Kum 16 ka nihin matric ka pass a, chuta tang chuan khawpuiah lehkha zirin ka awm ta vang vang a. Pathian zarah M.A. te pass-in, khaw dang daihah sawrkar hna ka thawk a. Nupui fanau neiin mahni pualin in leh lote ka han din ve a. Tling lo tak chungin chhungkaw pa ka ni ve ta der mai.

Matric ka pass hnu khan Krismas leh exam chawlh karlakah kan khuaah ka hawng thin a. Chutianga ka hawn thin bak chu mumal takin chhungkua kan chengho leh ta mang lo. U leh naute’n hmun dangah lehkha an lo zir ve phei chuan chawlhte a lo inrual lo a, kan inhmu khât tial tial a, kan chengho khât tial tial mai. Dam chuan chhungkua hi kan lo chengho rei lo hle mai a! Matric ka pass hma kum 16 chhung kha mumal taka nu leh pate nen chhungkuaa kan chenho chu a ni ta deuh der mai. Kan naupang ber nen hian kum 7-in kan inthlau a, ani nen chuan kum 9 awrh chauh nu leh pa thlazar hnuaiah chhungkua angin kan chengho a nih chu.

Mihring dam chhung hi a rei loh tehlul nen, chhungkuaa kan chenho chhung phei chu a rei lo lehzual a nih chu. Chhungkua hi kan chenho chhung reilo teah hi chuan inngeih dial dial tur kan ni mang e. Mi thiamte chuan. ‘chhungkua hi sikul hmasaber a ni’ an lo ti thin a. Chhungkaw kima kan khawsak laia kan ze chher chhuah hi kan puitlin thlengin kan thlah tawh mang lo. Chuvangin, chhungkuaa kan khawsak tlanho dial dial lai hi naupang mizia leh an nungchang chher nan pawha hun rangkachak a ni bawk. Chhungkuaa kan khawsak chhung rei lote hi inhauh nan leh innghirngho nan ringawt chuan a pamhmai lulai deuh a ni. Nupa kan inhauh a, kan innghirngho fo hian pawisawi lo naupangin an tuar a, an rilru a chiai a, an puitlin thlengin mahni inrintawkna an neih loh phah fo thin. Chhungkaw hlim lo kara sei lian naupang chuan rilru khawharna an nei fo a, an nih tur ang an ni pha lo fo thin.

Kan fate’n min thlakhleh hiam hiam hun, min ngaihsan em em hun, min mamawh ngawih ngawih hun hi rin ai hian a rei lo asin. Ka fapa upa zawk hi kum 6 a tling ve ta. Ina ka hawn hian a nau hi chuan min lo lawm hiam hiam a, ka inthlak chhung pawh nghak hman loin min bawh nghal chuk chuk thin. A u erawh hi chuan a tetlai ang khan min uksak vak ta mang lo. Ngai em emin han kuahin, han pawm mah ila, a tal thla zung zung tawh mai a ni. Pawna pawm chhuah phei chu a duh tawh teuh lo, a zak tlat tawh.

Chuvangin, kan fate’n min mamawh hun, min thlahhlelh ngawih ngawih lai hi chuan an tan hun pe tam ila, chetzia leh tawngkamin kan hmangaihzia i tilang fo thin ang u. An tetlai, an rilru thianghlim laia kan inngainattir a, kan inthlakhlelhtir hi a tul ngawih ngawih a ni. Kan fate’n min mamawh em em laia thil dang kan ngaih pawimawh zawk fo chuan min mamawh vak loh hun hi a thleng thuai mai a ni.

Kan thianpa thusawi hi ka hre chhuak leh fo thin. A tia lawm, “Ka pa chuan ka tet lai zawng khan duat taka min pawm emaw, min kuah ka hre ngai lo. Min len chhuahpui pawh ka hre ngai lo. Ka zirlai min ngaihven pui lo a, exam-naa ka tih that emaw, ka tihchhiat emaw pawh a hre ngai lo. Ka lian tial tial a, kan inpawh lo tial tial a, kan inbe khât tial tial a, kan innel lo tial tial bawk. Tun hnu, ka puitlin hnu, nupui fanau ka neih hnu pawh hian ka pa nen chauha kan awm dun chuan sawi tur kan hre ngai lo. Kan inpawh thei tawh lo,” a ti tawp mai a ni. An tet laia fate ngaihsak loh chuan nghawng a nei thui mang e.

Kan fate hi an tisa mamawh, silh leh fen, ei leh in ngaihtuahsak ringawt hi nu leh pa mawhphurhna a ni lo asin. An rilru, an thlarau thanlenna thleng hian nu leh pa mawh a ni thui mang e. Nu ber ka ni tih vangemaw, pa ber ka ni tih vang emawa chhungkaw hlimna boruak vawchhe vek khawpa an phiar phiar maite hi kan tih loh tawp tur a va ni em! Nupa pawh hi tak run reng lo ila. A chang chuan fate hmuhah hian han infiam ila, han inchhaih ila, inchhungdungahte hian han inum kawi deuh zur zur ila, kan fate hian nuam an lo ti em em a, an tha a lo muang thin.

Kan fate hian an lo than len a, nupui pasal an neih thleng pawha chhungkaw nun an rawn ngaihtuah let chang apianga an rawn ngaih thar fo tur, an rawn thlakhlelh thar fo tur chhungkaw hlim kan din ak hi a tul mang e.

‘Aw chhung kim lai ka ngai mang e,

Kan run in chhung ka ngai mang e,

Aw, chun leh zua,

Aw, chun leh zua’ rawn ti fo teh se.
Tun kar hun hman nuam vek u le.