Mitin hian fimkhur hi kan mamawh em em vek a. Kan zing thawh atanga kan mut hun thleng hian kan fimkhur a ngai a ni. Fimkhur loh avanga chânna leh hlohna hi a nasa hle. Mihring chu a thut lai leh a mut lai hian a hahchawl a. A tan fimkhur a tul nèp deuh mahna? Thut dan dik lo avangin pang a kham a. Mut dan dik lo avangin thâwk a dik lo thei a, thâw a chham thin. Chuvangin kan mut lai leh kan thut laite pawh hian rilru nei râna awm erawh a ngai a ni. 

Khualzin chu a khual zinnaah a fimkhur a ngai a. Khualzinte phurtu driver-te hlei hlei an fimkhur a ngai. Zinkawnga mut thlu lo tur a, a inven a ngai a, motor khawl dik leh dik lo te hi driver chuan a hriat chian a ngai a ni. Brake fail leh steering fail te hi driver mawhphurhna a ni a, motor khawl  dik lo chuan chhiatna a thlen thin a ni. 

Chhût mite chuan khawvela lirthei accident tam berna chhan chu driver zu ruih vang a ni, an ti. Dik pawh a dik ngei ang. Miin zu a ruih chuan a fimkhur lo nge nge a, fimkhur lo na fam chuan chhiatna a tawk nge nge thin a ni. "Fimkhur taka kal dem dem an tlu ngai lova, chak tak a kal a, tlan fua fua thinte bawk hi an tlu thin a ni." 

Hringnun zin kawng hi hlîngin a khat a. Kawngte chu chhuk chho leh bum bohin a khat a, chung kawng zawhtute chu mi chi hrang hrang an ni a. Mi tha leh tha lo te, mi fel leh fel lote an ni. Hmel tha leh tha lo te, pian phunga mawina nei leh nei lote an ni a. Mahse an zin kawnga an mamawh chu a inang reng a, chu chu nun uluk, nun nghet a ni. Miin hlawhtlinna leh hlawhchhamna tlang a chuan reng rengin a tana tha ber tur zin kawng a zawh dawn tih a hria a. Chu a zin kawng chu suar leh khamin a hung vek a, chu zin kawng zawh tluan tur chuan, a ke chheh tin ah a hmâ a awm chu a belchiang hmasa ngei tur a ni. 

Kristian ramah hian ringtute hi kan fimkhur a ngai a. Nun kawng dik zawh a, nun belh chian dawl kan neih theih nân englai pawha mahni kan infiah a ngai a, englai pawha kan inzir a tul a ni. 

Khawl chu a neituin tha taka a enkawl loh chuan man to leh man sangin awmzia a nei lova. Khawl chhe ber a chang nge nge thin. Rei lotêah a lo tui êk a, hman tlâk loh paih mai tur a ni. Pa pakhat chu pian tha tak leh chak tak mai a ni a, infiamnaah te chuan a sang ber pawl a ni thin a. Mahse, a nungchang che zia leh a ei-ina, a in uluk loh avangin fimkhurna a tlachham tial tial a, a thatna leh a theihna te chu a lo hniam a. A tawpah chuan a nunna pawhin a lo tuar phah ta a ni. 

Thu tlûkna siamna kawngah fimkhur rawh u. Rorelna fel leh fai nei tur chuan thutlukna fel neih a ngai. Fimkhur taka ngaihtuah a tul. Engnge kan thurel hian a nghawng ang? Hetiang hian thu tlûkna siam dawn ta ila, a tha ang em? Kan ramin a thatpui ang em? Kan pawl tan a tha ang em? Member ten kan chhiat phah thei ang em? tih chhut tel a ngai a ni.

Tirhkoh Paula chuan a rawngbawlpui Timothea hnen chu engkima fimkhur turin a chah a. Engkim chuan huam loh a nei lova. Kristian phei chu engkim hian a huam tak zet a ni. Mite tana malsawmna nih hi fimkhurna rah a ni a. Kohhran hruaitu dinhmun pawimawh tak chelhtu Pastor, Kohhran Upa leh hruaitu dangte chu mi dangte en rawn bik, enthlak bik an ni a. An nunah mipui beiseina duhawm tak rah chhuah tur an nghak reng a ni. Chutiang ram hruaitute, politician te, social worker te pawh hi an thil tihnaah an fimkhur a ngai leh zual ngei ang. Miten eng angin nge an hmuh? Miten an nunah zirtur an hmu em? 

Kan hmaah sa hlauhawm min tihlum thei a awm avanga fimkhur tur kan ni ringawt lova, chu aia hlauhawm zawk hlemhle te, duhamna te, chapona te, mahni hmasialna te hi neih a hlauhawm zawk a ni. Mahni thawh chhuah ni hawt lo neih tum tlatna te hi piansualna rapthlak a tling a ni. Hengho hian min ti chhe mek zel a, chhungkua, khawtlang, kohhran leh ram a ei chhe mek a ni. Chhungkua a pa ber leh nu ber mi pawlawh lutuk chuan fa tha neih beisei suh se. 

Hetiang hian i ngaihtuah ngai em? Hetiang hian i hun i hmang thei em? 

Hnathawhnaah fimkhur rawh. Eng hna pawh thawk ila, kan tih dêm dêm a ngai thin. Thawh buan buante hi chetsualna bul a ni. Chak avang te, phur avangin tih chiam chiam tur pawh a ni lo. Hlawhtlinna pawh a ni chuang hek lo. Hlawhtlinna chu fimkhur taka hna thawh a ni mai. Eng dang a leng lo.   

Tawng chaltlai leh mi dang sawisel te hi mi pawlawh nihna a ni a. Hengho awmnaah hian thil tha engmah hmuh tur a awm lova, thil tha a chhuak ngai hek lo. Thawhpuite rel ching, thawhpuite itsik a thiktu chu a hmuingil ngai lo. Heng ze chhia hi fimkhur lo nun atanga lo chawrchhuak vek hi a ni. Thil lei naa fimkhur lo chuan thil tha lo a lei nge nge. Thil ei tlak tawh lo, in tlak lo a lei thin bawk. Chutiang in dawrkai leh sumdawngte pawhin anmahni dawrtu laka an fimkhur loh chuan an tan dawrtu tam neih theih a ni lo. An thil hralhah an fimkhur a ngai a, an thil zawrh chu mipui tan a him em? tih an ngaihtuah hmasa thin tur a ni. 

Chutiangin ram roreltu that chhis leh nun pawlawh tak, mahni tanghma chauh hai thinte, nun ulukna reng nei lo, a dera ram mipui hmangaih ringawt tute chuan ram ropui an thlen ngai lo. Henghi fimkhur lohna rah a ni a. Ram hmangaihtute chuan tlan san vang vang tur a ni. 

Chhiatna thleng thin hi fimkhur loh vang a ni. Khuarel chhiatna lo thleng thin te hi khuarel ni lovin mihring rel chhiatna a ni a. Chhiatna siam chawp a ni a. Fimkhur taka kal chuan pumpelh theih a ni. Fimkhur loh vanga hriselna chhe ta zel te hi kan ngaihtuah ngai em? Fimkhur vangin accident a pumpelh theih a, fimkhur vangin himna leh hlimna a lo thleng thin zu nia!