Madhya Pradesh hi India rama state pachhe pawl leh loneitu rethei tamna a ni a. Nikum pawh khan khawkheng avangin loneituten harsatna namen lo an tawk a, loneitu mahni intihlum tam state zingah pathumna an nih phah a, kumin pawh hian sikul naupang 27 lai an exam kaihhnawih thil avanga mahni intihlum an awm tawh a. Taksa mamawh chaw tha ei pha lo tamna a nih bakah nausen thi leh raicheh tamna a ni bawk a. Dan bawhchhiatna leh pawikhawihna a pung nasa a, ram pum huapa chhutin hmeichhe chunga hleilenna leh pawngsual hluarna a ni leh zel bawk. Hetiang hi Madhya Pradesh dinhmun a nih mek laiin July thla laihawl khan an cabinet meeting chuan department thar, 'Anand Vibhag’ (Department of Happiness) din a rel a. India rama a hmasa ber tur he department thar hian khua leh tuite hlimna tur leh lungawina tur a ngaihtuah anga, chumi atan chuan ruahmanna a siam anga, hma a la bawk dawn a ni. Chief minister Shivraj Singh Chouhan ngaihtuah chhuah ni a sawi department of happiness hi a tobul chu Bhutan lam daih a ni thung. Mihring nuai sarih chuang awrh chenna Bhutan hi India thenawm ram zinga te ber leh rethei ber pawl a ni a. Mahse, sum leh pai, sumdawnna leh thilsiam chhuah lam zawnga tehin rethei viau angin an lang naa ram hausa ber berte aiin an khawsak a nuam a, an zalen a, an lungawi a, mipui nun a hlim tlat si a ni. A chhan chu an sorkar (lal nei an ni a) leh mipuiin sum leh nawmsakna thil aiin nun hlimna an ngaih pawimawh zawk vang a ni. Hman atanga mithiamten ram hmasawnna (Development) tehfung pawimawh taka an hman chu sum leh pai dinhmun a ni, kum tina ramin sum a thawhchhuah/lak luh (Gross National Product/Gross Domestic Product) a pung a nih chuan hma an sawn tihna a ni. Kan politician-te pawh hian kan state sum thawh chhuah/lak luh a pun thu hmai uang takin an sawi fo thin hi. Mahse, sum leh pai hmanga hmasawnna teh hi a dik meuh em? Hringnun a thil hlu ber ber - hlimna, thlamuanna, hmangaihna, lungawina, damna te hi pawisaa lei theih a ni si lo a. Khawvela ram hausa ber ber U.S.A leh Europe ram hrang hrangte khu ram ralmuang lo ber ber an ni mek a nih hi. Ramin sum a lak luh pung zel hi mi tlemte chauhin an hlawkpui thei a, mi tam tak tawrhna a thlen thei bawk. Entirnan, kan ramah hian lirthei a pung chak hle a, lirthei leh a kaihhnawih thil chi hrang hranga sumdawnna leh eizawnna hian state sum thawhchhuah/lak luh (GSDP) a tipung viau a. Mahse, langsar lo lamah hian nasa takin harsatna a siam a, boruak a bawlhhlawh phah a, hriselna lam pawh a nghawng a, traffic jam avangin hun hlu tak kan chan nasa a, sawi tur a tam ang. Sorkar laipui atangin sum tam tak kumtin a lo lut a, chu chuan state sum lakluh (GSDP) tipung hluai mahse, hruaitute nawmsakna leh an eirukna leh ho lam tak taka a liam zel avangin mipui nawlpui a thleng pha thin lo a, ram hmasawnna pawh a nih turin a chak chuang lo thin. Bhutan lal Jigme Singye Wangchuck hian ram chhunga chengte hlimna hi thil dang aiin a ngai pawimawh zawk a. Kum 1972 khan lallukhum an khumtir hnu lawkah ram dinhmun tehfung atan 'Gross National Happiness' hman a nih tur thu hi a puang a. "Gross National Happiness hi Gross Domestic Product aiin a pawimawh zawk," a ti nghe nghe. 'Gross National Happiness' (GNH)innghahna ban pali an siam a - Ram hmasawnna leh mipui vantlang hmasawnna rualkhai taka thlentir; Hnam zia leh nunphung leh sakhuana vawn him a, chawilar; Nungcha, thing leh mau, tui leh leilung humhalh; Sorkar inrelbawlna tha te hi. Kum 2011 khan UN General Assembly-ah GNH chungchang hi ngaihtuah a ni a. Tichuan, a vawi khatna atan April 1, 2012 khan UN hnuaia peng pakhat United Nations Sustainable Development Solutions Network buatsaih 'World Happiness Report' chu tlangzarh a ni ta a, kumtin an buatsaih zui ta a ni. India dinhmun hi a chhuanawm lem loh thin khawp mai, kumina World Happiness report-ah pawh khan ram 157 zingah 118-na a ni a, ram thenawm - China (83), Pakistan (92) leh Bangladesh (110) te aiin a hniam zawk. Ram hrang hrang dinhmun tehna atan hian kum khat chhunga mimal sum lak luh chawhrual (GDP per capita) te, mihring dam rei zawng (Life expectancy) te, mamawh changa intanpui tawn dan - sorkar leh midang atanga puihna, chhawmdawlna, etc., dawn thin (Social support) te, zalen taka duh thlan theihna (freedom to make life choices) te hman a ni. Kum tina report tihchhuaha a lan dan chuan hnam hrisel ber berte hi hnam dam rei pawl an ni zel thin, hlim hi hriselna leh dam reina a lo ni. GNH tichhuaktu Bhutan hian mihring nun hlimna an dah sang hle a, chumi kawppui an ngaih pawimawh em em chu ‘Hmasawnna Tlo’ (Sustainable development) hi a ni. Hmasawnna tlo an ngaih pawimawh avangin hmasawnnain a ken tel thilsiamna leh sumdawnna te, khawsak tiawlsamtu khawl leh hmanraw changkang tak tak te ai chuan an ramngaw leh nungcha te an ngai pawimawh zawk a, nuamsa leh changkang taka khawsak ai chuan environment venhim an duh a, thilsiamna lian pui pui din a, boruak leh leilung leh tui tihbawlhhlawh ai chuan ramngaw humhalh a boruak thianghlim tak neih an duh zawk. An hnam zia vawn him an tum a, incheina leh thawmhnaw changkang leh nalh tak tak ai chuan an hnam thawmhnaw an inbel nasa. Khawthlang nun dan phungin an hnam zia a luahlan an phal lo a, an hnamzia an ngaisang a, an hnam thil an humhalh tha hle a ni. Mizoram dinhmun hi ngaihtuah ve leh ta ila. Mipui hi kan hlim em? Kan ram kalphungah hian kan lungawi em? Sorkarah rinna kan nghat ngam thin em? Tuna a lan dan chuan rorel lai party mi leh sa chauh hi sorkar kalphungah hian an lungawi emaw chu a tih theih. Kut hnathawkte leh eizawnna mumal nei lote khaichhuahna tur sum tam tak MIP leh NLUP ah sorkarin a seng ral tawh a, mahse, a hlawhtlinna hmuh tur a vang em em si. Thalaite leh nu leh pate zingah rilru hrisel lo leh hlim lo an tam hle a, nun beidawng intihlum an tam a, tharum thawhna leh pawikhawihna hrang hrang a hluar hle a, zu leh ruihhlo khuahkhirh that loh avangin khawpui nun a tawp hle a, tualthahna leh tualthihna a thleng fo a, chu chu mipui nun ralmuan lohzia entirna awm e. Eirukna leh hlemhletna, kuta man awm lem lo mahse, a hluar hle a, minister leh MLA nih hnu a hausa ta em em an tam hle a nih hi. Heng avang hian mipui an lungawi lo a, ram hruaitute sawisel ching, kalphunga lungawi lo an tam a. Heng zawng zawng ngaihtuah hian ram hruaitute pawh hian mipui hlimna leh lungawina leh hmasawnna tlo hi an thil tumah nei ve se a duhawm hle ang.