Zawlnei Nehemia kha Juda te Babulon sala an tan laia Babulon rama piang a ni a, Babulon ramah a seilian a ni. Babulon ramah chuan lal no hlantu a ni thin a, chutiang hna pawimawh tak mai a thawh lai chuan an ram dinhmun chhiat zia te, an khawpui Jerusalem kulh chu a chim a, a kawngkhar te pawh a kang rem rum a nih tih a lo hria a, a rilru a na ta em em a, a tap a, chaw a nghei a, Pathian hnenah an ram tan a tawngtai ngat ngat mai a ni.  Nehemia hian Israel ram tlukchhiat chhanah hian mawhphurhna engmah a nei lo a, a pian hma daiha a pi leh pute bawhchhiatna zarzotu a ni mai zawk a ni. Chuti chung chuan Israel hnam tlukchhiat chhanah chuan mawhpuh tur dang zawng lovin “Kei leh ka pa chhungte kan lo sual ta si a” a ti mai a ni. Nehemia anga ram leh hnam veitu, ram leh hnam bawhchhiatna avanga lungngaia chaw nghei, chaw ei tui lo leh mut tui lo rawih thin ram hruaitu hi engzat tak awm ve ang i maw? 
 
An ram bawhchhiatna avanga Nehemia lungngaihna chu a hmelah pawh a lang chhuak a ni chek ang, Babulon lal chuan, “I damlo pawh a ni si lo a, engtizia nge lungngai hmel i put chu le?” tiin a zawt hial a ni. Nehemia chuan lal Artazerzia chu engkim a hrilh a, lal hnen atang chuan Jerusalem khawpui din thar leh phalna a la a, khawpui ram tawh dinthar leh tur chuan phur takin a pen chhuak ta a ni. Juda sal tang tam takin amah an zui a, “Hawh u, sawi chhiata kan awm tawh loh nan Jerusalem kulh chu i din leh ang u” a ti sauh sauh mai ni. Nehemia hian lal inah nuam sa taka khawsak a, a tui tha tha ei ai chuan Jerusalem tun din leh chu a thupui zawk a, an ram tana retheih leh pachhiat pawh a thlang zawk a ni.

Nehemia ho chuan Jerusalem khawpui chu an din thar leh ta a. Amaherawhchu, chu hna hautak tak an thawh lai chuan Sanbalata leh Tobia te chuan nasa takin an diriam a, an sawisel bawrh bawrh a, “An thil tih hi Lal chunga helna a ni’ te an ti a, Tobia phei chuan ‘Kulh chu han siam ang hmiang, sihal pawh han lawn se la an lung kulh chu a ti chim mai ang chu’ tiin a lo nuih sawh vel a ni. 

Amaherawhchu, sawichhiatna leh dodalna karah pawh Nehemia chuan hnathawh a thulh chuang lo. Thahnem ngai takin a thawk miah miah mai a ni. Ram tana thil tha tih tum si lo, thil tha tih tumtute kawng dal tawk vela chet la duh hi kan awm leh thin. Hetiang mi hi ram leh hnam hmelma, inkhawm ngai lo leh zu in thin te ai pawha ram leh hnam tana hnawksak zawk an ni. Ruling thil tih a nih chuan thil tha pawh nise sawisel tum ngar ngar mai, chutiang bawkin party dang thil tih chu a dik a dawk thlu loa dodal zel mai, mipui rilru hruai kawi nana dawt leh thudik chawhpawlh ching te hi ram hmasawnna daltu, ram leh hnam hmelma an ni.

Nehemia dodaltute chuan a hnathawh tih khaihlak tir an tum ngar ngar a, “Hawh teh, Ono khaw phaiah inhmu i la, i in be teh ang” tiin thu an chah thin a. Chuta Nehemia chhanna chu, “Hna ropui tak ka thawk a, ka lo chhuk thei lo” a ti hmiah mai. Nehemia hian a hnathawh leh a hnathawh chhan hi a chiang ngawt mai. Donalna, elrelna, itsikna leh sawichhiatna tam tak chu a ngaihven hman lo a, chhanletna hun pawh a nei lo a ni ber mai. A hnaah a tul em a, a buai em a, a tuichilh em a, amah sawichhetu te pawh a khinglet hman lo a ni zawk. Keini ramah chuan insawichhiatna thu kan inchhuah khum vak vak a, a khat tawkin PR kan siam a, press conference kan ko a, mahni kan in fak mawi chawp a, kan PR te hi mi dang sawichhiatnain a khat emaw tih mai tur a ni ta. Nehemia anga mi dang te sawisel hman lo khawpa hna tangkaia inhmang ral ram hruaitu hi nei ngat ila hma kan sawn chak hle ang.

Khawvel Indopui Pahnihna hun lai pawh Adolf Hitler-a khan Europe khawmual kha lak vek a tum a nih kha. Amah lo do let turin Kumpinu sawrkar pawh nasa takin a in buatsaih a. Khatih laia England ram Prime Minister chu Winston Churchill a ni a, an ram venghim tur khan a theihna leh remhriatna zawng zawng a hmang a ni. A chang chuan nikhatah darkar 18 zet hna a a thawk thin an tih chu maw le! Chutih laiin German ral an lo lian tual tual mai bawk si, ram hruaitu lu ber tan chuan lungngaih thlak tak tur a ni. Amaherawhchu, Winston Churchill-a chu a lungngai ve tlat lo. Mite’n a lungngaih leh lungngaih loh an zawh pawhin, ‘Ka buai thin em a, lungngai hman zia zang ka ni lo’ a ti.

Kan ram hruaitute hi Nehemia leh Winston Churchill-a te anga ram tana theihna zawng zawng hlantu, sawisawltute chhang let hman lo khawpa buai leh lungngai hman lo khawpa ram leh hnam tana inpumpek niin kan hria em le?