Zawhna: Ka pu, hmeichhia kum19 mi ka ni a, 2020 atang khan ka hnute dinglam chunglam ah hian bawk ang reng deuh hi a awm a, a na deuh reng mai a. A nat tak tak chang phei chuan dawm vawng vawng hi a ngai thin. Tun thlengin a na hi a la reh theilo a, hlauhawm ani thei ang em le?

Chhanna: Hnute bawk han tih hian bawk ni chiah lo, bawk anga feel theih si hi a awm ve thei a. Tin, bawk tak tak hi a awm chuan chi hrang hrang a awm ve leh bawk a. A pawimawh hmasa ber chu clinical assessment tih ani a. Chumi tur chuan Surgeon in an endik a pawimawh hle. A then chu an dap atangin a type a hriat nghal theih mai a, thenkhat erawhchu fine needle aspiration cytology (FNAC tia kan hriat, hip chhuah a exam) ngai te pawh a awm ve bawk.

I kum zat ngaihtuah chuan bawk hlauhawm anih a rinawm loh a. Tin, thenkhat chu thi neih nen te a inkungkaih thei bawk. Nangmahni kum rual ah chuan bawk chi khat, hlauhawm loh Fibroadenoma kan tih hi a common ber pawl chu a ni a. Thenkhat chu na nei miah lo an awm laiin thenkhat chu a rawn thang lian deuh a (a bikin thi an neih lai te in), a na ve thei bawk. A hlauhawm lova, thenkhat phei chu amahin a reh leh mai bawk. Engpawhnise, a hlauhawm loh a rinawm a, mahse Surgeon lo enchian tir ngei thei la a tha hle.