Ka pu, kum 35 mipa ka ni a, ka in test na ah fatty liver nei, thin lian tan min ti a. Zu ka in thin bawk. Damdawi min chawh chu ka ei reng tho a, he natna hi engtia in enkawl dam chi nge? Zu in zeuh (thla 1 ah vawi 2) in te hi a pawi thui viau em? Ka zawhna i hriat thiam hram ka beisei. ZALEN chanchinbu a i thuziak ka chhiar thin a, a bengvar thlakin ka hlawkpui thin khawp mai.

Chhanna: Fatty Liver kan tih hi thin ah thau tam lutuk tihna a ni mai a. Kan taksaa thau (fats) a tam avang te leh, chung thau chuang te chu kan taksa in a sem darh emaw a paih fai that theih loh chuan thin ah hian a in chhungkhawm (fat deposit) mai ta thin a ni. Thau chuang hi kan taksa tan a tha lo hrim hrim a, thin bakah hian thisen zamah te a beh tam chuan thisen zam zim (stenosis) te a thlen duh a, chu chuan BP sang leh stroke, kal chhia (kidney failure) te a thlen thei a ni.

Fatty Liver hi a tam dan azirin Grade I, II leh III ah te then hran a ni a. Hrisel tha pangngai leh rih zawng dik tawk ah chuan a awm meuh lova. Thau mah mah (obeseity) te, zunthlum nei ah te a awm duh zual hle. Tin, zu in nasa te hian an nei duh viau bawk. Thin timur (liver cells) ah thau a lo tam chuan thisen che vel te zawi muangin a ti buai ta thin a. A nasat chuan thin tha lo benvawn (chronic liver disease) te pawh a thlen thei a, thin sawng (cirrhosis) te thlengin a thlen thei bawk a ni.

Fatty Liver nei te hi a tam zawk chu insawiselna nei miah lovin an awm thin a. Kan hriat chhuah tam ber hi chu ultrasound hmanga hmuh chhuah a ni ber. Thisen a thau awm zat enna Lipid Profile test ah hian normal lo mahse fatty liver hi a awm kher lo bawk. Insawiselna an neih pawhin taksa chau/zawi te, pum nuam lo, thin hnawh te ani ber a. Pumpui lawng (gastritis) ang te pawhin an insawisel fo thin. 

Nunphung natna (lifestyle disease) common tak mai a ni a. Sa leh mawm lam kan uar hnu hian kan hmu hnem zual. Chuvangin a enkawl kawngah pawh hian damdawi hmanga tih dam hi a har khawp mai a, a ngeih ber chu rihna tihhniam (weight loss) hi a ni. Weight loss tur chuan ei leh in insum emaw uluk a pawimawh hle a, zunthlum nei tan in control uluk a pawimawh hle bawk. Kan sawi tak angin zu in nasa te chuan he natna hi an nei duh zual a, chuvangin zu in loh kha a pawimawh hle. In lo thei lo anih pawhin in tam loh te, thlan chhuak khawpa taksa sawizawi tam te a pawimawh hle.

Zu in mi te ah a common tih kan sawi a. Chutiang chu Alcoholic Fatty Liver Disease kan ti mai a. Zu in ve lo ah pawh a awm fo a, Non-Alcoholic Fatty Liver Disease tiin kan sawi bawk. Thin natna hrik Hepatitis C nei te hian Fatty Liver hi an nei duh hle bawk a. Chuvangin in test chian a pawimawh hle. Hepatitis C kan nei anih chuan a enkawl dam theih a, enkawl loh a awm chuan Chronic Liver Disease a thlen thei a ni.