Dr Ka Zawhna

Hnung zang na

Dr. Chawnglungmuana - Apr 19, 2021

Ka hnung hi a na thei lutuk a, ka ke leh kutte hi a mu chum chum thin a, eng nge a chhan ni ang?

Zawhna: Ka pu, hmeichhia kum 22 mi ka ni a, ka hnung hi a na thei lutuk a, ka ke leh kutte hi a mu chum chum thin a, eng nge a chhan ni ang? Doctor ka pan thin a, pum vanga hnung na a nih chu an ti mai thin a; mahse,  damdawi min chawhho ka ei pawn a la na reng tho a, ka dar phei vel leh ka nghawngah hian a na chho thin a, min puih theih chuan a lawmawm viau ang. 

Chhanna: I lo inentir tawh dan leh damdawi i eite chipchiar zawkin i sawi tel lo va. I harsatna rawn sawite han en hian a chhanni thei tur a awm nual ang. Engpawhnise, eng nge a chhan hriat hmasak a pawimawh dawn a, chumi tur chuan i khawsak phung, hna i thawh leh thawh loh, thawk lai i nih chuan eng hna nge tih te, zin nasa chi i ni em tih te, i thau nge i cher, zan meng rei chi i ni em, i mutna khumah eng ang chi nge i hman (dup lutuk Dunlop te a ni em tih te thlengin), pum lam insawiselna i neih tel avang hian zuk leh hmuam lam i ti ngai em, tiranga/shikhar te i ei thin em, sahdah i hmuam em, mei i zu em tih zawng zawngte hi hriat theih nise.

A hmaa doctor i lo inentir tawhnaah hian investigation eng emaw tal an chawh che em? Endoscopy, Ultrasound, X-Ray emaw CT Scan/MRI (hnungzangruh) te an chawh che em? Kut leh ke mu chum chum i tih hi thazam fel lohna, Peripheral Neuropathy a ni thei a, blood test lam te an chawh che em? Neuropathy hi vitamin B tlakchham vangin a awm duh khawp mai a, vitamin uluk taka chawh hian a dam hmak thei bawk. Nula i kum ang zatah hian thau hlauh luat vanga ei leh in insum vak an awm thin a, chu chuan Malnutrition kan tih mai a thlen thei a, neuropathy te hi an nei fo.

Pum na hi Gastritis (pumpui lawng) vangin nangni ang rualah hian an nei fo. Hmawmsawm ei nasat vangtein an nei duh hle. Chuvangin, endoscopy tih ngei chu a tul hmel. Tin, mit (gallbladder) a lung awm, Gallstone Disease vangin pum na leh hnungzang na hi a awm duh khawp mai a, chumi hre tur chuan Ultrasound tih a tul leh bawk ang. Hmeichhe lam fel lohna, a bikin hormones buai vangtein heng harsatnate pawh hi a awm ve thei a. Thyroid hormones lam dinhmun hriatte pawh a tul thei bawk.

Doctor kan inentir hian kan harsatna chungchangte hi uluk taka zawh fiah hi a pawimawh hle. Damlovin zawhna an neihte a kim thei anga lo chhansak hi doctor-te mawhphurhna a ni bawk. Kan inentir hma hian kan insawisel dan fel fai takin ziak chhuak ila, a hnua sawi theihnghilh neihte hi a pawi thei a, kan theihnghilh lai tak kha medical history a pawimawh lai a lo ni leh thei bawk a; chuvangin, chiang taka kan insawisel dan sawi chhuah thiam hi a pawimawh hle. Tin, vawi khat kan inentir a, damdawite min chawh hian kan ngeih nghal kher lo thei a, hun a duh deuhte pawh a ni thei. Chutiangah chuan doctor dang pan nghal mai lovin kan inentirna doctor bawk kha pan nawn leh thei ila, chumi hnua kanduhthu a la samtawk lo teanihleh second opinion lak nan doctor dang pan tepawh a pawilothei ang.

I insawiselna hi treatment ilakhnua la reh lo anihchuani doctor pan ngai bawk kha pan leh thei la; tichuan, hma i sawn loh dante hrilh hria la, a tul angin investigation-te pawh an chawh leh ngei zawk che ka beisei. Hlauhthawnawm natna eng emaw i neih a rinawm loh.