Inzahtawnna hian thuawihna a hring chhuak zawk zel, invau, inhauh, inben ngawt zel ai chuan!

Fa enkawl hi har tak a ni. An hmalam hun atana tha tur ngaihtuah pahin sikulah kan han dah ve phawt lo thei lo va. An naupan deuh lai chuan a harsa lem lo. Naupang tam zawk chuan harsatna hran nei loin, châk bik leh tum bik nei lutuk lo pawhin class 12 thlengte chu tha takin an kal mai.

Tleirawl pakhat chuan lehkha zir a tui thlawt lo a. Thil dang zir leh tih châk a nei. Sikul bânsana thil dang tih a chak thu chu a nu leh pa a sawipui ta a. An hau hrep a, a thil tih châk hohzia leh nepzia an fah hrep a, an nuihzat a, an deuhsawh ta chiam chiam mai a. A nun a buai chho ta a, chhungkua an buai ta a ni.

An fanuin sikul kal lova thil dang, hlawhtlinpui chin tur hriat chian mang loh luhchilh a tum ngawt laia nu leh pain lehkha la zir rih tura an nawr hi tihawm tak a ni. An demawm lem lo. Class 10 tal han zo ve hram se an duh a ni ngei ang. Kan ram angah hi chuan zirna luhchilh char char phawt hi a hlawk reng a. A theih chin chin zir phawt hi a tha. Zir san phawt hian duhthlan tur pawh a tam nge nge alawm.

Naupang rilru dik chuan thil thlir thui zawk nu leh pa thu kha awih mai tur pawh a ni. Nu leh pa thuawih phawt hi Pathian thu a ni. Malsawmna a awm. He tleirawl pawh hian lehkha hi han zir lui hram hram se chu a tha maw le! Lehkha zir tak loh avanga ruihtheih thila a lut ngawt pawh hi a dik hek lo. A demawm reuh khawp mai. Naupang rilru leh ngaihdan hi ngaih pawimawh ve a tha fo thung. Fate thil sawi leh chak zawng nuihzat ngawt hi a dik lo ve hrim hrim. Nuihzat leh deusawh lovin fate ngaihdan hi ngaithla ve ila, anmahni zah chungin an thusawi hi thutakin, serious takin dawngsawng ila. Hau lo leh vau lo leh demna tel loin titipui tur a ni.

“I châk zawng chu a tha ve tho mai (a ngaihdan hlutsak). I thiamna pawh hi a ropui ve reng alawm (fakna). Nakinah chuan eizawnna tlak tak pawh a la ni mai thei (beiseina siamsak). Mahse, tuna i zirlai hi zo phawt la (rawtna dang), chutih chhung chuan i châk zawng kawng zawh zel dan tha zawk ngaihtuah ila, phai lamah zirna tha zawkte pawh a awm mai thei asin (a tum sa aia tha mah kawng zawnpui), chumi tur chuan sumte pawh lo khawl ru deuh ila (phurpui), tun thut thut lovah luhchilh la a tha zawk lo maw (ngaihdan dang rawlh chunga amah rawn let)?” te han ti ila, naupang hian an dawngsawng thiam a, nu leh pa thu han zawm pawh a nuam zaih thin.

An ngaihdan te, an chak zawngte leh an rilru ngaih pawimawhsak miah lova mahni tha tihzawnga nawr beh tum tlat hi a fuh loh hun a awm thei. Kan duh anga kan nawr beh theih chuan a tha mai e. Kan duh ang titurin nawr bet thei si lo ila, an nun hloh si se eng nge maw hlawk chuang le?

Kan fate hi kan duh dan leh an duh dan inkawpin a enkawl theih loh maw? Naupang hian an ngaihdan zahsak hi an phu ve. Anmahni zah ila, an thil sawi ngaihsak ila, an duh dan ngai pawimawh ve ila, phurpui chungin rawtna tha zawk awm thei sawipui ila, an rilru hrethiam ila a tha fo. Chutianga tih chuan min zah let a, thu an awih duh zawk fo nia.

Fate châk zawng leh tui zawng hi hriatpui tum a tha fo. An duhdan zawng zawng tihpuitlin vek tur tihna a ni kher lo. A tha ber pawh an hre hek lo. Ngaithla ila, la thutak ila, sawipui ila, thil tha zawk a chhuak leh mai thin zawk. Inzahna hi hlawhchhuah chi a ni ve tlat nia! Inzahtawnna hian thuawihna a hring chhuak zawk zel, invau, inhauh, inben ngawt zel ai chuan!