Khawtuala inkaichhawng kan han hriat chiah khan kan chiai nasa viau vek mai.

Khawiah pawh ‘positive’ awm ta thut se, tu chin tan nge hlauhawm ve le? Heti hian lo inchik ve la.

• High risk-te chu: Damlo natna lan chhuah hma ni 2 atanga an dam loh hnu ni 14 chhunga:

1. Kut lawnga damlo lo khawihte

2. Kut lawnga damlo chil, hnap, khak, zun leh ek lo khawihte

3. Damlo ei leh inna hmanrua lo khawiha siltu, puan leh thawmhnaw lo khawiha sutute

4. Damlo chenpui te

5. Invenna tel loa damlo bul meter khat vela lo awm hnai vete

6. Inhnaih taka damlo nena lo zin ho, meter khat aia hnaia lo thu hote

• Low risk: Damlo awm laia pindan (ward, opd, classroom etc)-a lo awm ve satliah, damlo hnaih ve lo, khawih ve lo leh meter khat aia hlaa lo zin ho vete

Khitiang zingah khian i tel ve a nih chuan, thuneituten rawn ngaihven lo che mah se, mahni in-report thuai tur a ni. Inzep chi a ni lo.

Risk pawh nei lo, damlo pawh hmu pha lo thleng thlenga lo phili ve chung a tul lem lo ve.

Min buaipuitu LTF te leh thawktute fimkhurna leh inpekna hi zah em em tur a ni. An lakah zêp neih loh tur. Thil chiang awm hmaa tutute emaw lo inkhung rih tura an tih hi sawisel loh tur. An chian hunah an chhuah leh mai zel hi.

• Hlauhawm lutuk lote:

1. Quarantine centre-a ni 21 awm tling tla tawh, test negative, daktawrin a chhuah ngam tawhte (thingtlanga haw turten an haw theih hmain thlenna an hnawng an ti!)

2. Damdawi ina thawk, covid19 kai nena inhnaih ve hauh lote

3. Damlo awm laia awm hnai ve lo, damdawi in khawi lai emaw lo va tlawh ve zawktute

4. Fimkhur famkim chunga Covid19 enkawltu, an inenkawlna hmuna awm char char, daktawrin haw thei tawha a ngaihte

5. Fimkhurna tinreng nena sample latute

6. Fimkhurna tinreng nena Covid19 dona kawnga thawktute

7. Fimkhur tak chunga tul pawipang chi hrang hrang thawktute

8. Covid19 risk nei ve, an test negative-te

9. Covid19 kai ngei, an chhuah hmaa PCR vawi hnih negative, daktawrin a chhuah ngam tawhte

• Hlauhawm ber zawk chu:

Covid19 kai tih hriat chian hi chu kan hlauh vek avangin an hlauhawm nep tawh zawk! Covid19 kai tih hriat loh, test pawh la ni ve hauh lo, inpel sung sung mai, thu khawm tuau tuau mai, innek tulh tulh maite hi kan hlauhawm ber zawk!

Covid19 kai an awma kan hlau em em si. An laka kan fimkhur thar leh ang chiah hian mi tin lakah, englai pawhin fimkhur ila, khawiah emaw tuin emaw a kai tih kan hriat leh thut pawhin kan chiai nep deuh tawh ang chu!