Naupang kum nga mi lek chu khawharin a nu leh pa bulah a tlan tawn sek mai..

Nutling kum 32 zeta upa, pasal tha tak leh fa duhawm tak pathum nei tawh a ni. Mahse, a hlim lo a, a thla a phang a. Mangannain a rawn bawh a, a lungphu a rang a, a thlan a tla bawrh bawrh fo. Hmanlai a hre chhuak a, a awmah a hnawh a, zan a mu thei lo a. a tah a chhuak a, a khua a har a, a thinchhe em em a. “Kum 32 ka nih hnu pawh hian kum 5 ka nih laia ka nu leh pa inthen khan min la shock,” zuk ti a.

Kum 5 a nih laia a nu leh pa inthen chhan chu a hre hauh lo. Mahse an inthen hnu a a awm dan kha a theihnghilh thei lo. Chutia a nu leh pa inthen chu khaw hranah an awm ta daih si a. Chu naupang lungleng khawhar chu khawngaihthlak tak a ni. A pa bulah zanah a riak a. A tuk a lo nih chuan a nu a ngai a. Zingah bus-ah an hlang a, a nute khaw lam panin muthlu lawp lawpin a chuang a. Zanah a nu bulah a riak a. Zing a lo ni a, a pa a ngai leh a, bus-ah an hlang leh a, a pa bula mu turin bus kawngkhar bulah tla lo chauhin a muthlu leh lawp lawp a. Tuman an uksak lo. Fahrah a ni si a. Chuti ni tin chuan a nun a hmang kum tluan kum tin a ni tawp mai. Chumi hnua a fahrah nun, dawta puh, sawi ngamna nei lo, tahna tur nei lo, tanpuitu nei lo nun chu sawi sen a ni lo ve!

Mizo zingah nupa inthen an tam an ti. Inti sawi ril thei deuh chuan vai ho aiin inthen kan tam daih zawk an ti thin. Khaikhinna tur statistics ka nei ve lo. Mahse inthen chu kan tam thawkhatin ka ring, ka hmu hnem tlat! Dam dun chhung atan, a nuamah pawh a hrehawmah pawh, hmangaih a, enkawl a, rawng inbawlsak tura intiamte intiamna hi boruakah a tham ral ta thin em ni le?

Mi pahnih kan inen ngawt chuan ‘ka peih tawh lo e’ intihsan mai pawh a awl viau a ni mai thei. A tu zawk zawk emaw kha neih hahthlak zette pawh an lo ni mahna! Inthen chhan tha tak an nei thin chu a ni phawt ang. Nupa rek chauh la nih laia inthen hian ngawng nei thui ve viau mah se kara fanau awm diah tawhte inthen ai chuan a nghawng a nep deuh ngei ang. Nupa inthennain naupang rilru, taksa leh thlarau a nghawng thui theih dan hi a rapthlak fo. Chhungkaw kehchhia avanga naupang nun buai an tam a, naupang pakhat lek nun buai pawhin khawtlang leh ram a tibuai thui thei viau si!

Nupaah kan insiam tawh a nih rau rau chuan, inneih reng hi tum tur a ni. Chumi tur chuan lehlam lehlam tan dun a ngai. Pathian hmaa thutiam kan nih avangin inneihna thutiam hi hlen tum tur a ni a, kohhran leh khawtlang hmaa intiam kan nih avangin anmahni zah avang pawhin inneih reng tum tur a ni a, kara fanau awm tawhte tawrhna rapthlak a thlen loh nan dam dun chhung hi inneih hram hram tur a ni. Tawrh a ngaih pawhin kan tuar ve deuh ang chu maw le! “A hrehawmah pawh..” kan tih zarh zarh kha maw!!

Kum 5 a nih laia a mangchhia chuan kum 32 a nih thlengin a la tibuai fo a, a tawn ang kha naupang dangin tawng ve lo se a duh. “Mi rilru nghet i nih a, Kristian Chhungkua din thei tur i nih chauhin chhungkua din rawh,” tih hi a tlangaupui chak ber ka zawhna min chhanna a nih chu!

Dam dun chhung atana i neih peih leh tur si loh chu nei lo mai la! In inneih rei peih leh dawn si loh chuan fa nei lo mai ula! In innei a, fanau in nei ta rau rau, naupangte avang tal pawh hian inthen lo hram teh u! Naupang hmuhah pawh hlim dun tum teh u. Naupang thanglian mek hian nupa hlim, chhungkaw hlim an ngeih ber a nia! Calcium leh B Complex ai daihin!!