Dr Ka Zawhna

Heart Attack

Dr. Chawnglungmuana - Apr 19, 2014

Heart Attack

Tunhmaa kan hriat tam loh tak, mahse khawvel hmasawnna in a rawn ken tel zinga an ngaih, natna common tak, thihna thlen fotu hi tun tum chu in bel chiang teh ang. Kan tawng chuan "Lung Na" tih baka han sawi dan a awm vak lova, saptawng chuan "Heart Attack" tiin hriat lar a ni a, medical term tak chuan "Myocardial Infarction" an ti bawk. He natna hi lung (heart) banga tihrawl supply tu thisen zam engemaw ber a in block avanga lung function tha lo, buai leh lungphu chawl thut te thlen tu a ni. Mihring kan in an loh avangin a lan chhuah dan a in ang lo fo bawk. He harsatna hi a lo thlen chuan lung a phu buai a, thisen a pump chhuak tha thei lova, BP a lo tlahniam a, enkawl thuai loh chuan thihna thlen mai thei a ni. A tam zawkah chuan awm vei lam na, ban vei lam zawh phei, thawk harsa, leh BP hniam vanga chau thut, nikhaw hre mumal lo chhunzawm ang te in a intan fo a. Marphu te pawh a buai vangin an hmu lo fo bawk. A natna zawn tak hi a in ang lo fo a, a thenah chuan pumpui ulcer/lawng (gastritis) na ang maiin thinhnun zawnah te a na a, hnung zang lamah a rawn na chhuak fo bawk. Thenkhat thung chu na em em awm mang lo pawhin an nei thei a ni. Kum upa lam natna deuh nia ngaih thin a ni a, mahse mihringin hna kan thawk nasa tial tial a, stress a lo sang a, kum naupang tak tak (35-40 years) vela nei ta mai te pawh an awm ta fo mai. A lan chhuah dan a in an loh fo avang hian tutenge he natna vei hma thei dinhmuna ding te hi hriat a tha. Mei zu nasa, hnathawk nasa, ei leh in leh zan mut hunbi nei mumal lo, thau lam (overweight), kum 50 chung lam te hian an nei duh zual. Taksa ah thau a tam chuan thisen zam bang a chhah hma a, chu chuan block emaw thisen khar tha lo siamin lung supply tu thisen zam te hi a block thei a ni. Chutiang avang chuan kum 40 chung lamah hi chuan annual check up neih thin hi a tha hle a, thisen test ah pawh Hemogram, Blood sugar, Liver/Kidney Function test, Lipid Profile, Chest X Ray, ECG leh Echo te hi tih theih nise a tha hle. A invenna atan chuan thau lutuk loh, chumi atan chuan regular taka exercise lak te, ei leh in lam fimkhur, thil mawm leh sa ei tam loh te, hnathawk nasa nih pawhin chawlh hun mumal tak insiam te, zan mut that te a pawimawh hle a ni. BP sang leh zunthlum nei te hi an derthawng bik a, chuvangin BP leh sugar check regular te a pawimawh hle bawk.
Share now