Chanchinbu leh Visual News lamah te an rawn puang tawh a. He clinic report pek pah ang deuh hian kan damlo en te atanga ngaihtuah zui ngai nia ka hriat te han thailan tel ka duh a, zawhna chhang lovin tun tum chu hemi chungchang hi kan ziak ange. Indian Medical Association (IMA), Mizoram State Branch, Mizoram Govt Doctor’s Association (MGDA) leh Indian Dental Association (IDA), Mizoram State Branch tangkawp chuan kan lo tih fo tawh angin March ni 16 khan Hnahlan, Champhai District ah Free Clinic kan buatsaih leh a.

Tun tumah hian Medicine (Chest Medicine leh Nephrology), Surgery, Pediatrics, Orthopedics, Gyne & Obs, Eye, ENT (Audiology tiamin), Skin leh Dental consultation, a vaiin inentir hi 2200 chuang an ni a. Hei bakah Investigation - Endoscopy leh Ultrasound te tih tel nghal a ni bawk a. Inentir te damdawi mamawh zawng zawng a thlawnin pek an ni bawk. Bialtu MLA Dr. Z.R.Thiamsanga, IMA member ni bawk chuan min tawiawm a, damdawi man thahnem tak a thawh bakah damlo engemaw zat a en bawk. Hnahlan bakah a chhehvel khua atangin thahnem tak an rawn inentir a, Myanmar lam khua kan unaute rawn inentir pawh engemaw zat an awm bawk.

Hetiang anga thingtlang khaw hla zawka free clinic buatsaih hi a chhimtute tan a hlu hle a. Damlohna avanga khawpui pan hi thil namai lo tak a ni. Sum leh pai a ngai tam a, thlenna tur ngaihtuah ngai nen mi tam zawk tan chuan damloh te hi thil huphurhawm tak a ni. Chutiang zawnga thlir chuan Health Care Scheme hi changtlung taka buatsaih theih a chakawm thin hle mai. Kan sorkar leh sorkar tawh te hian hei hi an ngaihtuah uluk tawk lo emawni a tih theih. Ka damlo en pa pakhat chuan thil dang lo neih eizawnna leh kawng tha, eng leh tui tha tih te hi chu kan la pal tlang naw naw thei a, damloh huna inentirna awlsam zawk tal hi chuan kan sorkar te hian min buatsaih sak thei se chu a bak hi chu kan palzam thei ang mawle a ti!

Aizawl leh kan khawpui dangah te pawh hian entirnan mai mai Ultrasound leh Endoscopy tih man ringawt pawh hi Rs.1000 chung a ni deuh zel a. Sorkar Hospital ah lah an indaih lo em em a, nghah rei a ngai thin si nen, loh theih lohin private an pan a ngai leh thin a. Thisen test neuh neuh nen phei chuan a tlem berah 3000-4000 hi chu insen a ngai lo thei lo. Chu mai ni lovin innghahna mumal neih loh phei chuan awmna ngaihtuah a lo ngai tel nen, khawchhung han chetvelna senso nen phei chuan cheng sing sen a awl khawp ang. Chutiang zat inenkawlna chu kan thingtlang unau tam tak tan hian a awl lo hle.

Farkawn, Tuipang, Zawlnuam, Sakawrdai, Darlawn, East Lungdar etc ah te hetiang clinic hi IMA/MGDA/IDA tangkawp hian kan lo buatsaih tawh thin a. Damlo natna khirh deuh deuh nei te kan en fo a, Aizawl lamah enkawl loh chuan tihdam har te a tam zawk an ni a. Mahse chhanna kan dawn fo chu “tunah khan damdawi min chawh mai rawh, khawpui kan pan thei chuang lo” tih hi a ni. A then lah an insawiselna lo rei tawh, khawpui pan theih loh vanga lo tuar, han enkawl dawn a lo tlai tawh, tihdam theih tawh loh te an ni thin. Rilru a hrehawm duh hle.

Hetiang hi kan ram awm dan a ni a. Kan sorkar hian Primary Health Center atang hian thuam tha se, doctor an indaih theih nan kumtin MSC/MPS etc an lak ang hian la ve ta se, tichuan kan ziaawm phah te ka ring a (ka ngaihdan mawl tak ani mai a). Natna a tir lama hriat chhuah hmaa enkawl dam theih tam tak hi kan enkawl hma thei ngei bawk ang. Chutiang an tih theih nan leh, khawpui pan ngai an nih pawha a senso tur te Health Care Scheme kaltlanga an tih theih chuan damlo serious tur tam tak hi kan enkawl dam hma thei ngei ang. Ka han belh duh chu kan mi hausa te pawh hian community service atan heng mi harsa inenkawl ngai te awm lailawkna tur in te hi han buatsaih thei se, a tangkai dawn mange!