Nu pakhat hian sangha lei a tum a, a zuartunuin a thar that thu a sawi mawlh mawlh lai chuan a keu theih lai lai a keu a, a hnim a hnim a, “A uih deuhin ka hria,” tiin a khal a khal fahran a. A zuartu nu chuan a ning ta deuh a, “Ka pi, nang pawh kha keu keuin hnim hnim che ila, uih deuh lai chu a awm ve tho ang,” a ti e an ti. Tumah hi tha famkim kan awm lo. Sual hlawm hlak pawh kan awm kher lo ang (Pathian tehna chu ka hre lo le!). Mi sual leh tenawm ber nia kan hriat ho pawh hian thatna eng emaw chu an nei vek ni awm tak a ni! Ruihhlo bawiha tang, nu leh pate rilru tihah em emtu, khawtlangin mi sual tawmkailo anga kan en, chhungkua leh ram tana hnawksak, thatna reng nei lo ni maia kan sawi tam takte hi ka kawm ka kawm a. Anmahniin tha an intihna, thatna an neih, an good quality nia an hriat ziak chhuak turin ka ti fo a. Mahni thatna ziah tur hre miah lo pakhat mah ka la hmu lo nia. “Ka zai thiam, lemziah ka thiam, ruk ka ru ve ngai lo, tumah kut ka la thlak lo, music ka thiam ve khawp mai, ka hur lo, ka nupui lakah ka rinawm..,” tihte leh thil dang dang eng emaw thatna riau hi zuk nei vek a! Chu mai a ni lo, rui ve ngai lo ho hi min lo ngaisang chuang bik vak lo. “Kei chu ka sual lang law law a, ka nihna ang hian ka lang mai a, khi nu khi, khi pa khi a rukin a chuti a khati, ka hre chiang ve em, lemchang khi ka ngaisang bik lo, min hmusit thei a ni bik lo,” te hi an ti ve zel maw le. Mi chhiatna lai hi inzawnsak ralah chuan hmuh tur a lo awm ve zel ni awm a ni. Mi sual leh hnawk nia kan hriat pawh hian anmahni vui ni chuan chanchin tha tak sawi tur an nei vek zel. An thatna kan sawi hun hi a tlai hret thin mai pawh a! Dam laia thatna insawisak leh infak hian thih hnua Pathian khawngaihna hmachhuan leh ngawt ai chuan vanram kawngka a kik rin tir zawk dawn nen maw! Mi tin hian ‘Dr Jekyll leh Mr. Hyde’ kan nei vek. Sual leh tha. A inlar langsar zawk zawk chu miin min hmuh dan a ni mai. Kan chhungril that rukna aiin kan pawn lam sual langsar hi miin an hmuh nghal mai thin chu a ni fo dawn. Chutihlai chuan a hmu duh hram tan Mr. Hyde-a phenah Dr. Jekyll a awm reng thung. “A rilru erawh hi chu a tha a nia,” kan tih hian an nungchang a tha lem lo tihna a ni nghal thei a, chanchin sawi chhawn dan duhthusam chu ni hauh lo mahse a ngaihnawm ka ti. Sual chauh hmu duh lo, sual phena tha awm inhmuhsak hram duh rilru tha titi a ni. Mi ropui leh chanchin ngaihnawm tak nei tuemaw chanchin sawi lai hian, “Mahse, a chuti ve tho asin,” lo ti hram duh kan awm thin. Tuemaw tawngkam an sawi lar tak, “Ka bawnghnute in thin sawi duh mang si loin ka zuin thin chauh an sawi mai,” a tih ang deuhin a mawi lo lam engemaw hi kan kher chhuak hram zel. Thatna inhmuhsak hian mi a tihlim a, mi a tihmasawn a, mi a chawikang thin. Thatna tam tak awm kara a tha lo chhete thur chhuah hram thin hian mi a tina a, hrilh a tihai a, thinlung a tikeh thei. Thatna nei mang lo pawh han fak hram hian a tiphur a, that zual tumin an tang sauh thei zawk. Tumah hi keu keu tlak kan awm lo. Hnim hnim kan dawl lo vek. Uih lai nei vek kan ni e. A uih tur laia rin inkeusak leh inhnim inhnim ai chuan kan thatna lai hi inhmuhsak ila, infuih tawn ila, a rimtui lai zel hi inhnim sak mai teh ang u! Chu chuan uih zual zel tur lo turin a veng him thei zawk ngai e.