Vawiina kan hriat hma daih khân—ngaihsân pawh kan la ngaihsân hma daih tawh khân, khawvêl pâwn tunge an ni tih pawh a la hriat hma khân—khaw khat pa hriat hlawh pawh an ni ngai bîk lo—an nun chu ‘Zero’ tia sawi tûr a ni satliah ve mai thin. Mahse, an tumna ruh ngát ngát fahran tak mai chu ûm in, an retheihna leh an fahrahnate emaw an riltâmnaten emaw a hneh bet ve ngai lo a. An bei a, mi aia nasain an thawkrim fâl bîk thin a, an hlawhchham fo naah an beidawng duh ve ngai tlat lo a. A tîra mi naran ni ve mai thinten ‘Hero’ dinhmun ropui an rawn luah dân hi, khawvêl awm chhûng hi chuan—a bîkin, retheihna atanga chawr chhuah tumte tân hi chuan—thawnthu ngaihnawm a ni reng thin a ni.

• Keanu Reeves: ‘John Wick-a’ tiin tûnlai movie chhuak thar en thang deuh chuan Keanu Reeves hi kan hre fur âwm e. Hollywood stars zînga mikhual lo tak, Sandra Bullock nena Speed an chan dun atanga khawvêl hmeichhe star rawn rawn ni chho Keanu Reeves hi kum 1964 khan Beirut, Lebanon-ah daih piangin khawvêl chuan a lo lâwm a. Actor ropui leh lâr ni tûra a sual chhuah dân hi a namawi lo khawp mai.

A nû hi Essex khaw chhuak, English mi a ni a. A pâ, Hawaii lam chhuak ni thung hian Keanu hi kum thum mi a nihin a hmu ve chauh. Chutah a chhûngkaw thar chu a la tuithlâr zui! Kum 13 mi a nihin a pâ nên hian an inhmu leh chauh a ni.

A naupan lai hun hi hmun hrang hrangah Reeves hian a hmang kual nasa hle—Australia leh Canada ram lam lamte a kâr tawn a. High School pawh school hrang hrangah kum nga chhûng a zir phah hial a ni. Kum 17 mi a nihin high school atanga hnawh chhuah a tâwk zui lehnghâl! A nû hian pasal dang nei leh thin mah se a ti fuh hlei thei lo—vawi li lai Reeves hian pa dang a nei hman! Mahse, a pahrawn pakhat (!), Hollywood director, Paul Aaron zârah Los Angeles lamah a pêm thei ta hlauh mai.

Kum 1998 khân Keanu Reeves chuan nupuiah Jennifer Syme a nei a. Mahse, vânduaina chhûm chuan a ûmzui emaw tih mai tûrin an fa sên chu thla riat mi chauh a nihin a borsal ta hlauh mai! Chu chuan nupa inlungrual lohna thlenin an inthen phah ta hial! Chu mai a ni lo, an inthen hnu thla 18-naah Jennifer Syme chu car accident-naah a thi zui leh zêl a!

Heti teh nuai kârah hian a nun chhûngrila beiseina chu a chhi nung reng thin. Film lâr lêm loah role tênaua a inlan chhoh hnuah River’s Edge-ah a chang ta. Hemi hnû hian film hlawhtling tak, Bill and Ted’s Excellent Adventure te, Hollywood blockbluster Speed-ah te a chang chho ta zêl a. Kum 1999-a The Matrix a’n chang leh chiah chu khawvêlin a hai thei tawh lo… A bâk chu kan hre tawh e!

• Sylvester Stallone: I khum bula Rocky-a poster i târ ve thin emaw sikula pai atan Rambo box kher i ngên ve thin emaw a nih chuan i kum a nau lutuk tawh lo a ni ngei ang! Kan sawi chu, ‘insual film-a’ a changtupa ni thang hlîr channa The Expandables film siamtu leh a changtupa ber Sylvester Stallone a ni.

American actor leh director hlawhtling, Sylvester Stallone hi kum 1946-a piang niin kum 24 mi a nihin a tum leh nih châk ber actor nih tum tlat chungin New York City-ah a pêm a. A tum leh châk ber tih puitlin tumin kê a’n pên ve a; mahse, a ngaih angin thil a kal tluang thei hauh lo—lemchang ve tûra ‘hnâwlna ânkâ khà’ hlîr a ni a dawn zui ni! ‘A tawng dân, a kal dân zawng zawng nên mi nuih a tiza tlat … lem a chang thiam lo hulhual bawk si!’ tih chu a hlawh chhun a ni ta fo. A hmui chung lam kak avânga a tawng fiah lo chu miten amah an nuihna chhan a tlin thin avâng chuan nâ a ti ve thin ngang mai. Mahse, a beidawng duh dêr chuang si lo a…

Film industry lam atanga lemchang thiam zawngtu, talent scouts leh agents 1500 chuangin an hnâwl hnû pawn a la bei fan fan zêl a! Darkâr tam fê office pâwnah, ‘amah hnâwl leh tu tûr’ nghâkin a thu fan fan peih tlat thin—chutiang chuan vawi tam tak a ti a ti thin a nih chu!

Chutah, a sum leh pai neih ve chhun dinhmun chu a’n la tla chhe zui lehzêl a—tlêm hle mah se! Electric bill pêk tûr pawh nei loin loh theih lohin a hmangaih êm êm, a kianga awm chawt thin a ui chu dollar 25 leka a hralh a ngai zui! A hnûah in luah tûr pawh hmu zo loin khawlaia a riah a tûl thûl; New Jersey Port Authority-ho enkawl Bus Terminal-ah kâr thum ngawt a riak zui.

Mahse, a tumruhna chuan eng emaw takah a la thlen dawn tih a ring bur mai si. Rocky film tûr script a ziah chu film siamtuten an hmu tai ta nge nge a. Sum tam tham takin lei an dîl ta—mahse, ‘Film-a amah a chan ve dâwn loh chuan…’ tih a ni tel tlat zêl! A script chu dollar 325,000 laiin an ngam hial—a chan ve dawn loh chuan! A hnâwl ve ta ngat. Mahse, a tâwpa tâwpah chuan dollar 35,000 lekin a phal ta—a film hralhna hlêp atanga 1% nen! Rocky film hian Box office-ah dollar maktaduai 200 chuang a hmu chhuak ta! A hmaa ui chung chunga a ui duat a lo hralh tawh lei lehna tûr sum chu a hlawh lêt leh chiang teh e! A bâk chu history a ni tawh!

• Steven Spielberg: Lemchan khawvêla ‘mi lian’, a film siam ropui tak leh hmuhnawm tak tak avânga Oscars hial dawng tawh Steven Spielberg-a nun hi a tluangin a ngîl bîk lo khawp. Cincinnati, Ohio-ah kum 1946 khan E.T., Raiders of the Lost Ark, Jaws te leh Jurassic Park film siamtu Steven Spielberg hi a piang a. A nu leh pate an inthen hnûah Los Angeles lama lemchan zirna sikul lian, lemchan thiam tam tak chawr chhuahna University of Southern California-ah luh tumin a’n dîl ve a; mahse hnâwl a ni. A hnûah Long Beach lamah, khatih laia la lâr lêm lo lemchan zirna in California State University-ah a inziak lût ta thung.

Kum 1979 khan Spielberg chuan a film hmasa ber 1941 chu a tlâng zarh a. A’n che chhe mai mai khawp a—sum leh paiah mai ni lo, a hma lam hun tûr atâna hnual rawkna hial tûr sawisêlna nasa tak a dawng bawk. Mahse, a tum chu bânsan a tum chuang lo. Hma lam panin a bei tâng tâng a. Ni lo se chuan, hêng film ropui leh hlawhtling— Schindler’s List te, Saving Private Ryan, A.I. Artificial Intelligence te leh a tîra kan sawi tâk, movie hlawhtling tak takte khi kan hmu tawp nâng!

• Jim Carrey: A film channa lamah a nuihzatthlâk thei ang bera inlanin mi tihlimtu ber ni thin mah se kum 1962-a Ontario, Canada-a piang Jim Carrey chanchin hmasa lam hi chu a nuihzatthlâk hauh loh mai! Retheihna namên lo leh baihvaina namên loin a phuar beh tlat thin ni mah se, a tumruhna leh a beidawn duh lohna chuan a chhuah zalên thei ta hlauh a; mî tihlimtu a ni thei ta chauh a nih hi!

Kum 1977, kum 15 mi a nih laiin Jim Carrey te chhûngkua hian sum leh pai lamah nasa taka tlâk chhiatna an tawng a. Toronto khaw daiah pêmin Titan Wheels factory-ah an chhûngkuain hnâ an thawk thin. Carrey pawh gate duty/janitor hnâ thawkin sikul bân atanga darkar riat chhûng teh meuh mai a duty zui thin a. Hnâ an thawh zawh pawn mahni ina hâwna tûr takngial pawh nei zo ve miau ta lo chu motor/camper  van-ah an riah mai a ngai thin.

Chutia inhlawhfa chunga an chhûngkuain pawisa an khâwla an han kàn ve deuh hnû chuan Jim Carrey pawh Toronto lama club pakhat ‘Yuk Yuk’s’ an tihah fiamthu thawha inhlawh a tum ve a, mi nuih a tiza dêr hauh lo—mi’n deusawh taka an ‘boo’ khum a hlawh hial zâwk thin! Kum 17 mi a nihin high school atanga hnawh chhuah a la tâwk zui.

Mahse, beidawng duh loin a tum ram ûm zui tûrin Los Angeles lamah a pêm ve ta râwih a. Sunset Blvd., Hollywood-a The Comedy Store-ah fiamthu a thawh ve zeuh zeuh tan ta. Hlawhtlinna tia chhâl tûr erawh a la tawng chuang lo. Kum 1990 a rawn inher chhuak a. Lemchan tuala dai hriat neih tuma kum 11 chhûng tehmeuh a beih hnûah, show pakhat In Living Color an tihah a inlan ve—1994 thleng chauh! Mahse, Hollywood-a kum 15 chhûng a tei hnû, kum 32 mi a nihin vanneihna a hmu ve ta nge nge—Ace Ventura movie-ah a changtupa dinhmun a luah ve thei ta nge nge a ni. Hemi hnua a film channa hrang hrangte chu inzawh chawp ngai loin kan hre vek tawh hlawm âwm e.