Ni 4.6.2014 zan khan FM Zoawi-ah live phone programme ah ka han thu ve a. Phone a that loh avangin SMS in zawhna an rawn zawt thung a. “Ka chhung ten min hrethiam lo..ka pasalin ka rilru a tihah..ka chhungte vangin ka hlim thei lo..ka bialnu/bialpa nen kan inthen a, ka hlim thei tawh lo..Thih daih ka duh..intihhlum ka chak..etc” tih vel a rawn thleng hnem khawp mai. Zephyr Mapuia nen kan thu dun a. Titi ang rengin Depression chungchang te, Anxiety chungchang te kan sawi a. SMS a zawhnate chu chhangin kan han in ral fuih nawk nawk kha a ni a. Mizo zingah thih daih chak, mahni nunna hial lak duh khawpa nun hlim lo kan lo tam awm hle mai tihte ka ngaihtuah a.   Mi dang awm dan te, an tawng dan te, an tawng loh dan te, an khawsak dan te , an mizia te hi mi tam tak hlim loh chhan leh thinrim chhan a ni. Thinrim leh hlim lohna chhan tur pawh a ni ve reng a. Inngaihsak tawn te, inbiak lum lam te, inzahtawn te, inngaihpawimawhte hi intihhlim tawn nan a tul reng a. Mahse, heti zawng hian ngaihtuah lawk teh ang. I hlimna tur hi mi dang kutah nghat suh. Mi awm dan vel ringawta i hlim leh hlim loh hi a innghah chuan i buai fo ang. Khawvelah hian i thu lohna, i thu phak lohna, awmzia i neih lohna a tam khawp mai. Zing ni chhuak turah thuneihna i nei lo. Khaw dur nisat thuah awmzia i nei lo. Miin an biak lum lam dan che chu an thu thu a ni ve bawk. I thu neih miah lohnaa i lo hah ve viau hi a tul lem lo. I tih theih chin hre mai la. Vawiinah ruah sur lo turin i ti thei lo. Mahse, nihliap i khum thei alawm! Tu emaw awm dan velah innghat lo la. Miin an ngaihsak leh ngaihsak loh che emawah i hlim leh hlim loh nghat suh. I nun a hlim loh chuan che tam rawh. Inngaihtuah rilru hah hman lo turin i nun hmang tangkai hlauh la. Phut let nei loin, (nangma hlim nan liau liau, mahni hmasial takin) mi dang tan malsawmna ni rawh. I hlimna turin i hun hmang ve la. I hlimna turin i ngaihtuahna siam dik rawh. Thil thlen dan azirin insiam rem ve zel la. Mi rilru i control thei lo, mi nungchang i control vek seng lo. I rilru erawh i thuhnuaia mi a ni a, i nungchang pawh i thuhnuaia mi bawk. Ngaihtuah dan hlimawm zawk a awm. Nu pakhat chuan fanu hrisel lo deuh a nei a. Vanduai bik a inti em em pek a! Nupa tam tak fa nei thei lo tam zia te, nupui pasal pawh hmu zo lo te, mitdel, bengngawng leh piangsual tamziate hi ngaihtuah se vanduai bik a inti kher lo ang. Hlim tur hian ngaihtuah dan dik neih a tul. I neih loh lam aiin i la neih lam ngaihtuah thin ang che. Harrold Abbot-a pindan bangah chuan, “Kal kawnga ke bul ka tawh hma chuan, pheikhawk bun tur ka neih loh avangin ka lungngai thin,” – tih hi a intar. Chhiar nawn la, a awmzia ngaihtuah zau vak vak teh. I hlim leh hlim loh hi i mawhphurhna a ni e. I ngaihtuahna han kuai her hlek la, i vanduaina aiin malsawmna i dawnte hi a la tam fe zawk tih ngaihtuah la, hlim ve mai mai teh!