Dr Hrekima Titi

I FATEN HLIMPUI CHE RAWH SE

Dr. C. Lalhrekima - Mar 01, 2020

I FATEN HLIMPUI CHE RAWH SE

Kan u pakhat thil sawi hian ngaihtuah a tithui. “Tlaia ka haw hian ka fate hian, ‘Yes, a pa a lo haw,’ an ti a, hlim takin an lo tlan khawm thin a. Ka nupui haw hi chu, ‘A nu, eng nge min hawn?’ an ti a. Thil a hawn loh chuan an lungawi lo thin,” a ti.

\Nupaa chhuak thin an ni a. Tlaiah an haw ve ve thin. Pa ber haw chuan a fate a kuah a, a pawm a, a fiam a, nui hawr hawr khawpin a dêk a, an infiam thin a ni awm e. A nupui haw chuan hmeichhe hmangaihna dik takin fate lawmzawng hawn belh chu nuam a tih tlat avangin thil eng emaw a hawn ngei ngei a ni mai thei. An tlai haw naupangin an lo dawnsawn dan chu danglam ta. A pa chu ‘a lo haw’ avangin naupang an hlim a. A nu chu ‘a thil hawn avangin’ an hlim ta chauh angin a lang ta a nih chu! Kan fate kuah fo hi a tha. Ni tin vawi khat tal kuah thei ila, an la duh chhung chu! An la duh chhung chu tih tel a ngai tlat.

Naupang hi an kum leh mipa hmeichhia an nih azirin an rilru a danglam chho a. An tet laia tihdan reng kha a hman reng theih loh fo. Kan len hawna min lo pan a, min lo kuah cheng cheng thin an nih lai a awm a, kan leng haw pawh min lo ngaihsak tawh mang loh hun a awm dawn. Engtik rualah pawh engti kawng emaw tala hmangaihna leh ngaihsakna kan lantir ni tin a tha. Naupang kan kuah a, kan ngaihsak ni tin hian hmangaihna awmzia an hrethiam a, anmahniah thlamuanna a pe fo. Inngai, induh, inhmangaihte chu inkuah vawng vawng kan duh thin kha. Ka hnena lo kal naupang leh tleirawl mangangte hian duatna an dawng lo fo niin ka hmu thin. Vin leh hauh ringawt tâwk naupangte hi zuk awm a!!

Hmangaihna hian a zilh a ngai a, a fuih, a vuak, a hrem pawh a ngai ang. Mahse chung zawng zawng karah chuan duatna, ngaihsakna, an tana hun leh mahni inpek, infiampui leh hlimpui a tel ngei tur a ni. “Min hau reng,” tia ka bula vui ho hi an vuina a dik mai thei a, an sawi uar ve pawh a ni thei tho. Sawi uar zawk tur rau rauah, “Min duat lutuk,” tih lam an sawi uar zawk theihna tura enkawl hi a fuh zawk. Nu berin a fate thil a hawnsak hi a tisual reng reng lo.

Hmangaihna leh duatna tihlanna a ni. A hlu. Ni tin dana neih erawh fimkhur hret a tha. Keimahni aia thil hawn an duh zawk a hlauhawm thei. Kan fate hian kan thilpek leh tihsak bakah keimahni hi min ngai se, min duh se, min mamawh se, min hlimpui se a tha ber. I fate ni tin kuahin ngaihsak teh, infiampui la, hlimpui teh. Nangmah kha ngai che se la, hlimpui che rawh se. A fuh zek dawn a nia!

Share now