Zawhna: Ka pu, Hepatitis B natna hi khawngaih in min hrilhfiah thei ang em? A dam leh thei em? Engtia inenkawl tur nge, a damdawi te min hrilh thei ang em? Engtia in kai darh theih nge a nih? Min hrilh theih chuan ka lawm ngawt ang. Chhanna: Hepatitis kan tih hian thin vung emaw hrik avanga infection ani thei a. Chumi awmzia chu hrik infection vang lo pawhin a awm thei tihna a ni. Hrik vanga hepatitis hi chi hrang hrang a awm a, chung zingah chuan Hepatitis B leh C hi a hlauhawm zual chu a ni. Hepatitis B leh C hi a inkai chhawn dan a inang viau a, mi thiamte sawi danah chuan HIV ai pawhin kai an awl zawk a, Hep B hi Hep C aiin kai a awl zawk bawk niin an sawi. Hepatitis B (HBV tiin kan sawi ang) hi virus hrik avanga thin (liver) infection a ni a. A inkaichhawn dan pawh thisen leh taksa tuihnang atangin a ni. Chumi anih vang chuan HIV ang bawkin syringe leh hmanraw hriam thianghlim atang te, invenna tel lova sex hman atang te, tattoo ziah atang te leh bengverha atang tein an kai nasa viau bawk. Hmul mehna leh toothbrush inhman tawmte pawhin an inkaidarh duh viau a, nuin a naupai laiah a hrin laiin a kai thei bawk. HBV hi kai tirh ah a tam zawk chuan an hre lo va, insawiselna pawh an nei hran lo. An nei a nih pawhin pum nuam lo, khawsik er er, ruh chuktuah na them thum, chawi ei tui/chak lo, kawthalo, chauh ngawih ngawih ang tein an awm thei. Mitliam (jaundice) hi nei tura ngaih an nih laiin an nei vek chuang lo thung. Chutiang chu a sarhu (Acute Hepatitis) an ti a, thisen test Liver Function ah engemaw danglamna a awm fo a, confirm tur erawh chuan HBV test tih a ngai. Acute Hepatitis hi a rei lova, insawiselna dang nei lo an nih chuan a tam ber (90%) chu taksain a hrik hi a paih fai ve mai bawk. Chutih rual erawh chuan an kai tawh a nih erawh chuan engmah insawiselna nei lo mah se mi dang an kai thei reng a ni. Thin lam tha lo nei sa, zu in nasa angah te chuan thin a khawih chhe hma zual a, chubakah kum naupang (kum 6 hnuai lam a bikin) phei chu Chronic infection an tih, a natna benvawn an vei chhunzawm duh viau. Chutiangah chuan thin function a buai a, thin sawng (cirrhosis) te an nei chhunzawm a, a thenah phei chuan thin cancer te a thlen thei bawk a ni. A enkawl danah chuan a damdawi bik a awm hran lo va, a natna lan chhuah dan azirin enkawlna an pe mai thin (symptomatic treatment). Chronic infection an neih erawh chuan Interferon leh damdawi dang hmanga enkawl an ngai thung. HBV hi vaccine hmangin a ven theih a, damlo enkawl lama thawkte phei chu he vaccine hi lak ngei ngei nise a him ber. A vaccine man a to loh avang hian mipui nawlpui pawhin lak nise a darh tur ven kawngah a tangkai hle a ni.