• Katy Perry: Santa Barbara, California-a kum 1984-a piang Katy Perry hi tûnlai rimawi ngaina lêm lo tân pawn a hming tal hi chu hriat loh rual a ni lo ang. I Kissed a Girl star hi tûna Hollywood mi hausa tawntâw zînga a tâl hma hian retheihna chuan a nun a sawp na hle thin a; mahse a insawp chauhtîr duh ngai lo.

Kristian chhûngkaw tha tak; mahse rethei tak si atanga rawn chawr chhuak niin harsatna tam tak a paltlang a. An chhûngkaw chaw ei tûr pawh an dawh chawp hial thin. A naupan lai atang rênga hlawhtlinna hi tih mai maia neiha hlawh chhuah ngawt theih a ni ngai lo a, thawhrimna nêna hlawh chhuah a ngai thin a ni, tih rilru sei lenpuitu a ni. Chu chu an chhûngkaw khawsak phung atanga a chhar pawh a ni. Rimawi lamah a tui hmâ hle. An unauin Pathian Fakna hla hlîr an ngaithla thin a, kum 13 a tlinin a chhûngten tingtang an present a, chumi hmanga a hla phuahte chu biak in leh hmun dangah te a sa ve âl âl thin.

Kum 1999, kum 15 mi a nihin high school atanga hnawh chhuah a tâwk a; rimawi lamah a hun zawng zawng pe tûrin rilru a siam thung. Tennessee lamah kalin Red Hill Records nên contract an ziak a, a Gospel record Katy Hudson tih chu March, 2001, kum 17 mi a nihin a tichhuak a. Mahse, copies 200 chauh a hralh! Red Hill Records hnên atangin bânna lehkha’ a dawng zui!

2004-ah recording label ‘Java’ tih, The Island Def Jam Music Group hnuaia mi nên inremna an ziak leh. Mahse, Def Jam lam chuan Java chu an thlauhthla leh ta si. A record neih sâ pawh chuan studio chhuar bâk a chang ta lo! Kum 2006-a recording label lian Columbia Records nêna inremna an ziah theih hlauh avângin a hlawhtlinna tûr kâwl chu a êng ve tan dâwn emaw a ti hman hial. Mahse, recording pawh a zawh hmain Columbia chuan an han hnâwl zui leh si!

A aw thatna leh a zai thiamna chu hmuh hmaih luih rual chi a ni si lo. 2007-ah Capitol Records nên inrem an ziak leh a. A kum leh 2008-ah I Kissed a Girl chu an tichhuak ta. Heta tang zet hi chuan khawvêlin kum 24 mi Katy Perry chu a hai thei tawh lo. Amah pawn hnung lam hawi lêt loin a hmaa hlawhtlinna hmuh belh tûr awm apiang chu banin a thawk chho ta zêl a. Hlawhtlinna chang tûra a pên tan tirh, high school atanga hnawh chhuah a nih atanga I Kissed A Girl a tih chhuah thleng hian kum kua ngawt a vei a nia!

Hetih rual hian, hlawhtlinna chu tawngin ram hrang hrang music chart-ah ‘a ber’ hauh chho awn awn mah se a nunkhua a tluang reng bîk hauh lo. Kum 2010-a pasal atâna a neih, Bristish comedian lâr Russel Brand nên thla 14 chauh nupa angin an la awm hman chauh tihah ani Katy chu tour neiin khawvêl ram hrang hrang fangin a zin kual nasa mai a. Sao Paulo, Brazil-a concert a neih dâwn nîin a pasal Russel Brand chuan text message hmangin a rawn then ta thut mai! Inthenna lehkha court lama a ziah tûr thu a rawn thawn a. A tuara a tuarzia chu, 2012-a tihchhuah a documentary film Katy Perry: Part of Me en tawhte chuan kan hre chiang ang chu. Depression-in a’n hmet tak tak mai chu, kâr hnih chhûng teh ngawt khum atangin a tho chhuak miah lo a ni!

Mahse, harsatna te, beidawnna te leh depression-te hneha tho chhuak leh thinte tân chuan, hlawhtlinna leh lawmman ropui zâwk an hmaah dah a ni thin si a—Katy Perry ang hian.

• JK Rowling: Naupang lehkhabu a ziah ‘Harry Potter’ series avânga tûnlai khawvêla ziaktu hausa ber, khawvêla hmeichhe lehkha ziaktu zinga lehkhabu hralhna atanga dollar tld. khat hmu chhuak hmasa ber, British nû, JK Rowling nuna harsatna chingchivêt nasatzia han hriat hi chuan khawvêla hmeichhe ziaktu hausa ber, mai ni lo, mipate pawn an khûm rual loh a nih theih dân hi thil mak a tling hial!

Kum 17 mi a nihin high school atanga hnawh chhuah a tâwk a; kum 25 mi a nihin khawvêla a hmangaih ber a nu’n a thihsan zui. Kum 26 mi a nihin nau a chhiat a, a kum lehah a rilru tinatu a ni dâwn tih hre loin pasal a nei a. An nupa nun erawh khâkna leh halnain a khat thung. Kum khat chauh an innei tihin an inthen zui a. Fanu a’n hring zui a; mahse, a beidawnna tizualtu mai a ni si. Lehkhabu dâwrah te a inhlawh chawp lâwp lâwp thin. Depression nasa tak neia rûmin a kun tlawk tlawk thin a. Kum 29 mi a nih chuan hmeithai enkawlna hmun, welfare-ah an intulût ta ringawt mai a ni.

Kum 30 mi a nihin mahni nunna hial lâk duhna khawp neiin a rilru chu a buai chho ta zêl a. Kal ngaihna rêng hre loa a kun lai chuan a tuina leh a rilrua lang ber thu ziah lamah a insâwr bing ta hlauh. Mahse, chutia thawnthu ziah vak vak ringawt chu hlawhtlinna a ni ngawt chuang bawk si lo!

A lehkhabu ziah chu lehkhabu chhutu leh chhuahtu publisher hrang hrang a’n thawn kual thin. A dawn lêt chhun chu ‘hnâwlna lehkhathawn’ a ni zêl mai si! Publishing house pariat laiin a thawnthu ziah chu an hnâwlsak ta!

Mahse, a nuna ‘mahse thar’ awm zâwka chu: ‘beidawn loh’ a ni tlat tawh. A lehkhabu manuscript chu publishing house pakhat, Bloomsbury a thawn leh a. An editor pakhatin ina chhiar tûra a hâwn chu a fanu, kum riat mi lek chuan a lo chhiar khalhsak hlauh pek! A chhiar a chhiar a, a chhiar zo ta thuai mai. A pa’n chu chu a hmuhin Rowling-i lehkhabu tih chhuah duhna chu a nei ta. Harry Potter bu hmasa ber, Harry Potter and the Sorcecer’s Stone chu an tichhuak ta a ni. Chutih lai chuan JK Rowling chu kum 31 mi a ni. Chuta tang chuan khawvêlin Harry Potter leh a ziaktu JK Rowling chu a hai thei tawh lo.

Harry Potter bu pasarih a hralh chhuah atangin US dollar tld. 7.7 chuang a hralh chhuak tawh a; a movie an siam atangin chutiang zah vêl tho chu a hmu chhuak tawh bawk. ‘Beidawnna ruam atanga hnehtu hmeichhia chu!’ tih loh rual a ni mawlh lo e!

• Charlie Chaplin: TV-a a che tla vêl han hmuh hi chuan 1889-a London-a piang Charlie Chaplin-a hringnun hmasa lam hi a hrehawm ang tih dâwn ngam a harsa ngawt ang. Chhûngkaw rethei tak atanga lo piangin kum hnih mi lek a nihin a pa’n a nûhoa hmeithai tûrin in a chhuahsan a; pawisa derê pawh a hnut chhiah lo. Kum sarih mi lek a nih laiin chhûngkaw rethei zual khawsakna hmuna awmte hnathawhna hmunah riahna tûr in leh ei-in tûr an hmuh ve nân hnâ a thawk tan a. Kum kaw mi a nihin a nû chuan rilru lamah buaina nasa tak a nei zui. Kum hnih hnuah a pâ, zu in nasa lutuk chuan thin lian natna avângin a thihsan zui. A nû pawh rilru buai an dah hranna hmunah dah zui ngai khawpin a buai chho a, 1928-a a thih thleng a awm zui ta hial a ni.

Chutih lai chuan fahrah Chaplin leh a unaupa Sydney te chu ei tûr tla chhamin vawi tam tak chaw an nghei fo mai. An chhûngkaw chunga khuanu rorêl dân chu sual hle angin lang mah se Charlie Chaplin bei erawh a dawng duh hauh lo. Heti chung hian lâm dân chi khat ‘step dance’ a thiamna chu hmang tangkaiin mipui hmaah fiamthu thawh paha lâm ten a inlan ve fo thin.

A tâwpa tâwpah Hollywood lam kawng a insial ta nge nge a. A duh angin a tîrah hlawhtling nghal vut vut lêm lo mah se a hnû zêlah mi tumruh Charlie Chaplin-a talent neih thatzia leh silent-film actor ropui ber zînga mi a nihzia chu khawvêlin a hre ta a, a theihnghilh ngai tawh bawk hek lo ang.