi insiam thei der lo te, mipa pawh chutiangin insawiselna nei chuang lo pawh an chi a chak loh emaw vanga chi thlah thei lote hi an awm fo mai bawk a. Mipa chi leh hmeichhe chi an intawn tirh atanga nau insiam chho, hmeichhe chi kawnga an intawh tan leh insiam tan atanga chhul bangah chu naute insiam tir (embryo) rawn bet te leh, nuin thla kua chhung tehmeuh mai a pai chhung hian thil kal sual thei hi an tam laileng khawp a, naute tha taka an pai hnua fuke kima an lo piang theite phei hi chu thil mak (miracle) a ni nghal ringawt mai a ni. Pathian hnathawh thilmak zawng ruai lo hian he naute lo piang atang hian thilmak chu kan hmu thei reng tihna a ni. Chutiang avang chuan nu naupaiin a nau pai lai sex (mipa emaw hmeichhia) hriat an châk hian chutiang hriat châk lovin fuke kim leh harsatna nei lova an lo pian theih nan tawngtai zawk turin thurawn ka lo pe fo thin reng a ni.
Indian Medical Association (IMA)-in thingtlang lama medical outreach/special clinic kan buatsaihnaah hian ka tel ve ta fo va. Nu dawrawm tak tak, ei leh in pawh tha lem lo tura rin han en changte hian Pathian hian a tawk tê-in a lo rel tih a hriat a, fa tha deuh deuhin an pai a, neih pangngaiin awlsam tak takin an nei a, chutiang chuan fa 4-8 dawn lai lai neite pawh kan hmu fo mai. Chutih rualin fa neih chungchanga kan thu lohzia tichiangtu chu khawpui lamah mi awmthei zawkte, fa nei thei lo ka tawng fo bawk. Nu pakhat phei chu a fa pai pathum a chhiat a, a palina a pai leh mek a, kum 40 a pel tawh a, ultrasound-a ka lo en tumin a chhiat leh tan tawh tih ka hmuh thu ka hrilh chu a tap zawih zawih mai a ni. He nu hian mipa e hmeichhia e a sawi lo, tha taka naupai tluan a, fuke kima nau hrisel tha neih zawng kha a tawngtaina a ni ngei ang. Kan malsawmna dawn hi kan lo chhiar thiam lo fo zawk a ni tih hi ka han ziah chhan tak chu a ni e. Kan la chhunzawm leh dawn nia.