Tleirawlte hi an khawvel hmachhawn dan tur hrilh tam an va ngai em! Fanu nei zawng zawngte pualin aw.. &&&&&& FANU HNENA THUCHAH Ka fanu, i lo tleirawlve dawn ta maw! A lawmawm rualin ka thlate hi i tiphang deuh roh ka ti! I tleirawl khawvel rawn hmanna tur atan hian ka buatsaih tha tawk lo ang che tih ka hlau a ni. A chang chuan ‘kan naute’ kha ni reng mai la ka duh dawn rum rummai! I naupan lai duhawmna leh rilru thianghlim mawl takte kha ka ngai thin a, ka ui bawk! Kha rilru thianghlim kha tleirawl rilru tharin a pawlh dal thei ve dawn ta chu a ni si a! Tleirawl rilru hi a thianghlim lo e ka ti a ni lo. Tithianghlim lo theitu tawn tur i ngah dawn ta em mai hi ka thla tiphang deuhtu chu a ni. Thanglian hauh lo ta la chu i sawngnawi a ni mai dawn bawk si! Fanu sawngnawi chu ka duh si lo! I taksa lo thanlen zel ruala i rilru hian hma a sawn ve si loh chuan nula sawngnawi tak chu i ni tho si ang. I sawngnawi lohna turin chaw tak tlem ka fah duh che. Tleirawl khawvel pawlh buaitu lianpui chu ngaihzawng leh hmangaihna ilo vel hi a ni. I tan thil thar a ni dawn. I la hriat ngai loh kawngthar, ‘Love is blind’ tih awmzia hrethiam mang loa zawhtuten an dai sual fo tawh, fimkhur tak leh fing taka zawh ngai zinkawng hlimawm leh mak taka ni tih hria ang che. Hmangaihna awmzia hrechiang lote chu he kawngah hian an petek fo tawh a, nun hlimna tura Pathian remruat chu thihna kawngpuiah an lo chantir tawh thin. He kawngpui i zawh lai hian fimkhur hle ang che. Tleirawl nih ve tak avanga ngaihzawng hi neih thuai tur a ni lo. Ngaihzawngte hi neih ve tur chu a la ni ngei e. Mahse a hmanhmawhthlak loh. Tunlai tleirawl tam tak hian ngaihzawng an buaipui hma lutuk deuhin ka hria. Ka fanu, an zingah chuan tel ve suh. Ngaihzawng khawvel lo hi buaipui tur a tam lutuk tih hria ang che. Ngaihzawng leh a chhehvel hi thihpui tum ngai suh ang che. Hmangaihna hi dampui tur a ni ngai. I hmeichhe thianghlimna hi i rohlu a ni tih hria la. Hloh mai mai suh ang che. Mipa hi kan sual roh khop tih ka hrilhru ang che. Ngaihzawng i neih hunah pawh mipa hi an ninhlei fu zel tih hria la. A taksa innek zawng leh pumhlan hmangaihna phut khertu chu hlat ang che. Hmangaihna finfiahna ang zawnga dawi tum che an awm chuan, “Setan, ka hnungah kal rawh! Ka tan tlukna i ni!” ti hmiah rawh. Sex hi hmangaihna tehfung a ni lo! Hmangaihtu che chuan tihnat leh tihchhiat che a hlau tur a ni. Hmangaihtu chuan a humhimturche a ni. Hmangaihna tehna emaw tia inkar tlu, an sawi ‘hmangaihna’ a daih leh tak si avanga lungchhe vankaia tap, mahni nunna hial pawh hlut zo lo ka hmu tawh thin. Ka fanu, i tahpui leh tur si thilah chuan inhamhnawk suh ang che. Ka chah lawm lawm chung chea i in hamhnawk lui a nih chuan, a dawt leha thil thleng zawng zawng hmachhawn ngam khawpin huaisen thung angche. I hre thiam em? A aia chiangin aw, kan ti ta sa sa bawk a. Pakhatna: Pasal i neih hmaa sex i lo hmang a nih chuan, chu nen chuan innei ngei ang che u. Inneih a rem loa in inthen leh a nih pawhin tap hlek suh ang che. Hmangaihna hi tahpui suh ka ti lo. Hmangaihna hi tahpui tham thil hlu a ni. Sex hi tahpui suh ka ti che a ni zawk e. Pahnihna: A hun loa i rai a nih pawhin pai tlang ngei angche. Nula pakhatin thil min hrilh chu maw, “Sawn pakhat na na na chu ka pawm tlei thei awm em mai!” a tia sin! Sawn pai tura a lo khawsa kha ka ngaisang lo, mahse a chunga thil thleng a hmachhawn dan erawh hi chu ka ngainep thei lo. Rai i duh loh chuan rai lo turin i khawsa mai tur a ni. Tap tuau chunga nau tihtlaksaktu tur daktawr zawng leh ruai si hi ka ngei tlat! Daktawrte hi chutiang mai maia inhambuai chi an ni lo aw! Thu dangah pakai tawh ang.He khawvel thar hmachhawn tur hian i nu leh pate hian kan zirtir kim seng thiam lo che. In kum ang rual kan nih ve laia kan khawvel leh in khawvel hmachhawn tur hi a inthlau si a. Mawl min tih rilruk viau chang pawh a awm ngei ang. Nepin mawl hle mah ila, keini lo hi Pathianin mi dang a pe dawn lo che. Keini aia tha hi i tan an awm lo. Lungawi mai rawh. Kan thu awih la, Pathian thu i awih a ni mai. Pathian thuawih a chet nawi theih loh tih hria ang che. Engkima lungawi hi zir zel hrim hrim ang che. Eng thilah mah phunnawi duh suh. Kan nuna thil thleng, kan thlak danglam theih loh hi chu pawm mai tur. “Ka duh loh ang zawnga thil a thlen hian ka thin a rim vak zel a, ruihtheihthil ka tih phah thin,” titu tleirawl thenkhat ka hria. Fiamthu ti takin, “Pathian em ni i nih? Pathian kan nih loh chuan kan duh zawng ang vek hian engkim kan thlentir thei hleinem! I thu lo em mai!” ka ti thin. Dik an ti a, an nui ve mai thin. Mizo i ni tih leh Kristian i ni tih hi theihnghilh ngai suh ang che. Mizo nihna hian thil tam tak a keng nghal a, Kristian nihna hian thil tam tak a paipawn nghal asin! I la hre chhawm zel mai ang. E! Theihnghilh loh a tawk leh lo, Mizo i nih leh Kristian i nih hi nunpui ngei ang che. Khawvela mi fing ber thuchah hi ka chah veleh chhawng ang che: I that lai hi chen la, i tleirawl lai hian hlim takin awmrawh. A rei dawn si lo. Hriatreng tur pakhat erawh a awm : Pathian tih la, a thupekte vawng rawh. Chu chu mihring zawng zawngte tih tur chu a ni mai. Sawi tur a la tam! Kan dam dun zel chuan ka la hrilh chhunzawm zel dawn che nia.