HMANGAIHNA NENA BUL TAN Chutichuan heng pathum, rinna te, beiseina te, hmangaihnate hi a awm reng ang; tin, hengahte hian a ropui ber chu hmangaihna hi a ni. – I Korinth 13 : 13 ---------------- Kum thar duhawm tak kan lo thleng ta a. Kum a lo thar hian calendar a thar a ni satliah mai lova, nun thar kan hman theihna turin Pathianin hun thar min pe tihna a ni zawk. Kan upa ta sawt tihna a ni satliah ngawt lova, ka fing leh zual dawn tihna a ni. Kum a tam hian kan fin belh zel tur a ni si a. Hmeichhe thenkhatin an kum an zep thin a. An thil thlir dan dik tawk loh vang a ni mai thei. Upat hi zahpui chi a ni lo, zahawmna a keng tel tih hriat zawk tur a ni. Kum lo thar hian zahawmna thar min siamsak theihna turin rilru thar nen i inbuatsaih ang aw. Thil pathum awm reng tur zinga a ropui ber ‘hmangaihna’ ropuizia leh a thiltihtheihna hmu thei turin Pathianin hun thar min pe a nih hi. Upa sawt mah ila, hmangaihna ka neih si loh chuan engmah a ni lo. Fin hmelin zahawm hmel fu mah ila, hmangaihna ka neih si loh chuan engmah a ni chuang lo ang. Hmangaihna hlutna hre tur chuan nunpui a ngai. Chu chu kan zavaia mamawh, chhungkua, ram leh hnam siam thatna tur pawha a tangkai ber chu a ni si a. He kum thar hi hmangaihna nena bulk an tan thar lehna lo ni se a va nuam dawn em! Chhungkaw inhmangaih tharna kum lo ni se la. Pawn lam leh mi dang tana tangkai, taima leh hmangaihna ngah tak nia lang, mahni chhungte ngaihsak si lo chu Pathian thu chuan, “Ring lo mite aiin an sual zawk” a ti tawp mai a nia. Kan nu leh pa, kan nupui pasal leh fate, kan u leh naute hmangaih zual in tum teh ang. Kan thiante hmangaih thar kum lo ni se. Pathian thu bu vek hian, “Miin a thian tana a nun a hlan aia hmangaihna nasa zawk a awm lo” a ti asin. Thian nia inchhal ve si, enthlatu leh tihsual changtu, demna zawnga an dik lohna haia khertu hi an awm fo. Thian an ni ngai lo. Kan iner te, kan inrel te, chhiatna tawh denchhena kan indiriam zui mai thin hi i sim ang u. Kan ngaihzawngte hmangaih zual sauh kum lo ni se. Mahse Pathian atanga chhuak hmangaihnain ni rawh se. Hmangaihna chuan a dawhthei a, ngil a nei bawk thin. Duh lo chung a sual lui tung tung ngai lo va, insum theihna a nei a, a hun a nghak hram hram thin. Kan ram leh hnam hi i hmangaih thar ang u. Hei lo hi Pathianin ram min pe lova. Mizo ni turin min siam ta sa sa, i Mizo tuk mai teh ang. Kan veng leh khawtlang hmasawnna leh hmingthatna te hi kan kutah theuh hian a awm a. Mizoram hian hmangaihtu dik a mamawh e. Hnam timualphotu ni lova tihmingthatu nih tum hi hmangaihtu dik rilru putdan tur a ni. A tihmingthatu kan tling zo lo a nih pawhin a hnawksak leh tihmingchhetu nih loh tal hi hmangihtu dik rilru chu a ni ve bawk. Kan hmel hriat ngai lohte, kan chunga thil tisualtute leh kan hmelmate lam pawh Pathian chuan hmangaih turin min ti. Mi hnuaihnung te, mi a te, mi sualte pawh hian hmangaihna chu an hre thiam thin. Insawisel kan ching. Kan indim lo khawp lehnghal. ‘Insiam thatna hmanrua alawm’ tiin tan kan khawh a. Sawisel haw lo turin kan infuih leh hlauh. Hmangaihna hian engkim a hneh thei zawk. Mi a siam tha a, mi a tidanglam thin. Nikum aia tangkai zawk, nikum aia hmasawn zawk, nikum aia fing zawk, nikum aia ngaihawm zawk, nikum aia duhawm zawk, nikum aia zahawm zawk kan nih theih nan hmangaihna tam zawk nen bul i tan leh teh ang u.