Khatia siamtuin mipa mamawh a hriatsak avanga hmeichhia a siam zui tak laia Adama muhil lo harh hlim vel lai kha han mitthla zui ta mai mai ila. Zawn ruk nei hmu si lo, rilru hnual leh beidawng ang reng taka a muthilh tak hnu khan a hriat lohin thil tam tak a lo thleng hman kha a ni a.

Zi mar uan uan chunga a thangharh hlim thil hmuh khan thawhphan nei hauh loin a tiharh chiang ngawt hian ka ring! A bulah chuan nikhua a hriat tirh atanga a la hmuh ngai hauh loh, a tisa ang pu mi, a ruh ang ruh nei, sam sei hniang mai, zak hauh lo leh inkhuh mawi tum hauh lo hmeichhe saruak ngal ngat, laibu sep kang det deta lo thaw dat dat, mak ti hmel taka a tho phang ham bui bui lai lo nuih ver ver maitu kha a’n hmu thut mai dawn kha a nia! A duh a hmu a ni ang, a zawn ruk kha a hmu ta a ni ngei ang! Hlim em emin, “Hei zet chu!” tiin lungawi takin a rum ta nghat nghat a nih kha!

He laia Adama’n “Hei zet chu!” a’n ti hluai mai hi, mihlim lungawiin an duh zawng tak an hre fuh a, insum thei lek lo leh zah pawh dawn lova an ‘Haleluiah!’ thawt thawt mai nen hian ka tehkhin deuh ber! Mipain hmeichhia a mamawhna hi a sang em a, a mamawh a hmuh hian ‘halelui’ pek tuar tuarna thamte pawh a ni ve bawk ang chu!

Rawngbawltu mihlim tlangval senior nupui neih niah inneih thutiam chham zawhah a changtupa a ‘halelui’ piapna inneih inkhawmah ka tel fuh tawh a! Inkhawm banah fiamthu thawh nan an hmang sap sap naa, a thikawm khawp zawkin ka hre tlat! Adama nupui hmu hlim “Haleluiah! Hei zet chuh!” tih nen khan a inhlat lo tlat a ni! A lawmpuiawm a, a hlimawm a, mipui pawh min tihlim!

Nupui pasal kan neih ni hian, “Hei zet chu!” tia hlim taka ‘halelui’ tur hi kan niin ka hre tlat! Mahni kawppui awm mi nen, thihna chauh lo chuan min then lo tura hmangaiha rawngbawlsak tura thutiam chung a, a nuamah pawh, a hrehawmah pawh, dam leh tlang khatah, thih leh ruam khatah tia hringnun buaithlak tawn dun tura hmangaihna suihtak ngei maia kan han insuih hnap maite hi chu a ropui em! kan intiampui han intiampui hnap mai hi chu hlimawm tur reng a ni!

Inneihna siamtu Pathian duh dan zawm famkim thlap chunga chhungkuain lungrual taka kan buaitsaih inneihna hi chu a tu ve ve tan pawh hian, “hei zet chu! “ tia halelui pekna tlak khawpa thil hlu leh ropui, hlimpui em em tur hi a ni reng a. Mahse inneih nia hlim hauh lo hi zuk awm thin si a! Inneih hnua hlim zui hauh lo hi zuk awm bawk pek a!

Tu emaw nawr luih avang te, hun khirhin a nan avanga loh theih loha innei ta mai maite hian hlim takin “Halleluiah! Hei zet chu!” an ti thei thin lo. Inneih zana tap, kum thum hnu pawha la tap bang chuang lote zuk awm a! Hlim tak leh lungawi taka kan neih theih loh turte nen hi chuan thutiam hlauhawm hi taim mai mai loh tur asin maw le!

Mahse, an duh thu reng a ni lo chawk! Thenkhat hi chu nu leh pa nawr luihte an ni pek alawm! Nupui pasal tur hi innawr luih chi pawh a ni lo. Inneihna hi a ril lutuk a, a hlu lutuk a, chatuan hawlh thil a nih avangin lungsi zanin, lungdam zanin, a innei tur ten hlim tak leh tifuh inti zeta, ‘Hei zet chu’ an intih tawnna ngei hi ni se a tha ber! An hlimpui ngei tur an neih hi a fuh ber reng a ni. Nu leh pa thenkhatin fate hmangaihna chhuanlamin, a tha ber duhsak inti a, hmangaihna leh a innei turte thinlung aia thil dang dah san an nei thin hian nupa tam tak chu a tirum fo mai nia!

Nupui pasal nei turte pawhin ngaihtuahna sen uluk a ngai khawp. Saruaka kan awmpui theih rem chang hmasa apiang leh kan tisa chakna tichhuak nazawng um nghal u tut mai hi a finthlak fo loh a nia. Kan ‘kawppui awm mi’ tih hi ngaihtuah chian a ngai. “Sex hmang dun thei,” tihna a ni mawl ngawt lo tih hi hriat tur a ni. Kawng engkima kawppui awm mi thlang thiam chuan hlim takin, “Hei zet hi chu!” an ti chatuan thin a nia.

Inhmuh tirh leh inneih nia hlim taka, “Hei zet chu,” kan tih dan aw ki leh khuareia kan ‘hei zet chu’ aw ki hi a inang lo thei fo a ni awm lehnghal e! “Hei zet chu ka tihfuh loh a nih hi.. hei zet hi chu a lo rapthlak em a ni.. hei zet chu kan chhungkaw chawkbuaitu a nih tak hi.. hei zet hi chu a lo heti dawn tih hre ngat ila chu.. ka nu leh pa thu kha lo ngaichang ila chu kan heti lo tur,” tia mangang hnuhnawh ka hmu hnem viau!

Nupui pasala i neih tur kha, “Hei zet chu!” tia sit hauh lo leh iai hauh loa i hlimpui chatuan theih tur a ni tak tak em? I nu leh pa ten an duhpui loh che kha ‘hmangaihna’ nia i hriat chhuanlam khan nei zui ta zel la, golden jubili lawm ni thlengin, “Hei zet hi chu ka tifuh a nia” tiin hlim takin, mi dang it hauh loin i la hlimpui zel thei tak tak ang maw?