Kum tam tak chhung zing atanga tlai thlengin mi harsatna hlir ka ngaithla tawh. Ngaihzawng then chungchang atanga tualthah thubuai thlengin ka ngaithla a. An pasalte chhuak tam lutuk nu lunglengte leh pasal ten ngaihzawng an neih san nu mangangte ka hmu a. KTP hruaitu ruihtheih thil tiru mangang leh rawngbawltu-in pawngsual a tum nula mangang thlengin ka kawm a. HIV +ve rilru hah leh pawisa tam lutuk ba nu mangang, a batnate’n a fate ho zawng zawng nena thaha an vau tawhte thlengin an lo kal. Harsatna tawk thei vek kan ni. Kan harsatnate hi inang lo hlawm teh mah se a tuartu tan chuan rilru hahna tham vek, rit tak mai, hmachhawn harsa tak an ni vek hlawm. Harsatna i tawk maw? Harsatna kan dawnsawn danin kan hmachhawn dan tur a hril a nia. Heti zawng hian ngaihtuah chhin ang che. Mi tinin harsatna an nei vek. Harsatna tawk lo tumah an awm bik lo. Kei chauh emaw tih hian a na bik. A tuar nasa ber nih a har khawp. Mi tawrh nen khaikhin ila, kan lo la ziaawm ber zawmah thin. Tu harsatna nen emaw inthlengpui tur zawng ngat ila, kan duh kher lo mai thei. Harsatnate hian tawp chin an nei thin. Chatuan daih harsatna hi a vang khawp. Hunin a tihdanglam theih leh a thawi dam ngaite an ni fo. Nghah ngam a ngai. Heti chatuan tur emaw tiha thihsan daih tum a tul hmanhmawh lo. Harsatna hian a tha zawnga nghawng a nei thei thin. Inzir peih tan a ni. Hlawhtling tur chuan hlawhchhamna atanga inzir a ngai thin. Tuna i harsatna tawh mek atang hian zir chhuah tur i nei ngei ang. I thil tawn mek hi i nuna zirlai pawimawh, ‘bung thar’ pakhat a ni tih pawm la, zir chhuah tum ta zawk che. Harsatna hian mihring a thlak danglam thei. Harsatnain a siam that mihring an tam tawh. Harsatna an tawh avanga hmasawn ta hlauh an awm. ‘Kan thihpui loh chu min tichaktu a ni zui fo.’ Harsatna i tawh hma aiin i tawh hnuah i chak sawt dawn a nih chu! Harsatna kan hmachhawn dan leh kan nun kan nghawngtir dan chu kan duhthlanna a ni. Thuneihna kan neih lohna thil hi a tam. Khaw lum leh khaw vawh chungchangah thu kan nei lo, kan inthuam dan erawh kan thu a ni. Harsatna hi kan tidanglam thei lo a nih pawhin kan lo dawnsawn dan rilru erawh kan thu a ni. Harsatna hi a chhe zawng leh tha zawnga hmachhawn theih a ni. KTP hruaitu sawn paiin min rawn bia a, Kan titi hrep hnuah, “I duhthlanna a ni e,” kan inti a, a hnu lawka nau titla ta lova mualphopui ta zawk, hlim taka an inneih tak thu min rawn hrilh laia a hlim takzia te kha! A fanu nau pai tihtlaktir a, inchhir lutuk rilru buai thih tum nu pakhat nen chuan an dinhmun a inthlau teh asin! Harsatna zawng zawng hi chinfel vek theih a ni lo. Mahse, awmze nei leh tangkai zawka hmachhawn theih an ni vek. Thil zawng zawng hi kan tidanglam vek thei lo. “Chu chu mihring tan tih rual a ni lo va; Pathian nen erawh chuan engkim tih theih a ni” (Mathaia 19:26).