Kum 2020 zet chu a va danglam tehreng ve le! Covid-19 hri leng hian kan nunphung, awm dan, tih dan phung, khawtlang leh kohhran inrelbawl dan thlengin min thlak danglamsak a ni ber e. Kan hriat theih china kan lo tih than tawhleh nun dan phung tam tak a sawi danglam a, hri leng liantham hmachhawn tura kan inbuatsaihna fel tawk lo leh chak lohna lai a rawn tilang a, chutih rualin kan khawtlang tanrualna pawimawhzia leh tangkai zia kan hmuh phah bawk. Kan vanneihna lai ni ber chu a kai a awlsam ang huin thihna a thlen tlem a, a kai tam berin insawiselna an nei meuh lo va, insawiselna liantham nei lovin an dam leh mai bawk hi a ni kan tithei awm e. Hei aia hri hlauhawm (virulent) ni ta se engtiang takin nge min nghawng nat ang tihte pawh rilruah a lang uaih uaih thei alawm.

Hri leng buaipui tham kan lo tawn tawh zingah Malaria, TB, HIV&AIDS, Scrub Typhus (rannung seh natna kan tih mai) te hi kan hriat tlangpui chu a ni mai awm e. Malaria hian nunna a la hnem khawp mai a; mahse, tun hnai chhoah hian kan hre khât ta deuh. A invenna lamah hmalakna a tha a, a enkawl kawngah pawh hma kan sawn vang a ni kan tithei ang. TB hi eng emaw lai kha chuan kan rapin kan tih hle thin a, hun a lo kal a, enkawl dam an lo tam chho zel a, kan rap nep ta deuh. Chutih rual erawh chuan TB damdawi pangngaiin a tihdam theih loh, Multi-Drug resistant TB (MDR-TB) te a lo awm chho leh mek a, kan la buaipui zel dawn niin a lang.

HIV & AIDS natna pawh hi a tirah kan rap hle kha a ni a; mahse, zirtirna a tha a, kan dawngsawng thiam chho ta viau niin a lang bawk. Mahse, vawiin thlengin he hri natna hi a tihdamna damdawi an la hmu chhuak lo va, ainvenna vaccine pawh an la hmu chhuak hek lo. Thihpui an tam tawh ngaih tuah chuan vawiin thlenga a invenna vaccine an la hmu chhuak thei tlat lote hi a mak phian mai. Covid-19 thlentu SARS-CoV-2 hrik laka invenna erawh kum a vei awrh a, an hmu chhuak leh mai bawk a. Hepatitis B leh C tepawh hi an thawm a zawi hle mai; mahse, inkai a awl phian lawi a. Hepatitis B vaccine tha tak a awm laiin vawiin thlengin Hepatitis C vaccine erawh a la awm lo leh thung tlat bawk.

Hri leng kan lo tawn tawh, kan tar lante nen han khaikhin chuan Covid-19 hian kan nunphung a tibuai nasa ber awm e. Film lamah hri leng rapthlak hmel tak tak, an chan chawpte kan lo hmu tawh thin a. A taka thleng ngei Ebola, SARS, MERS tihte pawh kan ram em a rawn thleng lo chungin news kaltlangin kan lo hre tawh bawk a. Khawvel pum huap hri leng ngeiin a taka min han luhchilh takah chuan kan khawvel hi a lo zim tawh hle a ni tih a chiang hle. Ka column-ah ka lo ziah tawh angin kan state tereuhte-ah hian khawi thingtlang khua kilkhawr deuhah eng hri leng danglam tak, kai darh awlsam tak mai hi leng palh ta se, reilo te-ah khawvel hmun dangah a darh thei a ni tih a chiang hle ta mai.

Engpawhnise, Covid-19 aia kai awlsam, thihna thlen rang hri lengte pawh a la rawn darh leh lo vang tih a sawi theih loh. Khawvel hmun hrang hrangah sumdawnna leh hnathawhna avang te, tourist angte pawhin kan zin chhuak nasa tawh a, hri tha lo hawn let leh thei kan ni reng tawh tih hi kan hriat a pawimawh hle. Chutiang avang chuan khawvel thil thleng ngaihven nachang kan hriat a pawimawh hle. Hriselna lam hawi zawnga inzirtirna kan ngaih pawimawh a tul tawlh tawlh dawn a, kan tihdan phung him tawk lo theite kan insiam rem thiam a pawimawh chho hle bawk ang. Tuna kan thil tawn hian zirlai tha tak min zirtir ngei se, khawtlang hriselna kawngah hmasawn kan mamawhna laite chhinchhiah ila, khawtlang/kohhran leh sorkar thawhhona pawimawhziate hi kan hriat reng a pawimawh hle ang.