Aizawl: Nimin khan Kendriya Vidyalaya, Thuampui, Aizawlah Kendriya Vidyalaya Sangathan leh Navodaya Vidyalaya Samiti Principal conference neih a ni a, School Education & Literacy, Ministry of Human Resource Development Rina Ray, IAS chu khuallian a ni. Rina Ray hian school naupang, naupang nu leh pate leh zirtirtute a kawm a, KVS leh NVS Principal lo kal khawm te nen hun an hmang ho bawk. School naupangte chu hmasawn tum a tan la zel turin a fuih a, "Mahni tuina te zawng chhuak thiam a, kan tuinaah tak kan kal thiam hi a pawimawh hle a, kan zirlaiah phurna nasa tak min pe thei tu a ni,” a ti a, “Zirlai kan nih chhung hian harsatna hrang hrang kan hmachhawn thin a, chutiang hunah chuan kan hma hun a eng zawng a kan thlir thiam theih nan leh kan rilru kan hahchawlh tir theih nan nuam kan tih zawng leh kan tui zawng (hobby) enge maw tal kan neih hi a pawimawh hle a ni" a ti. Hindi tawng a pawimawh zia sawiin India khua leh tui kan nih anga Hindi tawng thiam kan tum hram hram hi a tul hle a ni, a ti bawk. Rina Ray hian KV Aizawl chu fang kualin classroom leh activity an neih hrang hrangte a enpui a, School thawktute kawm in an harsatnate a sawipui a, zirlai naupang ten zai leh hnam lam an entirna hun an hmang bawk. Mizoram ah KVS hi pali awmin chungte chu KV Aizawl, KV MZU, KV Lunglei leh KV Champhai te an ni. KV Aizawl hi 1983 a din niin tunah hian zirlai 983 an awm mek a, thawktu 43 in an enkawl a ni. KVS hi CBSE hnuai niin pawl 1 atanga pawl 12 thleng a awm a, HSSLC tan Science leh Arts zirtirna awmin 2017-18 khan HSLC leh HSSLC result-ah zaah za an lo pass tawh bawk a ni. &&&&&