Tùnlai Mizo hla chhuak thar hi hre ngai lo tluk ka ni. Ka tuipui pha meuh tawh lo a, ka ûksak vak hlawm tawh lo. Mahse, he hla—Sam 139:14 innghah nána hmanga Benjamin Colney hla phuah, Jerry nèna an sak, ‘Mak Tak leh Hlauhawm Taka Duan’ hi eng ti tihin emaw ni YouTube-a an tih chhuah hlim khán ka hmet chhuak palh a, ka music tuipui záwng a’n ni lo khawp a! Mahse, a mak khawp—ka beng a verh tlat mai a. Ka Bible cháng duh tak an rawn cháng thlan vàng ni maw, ka ngaithla tluan parh a. Ka ngaihthlâk zawh rualin hêng thute hi ka rilruah a rawn lût nghâl—‘Nung a awm a ni!’ tih leh ‘He hla hi Pathianin a la hmang khawp ang,’ tihte hi.

Thlír thuak ang: Mizo thalaiten kan mamawh êm êm, fakna hla ti pét pét lo deuh, thalaite rilru chawk tho thei, a huhoa sak theih, chham (rap) pah theih ni tho bawk si, a tùl pawha han zuanpui tawr tawr theih hla lo piang hian min ti lãwm hle mai a, ka rin ang chiahin thalai zíngah a tla ná a. A! |halaiah mai a ni lo, nu leh pa, kum lama upa deuh leh hlim sáng chena tuipui pawh ka hre nual mai. Thil chiang chu: he hla hian ‘nung’ a pai a ni.

Mizo Idol Jerry Lalrinawma (Jerry Elaro) leh Ben-a te hi he hlaah hian an inkawp fuh hle-in ka hria. Jerry-a hian a âw a ti ném deuh niin Bena hian sawi mah se, a sáng laia Jerry-a aw-bàl-ráng-mawi tak ang kha a rawn lang leh thìn a, a zai thiamna a bo chuang lo ni loin a mawi zual zâwk emaw’n chu aw, tih tùr a ni.

Tin, a music video (MV) thlìr a nuam a, an target thalai rilru chawk tho thei tùrin an siam niin a hriat a. Bena hian tùnlai Pathian thu hril thìn chantíra Pathian neitu nih nawmzia lantír a tum thu a sawi a, a tumah a hlawhtling hle-in ka hria.

Buaina Kárah Recording: Hla record tùr leh music video (MV) buatsaih an tum lai hian hnual rawihna tham buaina leh harsatna an tâwk a. Sual-in tih chhuah a thîk sâ hle a ni ang! Bena hi recording ti tùr leh MV siam tùra Siaha atanga Aizawl a rawn phei hnu lawkah Covid-19 vàngin lockdown puan a ni a; a hnuah home quarantine a tâwk leh. July 2021 chhúng ngawt khân tum hnih lai home quarantine a tâwk hman a.

Hla record tùra an inpeih vek hnu, recording an tih dáwn ní chiahin Jerry-a a accident leh hlauh! A bán leh a dàr pawh a hliam na hle. A’n dam fel a, recording ti tùra an inpeih leh hnuah an record-na tùr RP-a pa a boral leh tlat mai! An tum ang chuan an awm lo kher mai. A hnuah Tawia studio, Kings & Prophets-ah an record thei ta chauh a ni.

Ka Hlu Asin!: Cháng khatnaah Siamtu kut chhuak, zíng ni chhuak êng mawi leh zàn thla êng mawinain bul an rawn tan a. Chûng aia Ama anpuia siam kan nihna leh kan hlutzia an rawn chham/sa zui a…

A ni asin, zíng ni chhuak êng mawi tak te, hreh zet ni àwm taka tlai lama khaw thlang lama mawi fahrana liam leh ruai ruai thinte ai hian kan mawi zâwk a. Zàn boruak thiang kûk maia vàn boruak zau tak mai te khi han thlír ila, a ropuizia khi aw … arsi de sep sep zozaite khi! Mi thiamte chuan en lenna chhuak thar zêlah arsi awm zât lah chu an chhiar belh zêl a. Van thengreng (universe)-ah khian thlasik kawng (galaxy–JF) tld. 200 awmin an hria a; galaxy khatah khian arsi tld. 100 chuang awmin an hre bawk a nih chu! Chûng zawng zawng Siamtu chuan, chûng zawng zawng ai chuan, ‘I hlu daih zâwk!’ min ti a; Ama anpuia a siam, a thisena a tlan ngat kha kan ni tlat a…

Ruihhlo sim hleithei lo; chhúngte paw’n an rin ngam tawh loh; thenawm khawvéngte leh khawtláng paw’n biak chu sawi loh, a melh pawh an melh that peih tawh loh keini hi, hêng thil siam mak leh ropui rapthlâk lutuk zawng zawng ai hian, min Siamtu mitah chuan ka hlu fé zâwk a, ka mawi daih zâwk a lo nih chu! He hla-in a sawi ang hian, ‘a kut chhuakin bél vawtu lung a dum ang’ hi kan ni tlat! Heti hian ka’n sawi nawn leh te’ng: Painter-in mawi êm êmin lem a ziak a. Chu a lem ziah chuan a lung a ti awiin a ti hlim hliah hliah a, miten hmu ve thuai thuai se, te pawh a ti ang … chutiang aia nasa chuan min Dintu mitah hian kan mawi zâwk a lo ni!

Ei rûk sim hleithei lo, ngaihzàwn miah loh tùr hmuh fàl thulh ngai lo emaw tleirãwl thianghlimna tihchhiatsak chíng—‘virgin killer’ tia hming lem an puttír hial emaw pawh lo ni tawh mah ila, mi rèl hobby-a neih tlat—thlen chin apiang ‘rél station’-a chantír zêl thìn pawh ni mah ila, ka nu pum chhúnga ka awm laia min khuh tlattu mitah hian ka mawi tho tho a ni!  

Mihring taksa ropui rapthlâkzia te hi aw… mak tak a ni! Kan taksaa timûr (cell) awm zâtte hi tiauvut zâtin a tam rapthlâk a! Mihring pakhat taksaah hian timûr tlûklehdingãwn hlîr sing thum zu awm a! Kan taksaah hian hriatna thazám (nerves) trillion 7 a awm bawk. Nung dama nau te rawn piang chhuak hian a taksaah thazám (neurons) tld. 100 chuang ngawt a rawn pian chhuahpui pang nghâl niin an chhût bawk a nih chu!

Chutiang rêng rênga mak tak leh hlauhawm taka duan mihringte hian, a hriatna thazám hmangtea amah Dina a Siamtu hi fak lawm lawm tùr chu a ni maw le! Fak chu sawi loh a han hre tha duh lo vêl a, a’n hawisan vêl a! |henkhat lahin, ‘Pathian a awm lo!’ an la ti tak deuh deuh a! Kan va han bo chhah tak!

Mahse, he hla siamtu hi chuan, ‘I mita mawi, i mita hlu/ I thinlunga duan ka ni si; / Mi zahawm leh i hmangaih, Van rohlu ber pek ka ni e; / A kut chhuakin bél vawtu lung a dum ang hi ka lo ni si, / Mak tak leh hlauhawm taka duan ka lo ni si’ a ti thung a. Mi tin sak tùr hla a phuah chhuak a ni.

Nun hlui a thlír lo!: Cháng hnihna hi he hla ziaktu, kum 10 chhúng ruihhloin a bâwih tawh, vawiina Pathian rawngbáwltu ni ta Benjamin Colney inpuanna ti pawhin a sawi theih àwm e. Hei hi mi tam takin kan tâwmpui ngeiin ka ring. Hlimna leh lungawinate hi hausakna leh sum leh pai hmanga neih theih emaw tia chutianga a teh apiangin lungngaiin a tap thìn. Tin, a nun hlui, chhui tlâk awm lo khân a rawn vaw lêt fo bawk a, ‘mi dangte tána hlutna nei loa dam sen ve satliah’ angah a inngai fo. Mahse, Isua lam ena a hnung a zui hnu chuan mi te, thenawm te, kohhrana rawngbáwltute leh khawtláng hruaitute anga chhui chhui ve ngai lotu, mite ang loa amah duh tlattu Isua hlutzia a hmu chiang a, ama tawngkam takin, ‘Pathian hian ka nun hlui kha eng atán mah a ti lo,’ tiin, ‘Keia nun hlui, chhui tlak nei lo hi/ Tu tan hian nge maw hlutna nei ang le?/ Tiin ka dáwn, ka lungngai, ka tap thin/ Mahse, min chhui min chhui lotu,/ Mite ang loa min duha min zui rengtu/ Isu, i hlu e,’ a ti thei ta a ni.

He hla hmang hian Pathianin mi tam tak thinlungah thu a lo sawi tawh a, a sawi mék a, a sawi zêl bawk ang tih ka ring tlat a ni.