Furpui lo thleng tur atan inpuahchah a hunFurpui lo thleng tur atan inpuahchah a hun Nikum khan March thla tir lam atangin ruah a sur tan a, favang thleng rak a ruah a tlak avangin harsatna kan tawk nasa hle a nih kha. Mizoram ram chhung hmun hrang hrangah lei min leh lei tawlh, kawng chhia, culvert leh retaining wall chhia a tam hle a. Kan la hria anga tuilian avangin khaw thenkhatin harsatna an tawk a, nunna chan phah leh hliam tuar pawh engemaw zat an awm a, leimin leh leikhi avangin chenna in engemaw zat chhia leh luah tlak loh a awm bawk a nih kha. Khati taka ruahtui a tam avang khan kawng chhia vangin kan buai luai luai a, chief minister-in congress bhavan-a (September 16,2017 a) a sawi dan chuan June, 2017 thlenga leimin/ lei tawlh report PWD in a dawn zat chu 984 a ni a, kawngpui chat thla, tlabal 81, retaining Wall chim 40 deuh thaw leh Culvert chhia ringawt pawh 94 zet a ni. Chumai a ni lo a, Mizoram puma ruahsur nasa avanga chhiatna thleng  June thla lai hawla Disaster Mangement & Rehabilitation Department in an hriat theih chinah In chhhia 220 awmin, mithi 12 an awm bawk. Heng hi kum zatve hmalama mi a ni a, kum tluan a harsatna thleng zat hi hmuh mai tur a awm lo a, a chhinchhiah tur ber DM&R department website-ah tarlan a ni lo bawk a. Engpawhnise, ruahtui a tam avangin ram pum huapin kan buai tih erawh kan la hre theuh awm e. Khawvel lum zel hian sik leh sa a nghawng nasa a, ruahsur dan te, thli tleh dan te, khaw lum leh vawh dan te hi a mumal lo sawt hle a ni. Chuvangin, kumin pawh hian enge kan an leh dawn a hriat loh a. Kum tin fur ruahsur vang laiin kan buai ziah a, kawng a chhia a, lei a min a, kan vanduai tum phei chuan lei minin in a hnawl a, nunna chan pawh an awm thin. Kan ram leilung dinhmun ngaihtuah lek lo a insak leh lai laih te hian buaina a thlen ta fo mai, ruahsur loh lai pawhin harsatna a thleng fo bawk. Khawpui lun laia sorkarin Convention sak a tum pawh ruahsur loh laiin a a hmun an laih vangin lei a che a, MG road-a kawng a khi nasa a, Bible House pawh a him loh avangin thiah a ngaih phah a, tun thlengin khawpui chhung inkalpawhna a buai phah a nih hi. Chuvangin, kan rama ruahtui tlak dan te, kan leilung dinhmun te hi zir chian leh zual a ngai hle a ni. Chhiatna nasa zawk a thlen lohna turin inven lawk pawh a pawimawh a. Kawng chhia te, lei min te hi ruahtui tam vanga puh ngawt ai chuan fur thlen hmaa lo inpuahchah lawk a, chhiatna a thleng tur laka lo inven lawk hi a finthlak khawp ang. Khuarel chhiatna lo thleng lirnghing te, thlipui te hi chu lo a hma fe atanga lo inralrin lawk a harsa a, mahse, thlasik anga khel lo a lo thleng thin fur ruah bawhawk avanga kum tin chhiatna a thleng nasa lutuk hi chuan a lo invenlawkna lamah tih tur kan ngah zia a tilang chiang hle a ni. Kan thenawm Bangladesh hi a awmna a hniam a, ruahpui leh thlipui vangin kum tin an buai ziah a. Tun hma Doordarshan leh Bangladesh TV chauh en tur a awm thin lai phei chuan fur laiin sipai sorkarna ram Bangladesh tuilian en loh theih loh a ni thin. Mahse, hun a lo kal a, ram hruaitu an inthlak a, sorkar kalphung a lo tha ta a, an ramin kum tina harsatna an tawh thin chu tihreh tumin tih tak takin an bei ta a. Tuilian leh thlipuiin harsatna a thlen dan te, chumi kaihhnawih an ram leilung te an zir chiang a, lo inven theih dan tur an dap a, lo inralrin dan tur mipui an zirtir a. Chhiatna a lo thlen hun a rang tak leh awmze nei taka che chhuak thei turin sipai an thuam tha a. An in sak dan te an tidanglam a, an lo leh leilet te pawh chhiatna thleng thei tur ngaihtuahin an enkawl a. Chutiang chuan sorkarin kawng hrang hrangin nasa takin hma a la a, tuilian danna tur bang Km 5,695 a thui leh tui luan ralna tur (canal) km 4,310 thui an siam a. Tih tak taka hma an lakna avangin Bangla desh tuilian hian chanchinthar a luah khat ta khawp mai. Nikum khan kar hnih chhung tuilian avangin Bangladesh ram zatve lai a chim hman a, mi 140 in an thih phah a, in leh lo chan tam tak an awm a nih kha. Mahse, tunhma lama tuilian an tawrh te nena khaikhin chuan zia tak a ni. Kum 1988 a tuilianah khan mi 2000 chuang an thi a, a hnu 1998 ah khan mi 1000 in an thih phah bawk. Sawi tawh angin invenlawkna lamah sorkarin nasa taka hma a lak avangin an chhiatpui nep ta hle a ni. Tun hma kha chuan an buh leh thlai hmun te a chhe nasa thin a, chawah harsatna an tawh phah thin a, mahse 2010 atang khan an buh-bal thar dahthatna an buaipui avangin Bangladesh hi chaw (foodgrain) ah a intodelh tawh nghe nghe. Kan rama chhiatna lo thleng thin te pawh hi kan thlir dan kan thlak a hun ta khawp mai. Thal laiin kangmei a chhuak thin a, fur laiin lei a min a, in a chim a, chhiatna a thleng fo thin. Hei hi kum tin a thleng tura kan ngaih chuan kan rilru put hmang (thuneituten an) thlak a ngai tihna a ni. Silpoulin lo lei lawk chiam bak hi invenlawkna dang ngaihtuah a ngai hle tihna a ni. Heng chhiatna thleng thinah hian thuneituten mawh an phur duh lo a nih pawhin a ven dan turah tal chuan mawh an phur chiang a ni. Tun ang hunah te hian fur lo thleng tur atan inrinlawk a, lo inpuahchah lawk a hun. Ruahsur vanga kawng ko min thei mai tur te, kawng thlang lam min thei mai tur te, insak, lei laih leh lungrem vanga min thei tur te, kawr a bawlhhlawh then fai ngai te, tui chhe paihna leh vawk in vanga min hlauhawm te zawn chhuah a, mithiamte enkawlna hnuaia hmalak a hun khawp mai. Khawpui chhungah pawh hian chutianga tih tak taka hmalak chu ni se chhiatna thleng tur 90% hi chu a ven lawk theihin a rinawm. Kangmei chhuah chhan te hi hriat a ni ngai meuh lo a, electric current kalsual leh eirawng bawlna gas chiang lo vang a nih a rinawm thu an sawi fo thin. Chutiang a nih chuan a ven dan tur dap a ngai tihna a nia. Thal lai te hian a khat tawkin in tina an eirawngbawlna gas leh an electric wiring te endik thin ni ta se, mipui pawh kangmei laka fimkhur a ngaih zia inzirtir thar leh bawk ila. Chutianga tih tak zeta hmalak a nih chuan kan ram chhiatna lo thleng thin hi a kiam rawih ngeiin a rinawm. Kum dang ang a nih chuan thal hi a rei tawh vak dawn lo a, kan ram dung leh vanga inkalpawhna kawngpui te hi enkawl hun lai tak a ni. Furpui thlen hun a chhe mai thei tur lai te zawn chhuah a chei that a hun viau. Nikum September thlaa chief minister-in a sawi leimin vanga lirthei kal theih loh thenfai ngai 984, kalkawng bal 81, retaining wall chim 94 leh culvert chhia 83 te kha tunah hian an siam tha vek tawh em le? Kumin chu (kum hmasa lamah an inzir lawkna tur a awm tha bawk a) chhiatna thleng mang lo turin sorkar pawhin hma a lo la lawk turah ngai phawt  ang.