Dr Ka Zawhna

Ha tawp ber na, dam hlei thei lo

Dr. Chawnglungmuana - Apr 14, 2021

Ka ha hi a nget/kua engmah a awm bawk si lo a, khawngaihin min pui teh. Engvang nge ni ang?

Zawhna: Ka pu, patling kum 51 mi ka ni a, tun lai hian ka ha tawp ber hi a rawn na vak zel a, nachhawkna ka ei hian a reh ve mai a, a ni hnihna velah hian rawn nat leh hi a ching a, a na a chhuah chuan a na thei khawp mai. Ka ha hi a nget/kua engmah a awm bawk si lo a, khawngaihin min pui teh. Engvang nge ni ang? Tunlai hri vangin damdawi in kal a rem chang si lo nen, ka mangang khawp mai.

Chhanna: I zawhna hi ha doctor Dental Surgeon zawt ta la an chhang tha thei zawk ngei che chuan ka ring. Civil Hospital-ah hian kan Dental Surgeon thiam tak tak an awm a, tunlai hri leng vang hian telephonic consultation lam zawngin damlote’n doctor an rawn nasa a, chutiang chu i chhawr tangkai theih ngei ka beisei. Engpawhnise, a nget/kua a awm lo  i tih hi engtin nge i hriat chian? I ha chu engtin nge i check le aw? Ha nget emaw, kua emaw awm hre thei tur chuan hmanrua, darthlalangte invuah ka chhunga rawlh luh a, eng tha tak hnuaiah en chian a ngai a. Mahni phei chuan hriat a har khawp ang. Hapui pathumte phei chu hmuh a har zual phian zel. Ha na hi a chhan hrang hrang a awm thei a, a nget/kua awm kher lovah pawh a to dan dik lo te, ha karah eng emaw tang vang te, hahni lama fel lo awm vang te a ni thei. Amaherawhchu, sawi tak angin a chhan hre tur leh, enkawlna dik dawng tur chuan Dental Surgeon ngei chu i inentir a tul khawp mai a, fimkhur tak chungin a inentir theih tih i hre dawn nia.

Share now