Ka lawina Kohhran-ah chuan kum tin Social Front Committee hmalaknain zirlai tithate chawimawina leh an puala inkhawm kan buatsaih thin a, kuminah erawh hri leng vangin hetiang hun hi kan hmang lawk thei lo a, kar hmasa Pathianni khan inkar hlat taka thuin Centenary Hall-ah kan hmang thei hram a ni. Hemi tum hian kan Kohhran Upa, Social Front Committee chairman ni bawk chuan ‘Finishing tawih’ tih thupui hmangin thu chah tawi tê, tha ang reng zet mai a sawi a, chu a thupui, ‘Finishing tawih’ tih chuan ka ngaihtuahna a luah chhunzawm rauh rauh mai.

Football-ah pawh hian a pawimawh lai ber chu ‘finishing’ hi a ni. A hmawrbawkna (finishing) a tha em tih hi striker tha kan tehna pawimawh tak pawh a ni. Eng anga chak leh ball thiam pawh ni se, goal bulah a chet nawi tlat a, a finishing a that miau loh chuan ‘striker’ tha a ni thei ngai lo. Lionel Messi leh Cristiano Ronaldo te that riauna chu an ‘finishing tawih’ vang a ni. Mi aiin goal thunna hun tha (chance) an nei tam bik pawh a ni chuang lo. An chance neih chhun an hmang tangkai a, an finishing a ‘tawih’ a, chu tê mai chu a ni mi aia an that bik na chu.

Zirnaah pawh hian a pawimawh lai ber chu a hmawrbawkna (finishing) tho hi a ni. Bul tan that hi a tha. Chu aia pawimawh zawk chu a ‘hmawrbawkna’ hi a ni. Naupan laia lehkha thiam thei tak, pawl sang tual tuala inthahdah tual tual, engmah ni zui ta lem lo hi an tam khawp mai. Kan Upa chuan a tia lawm, “Tum khat chu thingtlang khaw pakhatah kan zin a, chu khuaa private English Medium School-ah chuan HSLC exam-a topper pawh lo ni tawh hi a lo thawk ve reng mai a, zu a in nasat avangin bân an lo tum mek hi a lo ni a,” a ti. HSLC-a topper meuh kha a hmawrbawkna (finishing) chu a ‘tawih’ lo hle mai. Thingtlang private school pawhin an chhawr duh mang lohah a chhuak ta der mai a nih chu.

Ka thianpa, ka classmate thin pakhat chu lehkha thiam thei tia sawi tur a ni hauh lo. Matric pawh Third division-ah a pass che che a ni. Mahse, a taima a, a pawl a sang tial tial a, a taima tawlh tawlh a, taima ta na chu a titha tawlh tawlh bawk a, PhD degree neiin tunah chuan University-ah zirtirtu a ni daih tawh. A bultanna chu tha lua lo mah se a hmawrbawkna (finishing) erawh a ‘tawih’ teh e.

Nu leh pa tam tak hian kan fate hi an tet lai chuan an zirna kawngah kan phurpui khawp mai. Kan phak tawka thain bul kan tanpui a, English medium school-ah kan kaltir hram hram a, an sikul kal tur kan hruai a, an bân hunah kan lam leh a, homework kan tihpui thlap thlap a, an exam result pawh kan ngaihven peih khawp mai. An pawl a sang tial tial a, kan inthlahdah ve tial tial a, college an kal chinah ngat phei chuan an lehkha zir leh zir loh pawh kan ngaihvenpui tawh lo. An zir pawhin ‘e’ kan ti a, an zir loh pawhin ‘chu e, kha e’ kan ti tawh chuang lo. Kan inen liam vel mai mai a ni ber mai. Pawl san ang zela inthlahdah ve zel hi eng an ni zui mawh khawp mai.

College a nih tak avanga lehkha zir tum ta mang lo, then vel mai mai, eng emaw ti tia pass ve leh mai hi kan thahnem fu mai. Heng avang hian kan ramah hian lehkhathiam hna hmu lo (educated unemployed) kan tam phah ni pawhin a lang. Fail pawh hi kan hlau vak lo. Kan fail pawhin pawl kan sawn tho a, kan fail-na subject chu kan ba mai a, a kum lehah subject dang rualin kan exam leh a, eng emaw ti tiin kan in thai pass ve leh mai a, certificate kan nei mai a, kan certificate milpui thiamna tak tak erawh kan nei pha meuh lo.

Subject ba neihte hi phal lo ila, fail chung chung chuan pawl sawn lo mai se, tun ai hian zirlaite hi an inthlahdah lo zawk chuan a rinawm. Ram changkangah chuan hetiang nek nek hian an ti ve ngai lo. Revd Chuauthuama sawi danin Cambridge University-ah chuan pass tur chuan subject zawng zawngah 65% aia tlem lo hmuh vek a ngai a, subject pakhat chauha fail pawhin a pum puia fail a ni tawp mai. Subject tina 65% aia tlem lo hmu tur chuan tan fe a ngai dawn tihna a nih chu. Keini ram anga zan hnih khat Bazaar note chhiar leu leu a, pass mark hmuh che che nen chuan tehkhin phak pawh a ni lo ve.

Bul tan that hi a tha e. A pawimawh ber erawh chu a hmawrbawkna hi a ni. Hmawrbawkna tha nei tur chuan thawhrim a ngai a, inthlahdah a thiang lo a ni. Hmana kan nihna aiin tuna kan dinhmun, kan hmawrbawkna zel hi mi te min tehna ber tur pawh a ni.