Ziaktu pakhat chuan "Mihringin beiseina a neih tawh loh chuan  atan  nunin awmzia a nei tawh lo a ni," a ti. Beiseina nei lo, hma thlir awmze nei lo nih hi a hlauhawmin a râpthlak a ni.   Chuvângin Beiseina nung nei turin i nun hisâp la, hmachhawp awmze nei turin ruahmanna siam ang che. Hmathlir nei lo nun chu nun tla bal, ral thumna a ni. A tan tuisik lemin kawng ro a su lova, chaw kaw puar ei chu a tan vâna rah ang a ni. 

Tunlai hian Mizo thalai zingah nun beidawng an tam sâwt hle. Ruih hlo ngawl vei, nun beidawng an tam hle. Zû leh sa lama tlan nasâ, hring nun awmze nei tawh lo an pung zel bawk. Khawvel nawm chenna lam pana tlan nasâ, nun khawngaihthlak an zi mur mur a, nuam tinreng tawla, nuam chen tum an lo pung zel bawk, beidawnna chu an chanpual a ni. 

Hna thawh tur nei lo, thawh tur awm chhun pawh thawk tha peih lo hmuh tur an kat nuk bawk! Heng ho hmabâk chu beidawnna khuma nilêng a mut a ni. 

Beidawnna ruam thûk tak a ta Beiseina tlânga lâwn tur chuan mahni chantâwka lungawi a ngai. Mahni inthunun a , mahni inhneh erawh a tul!

Thufing pakhat chuan, "Mihring hmêlma lian ber chu mahni a ni,” a ti. Mahni inhneh erawh theih loh tluk? 

Khawvela mifing ber leh thil tithei ber berte pawh hian an zir chhuah theih loh chu amah a MAHNI a ni.

Khawvel hneh tum, thil ti thei tak Khawvel Indopui 2-na hun laia khawvel chawk buaitu Adolf Hitler-a pawh khan amah a inhre chiang lo hle a, amah pawh a inhneh theih loh avangin mualpho takin a nun chu a tâwp tih kan hria. Hring nuna hma lam beiseina nung nei lo chu mitthi tluk a ni. Beiseina nei chungin zanah tui tak a mut tum ila, hlim takin beiseina nung nên kan tho leh ang.

Ram mipui rorelsaktu politiciante chuan  beiseina pêin an mite chu an hruai a. Sawrkara thuneitute pawhin mipuite beiseina an pe a. Hna an thawk a, ro an rêl a. Beiseina sang tak neiin mipuiten an hnungah an zui a, rawng an inbawl sak tawn thin a ni. 

Politician- ten politics an khelh dik loh thin avang leh,  anmahni tanghmâ chauh haia an mite chu an hruai thin avângin mipui an beidawng thin a nih hi! Mahni hmasial râna politcs khêlte chuan anmahni chauh an inngaihtuah a, mipui an tibeidawng thin

Mipui beiseina chu phum bo turin an vui liam thin a ni. A va râpthlak teh lul em! Chutiang avang chuan Sawrkar inthlâk a tul ta thin a ni.

Mipui beidawnga siam hi a hlauhawm ber a, mipui beiseina nung erawh khuaizû leh rangkachak aiin a hlu zawk a ni. MLA leh Minister ten tawngka chuahva thianghlimna kawng an zawh chuan an hma bâk chu beidawnna khura mipui luhtir a ni a. He beidawnna khura mi a luh tawh chuan chhuah leh hi a har tawh êm êm a, ramin a chhiatpui thin a ni. 

Kohhran mipui beiseina chu Kohhran Upate leh Pastorte hnenah a awm. Heng Berâmpute an hnen atang hian mipuite chuan thlarau chaw leh thlarau rah hmuh an beisei mek a ni. Kohhran enkawltu, nun inthlahdah hi Kohhranin an ngai thei thak lo! Kohhran ho beiseina sang tak leh nung tak pe tur chuan  hmangaih­na belh chian dawl, kawng eng­kima rintlak an nih a ngai! Upa thatchhia chuan kohhran a chawm nung zo lo! A beramte mamawh pe tur chuan Pastor chu rinawmin a taima tur a ni a! Kohhran Upate leh Pastor te laka mipui an beidawn  chuan a sawh khawk chu Kohhran tlûk chhiat a ni. Hetiang dinhmuna kan din loh nan beiseina beidawng inhlui lo turin kan infuih a nih hi!

Ram hruaitute laka ram mipui an beidawn chuan tu nge ding chhuak ang? Kohhran hruai­tu (Upa leh Pastor) te laka  kohhran mite an beidawn chuan chung Kohhran chu a tlu lovang em ni?

Khawtlang hruaitute laka khaw chhung mite an beidawn chuan tunge ding chhuak ang?

Beiseina beidawng nei suh la, Beiseina nung neiin i hun hmang tha rawh, tiin kan inchah a nih hi!