Khatia Mizoten StarTV kan en lai, 90s laihàwl vêla “Titanic” Jack-a làr hmaa “Speed” Jack-a làr lai khán, Keanu Reeves leh Sandra Bulluck te chan dunna “Speed ” kha hmuhnawm ka’n va’n ti thìn tak! Tûn tuma kan sawi tùr hi, kha film-a a changtupa “Jack”-a, a hnua “The Matrix”-a “Neo”-a lo ni leh te leh, “John Wick”-a te pawh lo ni chho ta zêl Keanu Reeves-a chanchin ngaihnawm a tling.

Keanu Reeves hi kum 2020-a The New York Times-in kum zabi 21 chhúnga lemchan khawvêla mi ropui a thlan chhuah zíngah palina a ni pha a; kum 2022-a Time magazine-in khawvêla mi thil ti thei (most influential people in the world) 100 a puan zíngah a tel pha bawk.

Lemchan lama hming a chherna hi Keanu Reeves kan hriatna ber a ni maithei; mahse, rimawi leh thu ziah lamah pawh a duai lo hle. A band “Dogstar” nèn studio album pahnih an siam tawh, tih te leh, comic book ziak­tu a ni tihte pawh hre tel ila.

Ni e, lemchan khawvêla Keanu Reeves-a hlawhtlinna leh ropuina chu khawvêlin a hria e; mahse, a lang lo lam—puan zàr phèna harsatna leh manganna a tawh zozai te, mi dangte tána a nun leh a sum sénga a luan chhuah nasat dànte hi a ngaihnawm a. Reporter pakhat phei chuan, ‘Kum 30 chhúng ngawt khawngaihnaa khat leh a tûl anga mi inthlâk danglam thei—mipa nihna dik tak lantírtu model a ni,’ tiin a sawi hial. Mi dangte nèna khawsa ho tùra siam mihringte hian, Pu Reeves-a nun atang hian zir tùr tam tak kan nei ngei ang; chûng chu zir chhuah i tum mawlh teh ang u.

Hnawh chhuah tâwk mawlh mawlhtu

Film hit tak tak a chan atanga US dollar vbch. 3 chuang hlawh chhuak tawh, Canadian actor, Keanu Charles Reeves hi kum 1964, September 2-a Beirut, Lebanon-a piang niin Toronto, Canada-a sei lian a ni a. Kum 17 mi a nih laia High sikul atanga “hnawh chhuah hlen” a tawh hma khán, high sikul dang pali ngawtin an lo hnawt chhuak tawh a! Chumi hma daih, a naupan lai—kum thum mi chauh a nih laiin a pa, Samuel Reeves chuan a nu leh a farnute nèn a lo tuithlàr daih tawh bawk!

Thian tha ber chántu

October 31, 1993 a ni a, Reeves chu “Speed” changa a buai lai tak a ni. Kum 1986-a “The Mosquito Coast” a chanpui hnua a thian tha ber, unaupa ang chiaha a en, River Phoenix chu Los Angeles nightclub pakhat páwna morphine leh cocaine overdose-a a thih thu hriattír a ni a. River-a thih thu chuan a tháwng ngang mai—a tliak hnâwp a ni ber e!

‘Ka tán chuan chànna nasa ber a ni ang! Ka ngai a, vawiin thleng hian ka la ngai tak zet a ni,’ tiin River Phoenix-a thih atanga kum tam tak liam hnuah Reeves chuan interview-naah a sawi chhuak. Kum 1991-a “My Own Private Idaho” an chan dun atangin an inkawm nasa lehzual a. He film an chan hma, kum 1990 khán, River hi a chanpui tùr a ni tih a hriatin Reeves hi a phür ngang mai a. Los Angeles atanga km 10,300-a hla, New Orleans-a awm River hmu tùr hian, bike ngatin a zin vang vang peih a ni!

Hmangaih berte chántu

Kum 1998 a ni a. Hollywood director lâr David Lynch chuan Keanu Reeves-te band, “Dogstar” ho pualin party a siam a. He band-ah hian Reeves hi bassist a ni. Hemi tum hian Lynch-a assistant, entertainment industry-a hnuhma nei nual tawh Jennifer Syme pawh party-naah chuan a tel ve a. An pahnih chuan an intawng ta a. An inkawm dàn chu “a satliah” lo a ni ang; a “ril” zui riau a ni ang. An inkawp fuh fú. An inhmangaih zui ta ngawt a! A hnu lawkah Jennifer chu a ruak ta lo bawk a!

Nghâkhlel taka an fa hmasa ber tùr an nghah lai, neih a hun hmaa thla khat a la awm laiin, Jennifer-i chuan a nau pai chu a chêt ngai loh avànga a ngaih that loh thu a sawi a. Ultrasound-a an han en nâk chuan a nau pai chu a pum chhúngah a lo thi reng tawh chu lo niin! Chu chu, kum 1999 Krismas urlâwk ní tak kha a ni. An fanu thar, a hming atána “Ava Archer Syme-Reeves” tih an lo sak sâ chu Jennifer-i chuan a hring a—mahse, thi sa-in a ni a hrin ni!

Ava thihna hi kum 34 mi Keanu Reeves leh kum 28 mi Jennifer Syme te chuan an tuar thiam lo hle a. Ava an chànna chu an hring nuna an thil tawn hrehawm ber a nih thu Jennifer-i nu, Maria St. John chuan a sawi. Hei hian an inkár nun pawh nasa takin a nghawng a—a chhe záwng lehnghâlin! A hnu lawkah an inthen phah ta hial a. Inthen e, ti lo chuan an inbe chhe hran chuang lo a. Kawng hrang hrangin an la intanpui tawn reng a, inbiak an bànsan ngawt lo a; a hnu lawkah an insawi rem leh ta nge nge a nih kha!

Kum hnih a liam a, 2001 April ni 2 zíng lam a ni. Hlawhtling taka a film chan “The Matrix” chhunzawmna tùr, “The Matrix Reloaded” chang tùrin Reeves pawh San Francisco lamah a awm diam tawh. Jennifer-i paw’n a tûka San Francisco-a kal ve a tum thu a sawi nghe nghe. Mahse, an tum angin thil a kal ta hauh lo mai! Ava nu, a hmangaih hmasak ber leh a rilrua thi thei lo, Jennifer Syme chu car accident-a a thih thu Jennifer-i nu chuan phone-in Reeves chu a rawn hrilh ta mai a nih chu! Chu thu chu, “Aprill fool la ni se, dâwt ni ngei se,” Reeves chuan a ti ngawt ang le!

Jennifer-i chu April Fool zàna Los Angeles-a rocker Marilyn Mason-a ina an party zo, in lam pana a häw, car-a che suala thi a ni. Jeep-a a inkhalh häw chu a motor thunun zo loin Cahuenga Boulevard-a car hùnnaa car pathum inhúng chu a su bur mai a. Seat belt a hrèn loh avàngin car atang chuan a invawrh chhuak a; a hmunah a thi nghâl a ni. Jennifer-i motor-ah hian daktawr chawh depression damdawi an hmu nghe nghe. Jennifer thih dàn en diktute hnênah Reeves chuan an pahniha an inkawp leh tawh thu hi a sawi chhuak a. Party hma ní pawha San Francisco-a tûkthuan an ei dun thu pawh a hrilh a ni.

Hmangaih ber kuang zàwntu!

April ni 6, Zirtàwpniah The Good Shepherd Church, Beverly Hills-ah Jennifer Syme chu an vui a. Hetah hian Reeves-a bâkah an thian tha, Mari­lyn Manson, Red Hot Chili Pepper member, Dave Navarro te leh leh Anthrax guitarist, Scott Ian te pawh an tel a; Jennifer-i kuang zàwntuah an tang zui nghe nghe a ni.

Jennifer Syme ruang chu an fanu, Ava thlàn kiangah an zalh a. A fanu la sún tàwp thei lo Keanu Reeves chu—a sùn leh tùr, a hmangaih Jennifer Syme-i kuang zàwntuah a tang ta ngawt mai a nih chu!

Keanu Reeves chuan a fanu leh a bialnu chu a sún tak zet a. A nun phung leh khawsak phung a buai nuai a. Mipui hmaa a inlan duh loh chu sawi loh, páwn pawh a chhuak meuh lo. Hmeichhia leh ngaihzáwng tih lam phei chu a ngaihsak lo zui vang vang a. Kum riat a liam hnu, 2009-ah, artist leh lehkhabu ziaktu, Alexandra Grant nèn an inngaizáwng leh chauh a ni. Grant nèn hian lehkhabu pahnih an ziak dùn tawh nghe nghe.

Mi thil phal Keanu

Mangannna leh lungngaihnaten a nunah ro rèl fo mah se, Keanu Reeves hian a farnu Kim Reeves, thisen cancer avànga natna khuma mu reng chu a enkawl reng a. A unau dangte aia a hmangaih bîk leh a thian tha Kim tán mai ni lo, amah enkawltute leh amah anga natna tuar mékte tán, a neih leh a theih insènso a inhuam tak zet thìn. 

Kum 1996-ah Keanu Reeves Foundation a din a. Hrisèlna leh zirna lama hmasàwnna tùr atán te, retheihna  ûm bo a nih theih nán te, fahrah enkawltu páwl te leh ramngaw leh nungcha humhalhtute tána din a ni.

‘Sum khâwl teuh hi ka tán chuan eng tihna vak mah a ni lo. Nun hi hlim taka hman ka duh a ni. Ka bank account-a sum a pun theihna tùr lamin ka rilru a uai rit ang tih hi ka hlau thìn. Ka theih anga tam ka thawk chhuak a, ka pe chhuak leh a, kei chu mäwlmang takin ka khawsa a, hotel atang paw’n suitcase ruakin ka hàw fo. Hrisèlna hi thil dang zawng zawng aiin a pawimawh a ni,’ titu Keanu Reeves hian mi dang tán luan chhuah hi thupuiah a nei a. A insèsona zawng zawng pawh a namén lo. Hriat sèn pawh a ni lo—ama’n puan ve dum dum duh hek lo! 

A farnu Kim anga cancer veite tanpui nán hian sum a theh chhuak hnem thìn hle. A luan chhuahna hi hriat theih chinah ringawt pawh: • 2008-ah dollar mtd. 50 cancer research, children’s hospitals leh arts programs-ah a sem ral a; • 2010-ah dollar mtd. 31.5 chu cancer research tih nán a thawh leh a; tin, “The Matrix” trilogy-a special effects leh costume design team-te tán dollar mtd. 50 million a pe bawk. Chu mai chu a ni lo a, he film-a “stunts man” zawng zawng hnênah Harley Davidsons motorcycle a pe vek bawk. ‘Nuam zawkin “devil ride” an nei thei tawh ang!’ a ti sam êt! • 2014-a mi dang tána a luan chhuahna zawng zawng chu dollar mtd. 70 chuang nia report a ni. • 2020-ah dollar mtd. 100 chuang charity leh cancer veite tanpui nán a thawh leh bawk.

Kum 1997 kuma paparazzi pakhat thlalâksak pawh a làr hluai kha! Kawtthlër pakhata in leh lo nei lo, kutdawh vâkvai pa pakhat a thut chilh lai thlalâk kha. Reeves chuan ngun takin a kàwm mial mial a, tûkthuan leisakin a eipui a nih kha!

Kum 2005-a “The Lake House” film an chan laiin tum khat chu, an thawmhnaw buaipuitu (wardrobe assistants) nu pahnih tìtî a ngaithla (ru) a. Pakhat zâwk chuan dollar mtd. 20 a pêk loh chuan a in a chàn tùr thu mit tui tla pùr chungin a sawi a. Chu nu hriat loh chuan a bank account-ah Keanu chuan a sum mamawh ang chu a thunsak tawp mai a ni!

Hollywood mi lâr dangte (keini lam mi lärte pawh!?) ang lo takin, vawiin thleng hian Keanu Reeves hian subway leh public transport (bus, taxi adt.) a la hmang reng a; zahah a la ve ngai lo! A film chan thenkhat atanga a hlawh—za-a 90 hial te pawh—an film siam leh tùra actor rawih nán film siamtute hnênah a pe lêt leh fo nia!

Harsatnain a tlàwm zawh loh Reeves hian, hring nun kawng bumboh tak a zawh thin chu amah chher hriamtuah a hmang hlauh a. Mi dangte tána a insènsona te leh a thil tha tihte hi, mi dang hriat kher tül a ti ngai lo. Mahse, a thatzia temtute hian, mi dang hriat­tír ve zêl an duh leh thìn a, keini lam lam paw’n kan lo hriat phah ve ta zêl a nih hi! A nunah lungngaihna leh tahnate thleng fo mah se, mi dangte hring nunah erawh thil tha thleng mawlh mawlh se a duh ngawih ngawih thung a ni.