Zawhna: Aizawl tlak lam veng pakhatah sawn inti-Doctor ve tak; mahse, MBBS ni si lo, China-ah kum 5 chhung han zir vea insawi, khawl hmanga natna hre thei inti a awm a. A khawl hmang chuan mi kutphah vei lam chu an chhun a; tichuan, an natna a sawi ta thin a ni. Sawi dik a mual mual pawh a nei a ni awm e. Tin, a damdawi chawh thin hi a to hle thin bawk. Hengho hi rin tak tak tlak an ni em? Engtia hmachhawn chi nge?

Chhanna: Medical Science hi thil namai lo tak mai a ni a. Inzai (surgery) te, damdawi hmanga enkawlna pekte, an natna hriat chhuah nana investigation hrang hrang (pathology, microbiology, biochemistry bakah, radiodiagnosis – X-Ray, Ultrasound, CT Scan leh MRI) te hi a zira zir tak meuh meuh ngai a ni. Chutiang avang chuan zirna hmun institution-tepawh a pawimawh em em a ni. Specialized line-ah phei chuan kum thum chuang kha mi subject bik an zir hrang leh a, Super Specialist-ah ngat phei chuan Post Graduate an zawh hnuah kum thum dang an zir bing leh a ngai a ni.

Chuvang chuan damlo enkawl kawngah te, an natna hre chhuak tura investigation te ti thei tur hian India ram sorkarin a pawmpui degree nei chauhten an ti thei a. India pawmpui loh degree neih hi a hlauhawmna tam tak a awm reng a ni. Tin, khawlpakhat hmanga natna zawng zawng hriat theihna hi a awm lo hrim hrim a, inbumna chi khat a ni ber. Chutiang baka damdawi kan hman tlanglawn, a bik takin Allopathic Drugs te an chawh a, an lo enkawl ve a nih phei chuan sorkar phal loh a ni a, a hlauhawm hle.

Chuvangin, hetiang mi hi kan hriat a nih chuan an degree hi check hmasa ber tur a ni a. Khawi institute atanga zir nge an nih a, chu institute chu India ram sorkar hriatpui leh pawmpui a ni em tihte hriat hmasak a tha ber. Tin, khawl hmanga natna tam tak hriat chhuahte phei chu thil theih loh angah ngai ila a him ber a ni. Chutiang khawl tha chu awm tak tak ni se chuan keini Medical Doctor-te hi a hmang hmasa ber ber leh hmang rim ber kan ni hial ang.