In zahnih thum tha awrh chauh kan ni a - zirna In pawh middle sikul thleng chiah kan nei. Kan khaw thenawm, ka khua atanga kea minute 45 tha vel kal bawrah chuan High Sikul ka zir a, A pass pawh ka pass chhuak ve nghe nghe.

Zirna sang zawk - College chhunzawm leh tur phei chuan kan khaw hnai vaiah College zirna in reng reng a awm lo. Chutia khawpui lama zirna sang zawk zir chhunzawm tur phei chuan keini ang kut hnathawk chhungkaw tan chuan a tina han tin chi rual pawh a ni lo e.

Zirtawpni : Chu kan khaw thenawm high school ka kal lai chuan ka tana 'Rohlu' ka chhar hlauh mai a, chu chu kan khuaa awm ve lo, an khaw Branch YMA Library chu a ni.

Buaithlak deuh pakhat awma chu - an khaw Library Zirtawpni tlai leh zan chauha an hawng thin hi a ni. Chhung leh khat, laina kan neih ka hre hran lo - Ka pawlpui thin ka thiante erawh chuan khawpui lamah lehkha mi zir chhunzawm sak deuh vek bawk si.

Thenawm mikhual an library-a lehkhabu hawh thintu mai ka ni e. A chang chuan tlai sikul ban ka ngak, an lo inkhawm hman thin a, an inhawn leh hun techaw ngheiin ka lo nghak thin.
    
Library Ngainat chhan

Hetia Library ka ngainat viau chhan hi pahnih a awm thei awm e. Pakhatna chu lehkhabu hi ka hmangaihna hmasa ber a ni a. A dawt leh chu hetia Matric pass nih ringawt hi ka induh khawp lo a - kan pi leh pute pawh - a tam mah zawk pawh an ni ta ve ang - private-a BA/MA an tam em em mai tiin lehkhabu chi hrang hrang - history bu, Literature, English, Algebra adt. -ah hian thiamna tak tak a awm tih ka ring pawh ni lo, ka hriat avanga zawk a ni tel bawk.
    
From Sudden to Sudden Muanga

Cyclostyle bu seipui mai - Sudden-a Cowboy bu (Sudden-a) ka tuipui lai atanga tawha lehkhabu chhiar nasa ka ni ve a - Zan hi ka mu tlem thin te a nia! Khatih laia thin tirim em em thintu chu, lehkhabu kawm leh a thawnthu hming lam lo tla tawh thin kha a ni! A thawnthu tawp dan tur kha chu 'a chhiartu thu thu' a ni tawh thin a - a suangtuah zui dan kha a dik ber a ni tawh mai thin!

Chutih rual chuan Billy the Kid, Wild Bill Hickock, Dusty Fogg te pawh kan chhiart pha ve vek tho a. Khawlai han leng chhuak ila, an revolver pai ang te khan kan inhre ve tlat zel nia.

Chutih rual chuan Laisaizawka 'Sudden Muanga' a rawn chhuak a, thu ril, fiam­thu kara a zeh hlu ka tih thin zia te kha!

Thirsakawrin

Tum khat chu sikul chawlh laia a ni a, ruah a sur duh phian mai a. Zirtawpni zan pawh chuan ruah chu a la han lo. Chumi zana khaw thenawm YMA Library-a lehkhabu kir (return) tur chu ka nei nual si a - Hawh duh pawh ka ngah. Zan thim hlimah pawh ruah chu a la bang duh chuang lo a. Kal loh chu ka tum bau lo.

Ruah sur hnuaiah Vengchhaka ka u, ka thianpa thirsakawr han hawh tumin ruah chu ka do chho a, Ani lah chu KTP hla zirnaah a lo tel daih chu niin. Ka nghak reng a ; an bang har mai si a! Biakin tukverh atangin Sanapui ka va bih. Khaw thenawm library an inkhar hun minute 20-in a la ri lo!

A rawn chhuak chu engmah dang sawi set set loin a thirsakawr chu ka va chhuh a. Ruahsur vanawn pawh pawisa lo chuan khaw thenawm pan chuan ka inkhalh nghal a. Kan khaw daiah chuan leimin tenau a lo la awm zui. Mahse, engtin tin emaw ka inkhalh chhuak thei hlauh.

Mithlaah Lehkhabu hlir

Ka mitthlaah thil dang a lang thei tawh lo - Lehkhabu hlir a lang. Ka lehkhabu kir turho mai bakah ka hawh hualte nen chuan an rawn inlar zut zut a. Zikpuii Pa 'Nunna Kawng Thuampui-ah' te, Siamkima 'Zalenna Ram' te, C. Thuampuia hnuhma tih lehkhabu kawm (Cover) ho mawlh chuan ka lung min len ngawih ngawih a ni mai lo - Ka thirsakawr pawh min khalh chaktir sawt ni pawhin ka hria.
    
Zawr vekin

Khaw thenawm ka va thleng chu ka va han zawr chiang em! Ka kekawrte thlengin maw le!

Library ka tlang thla nghal. Librarian Lalteii chuan lo khar a lo tum mek hi lo niin. Min hmu thut chu a phu deuh zuk a, mahse, min kiai zui leh sak a.

Chu ruahpui leh vanawn, khawpui ri dur dur karah chuan a va mawi si em! Vai film te pawh kan ang deuh e a!

Ka huh zawr vek chu hrukpuan - inhruk hulna tur awm hek suh - a tih ngaihna hre lo chuan Library parda chu a pawt thla lawk a, min inhruk hultir ta a nih kha!

Chutia min duhsaka min khawngaihtu Lalteii chu ka lo en reng tih ka hriat lo lai pawh chuan ka lo melh leh zawk thin a ni ngei ang - kan mit leh mit chu boruakah chuan a in 'Dhishh' leh siah siah thin, khawpui a la ri reng bawk si...

'Chawngmawii leh Hrangchhuana' tih te, 'Hmangaih Zoramthangi' tih te ai chuan Lalteii sam hun deuh fap te, a kawr hnawm ve deuh chhap te chuan ka mit a la ta fe zawk mai!

Library chhungah chuan kan pahnih te chuan kan ngawi reng a, ruah sur ban hun chu kan nghak duh ta a nih chu. A! Chutia ngawi duh reng pawh kan ni reng bik lo maithei! Tin, hlim tur hian thu tam sawi a lo ngai lo a - duh berte kianga awm hi chuan a lo tawk thei em em a lo ni.
    
Thenawm khaw mikhual

A tih ngaihna dang awm hek lo le - Lalteii chuan Library thlanga a Patea, parawl In-ah chuan min riahtir ta nghal a. A tuk, tukthuan ei khamah chuan an khaw dai thleng min thlah a, Thirsakawr chuan ka phur a.

Ruah sur bang tawh chuan khua a va ti mawi kher em! Khiang leh Hmawng upa tawh tak tih hriat hnuaiah chuan kan chawl a. Thlifim chuan a chalsam chu a chhem hlep hlep a. Kan ngawi leh reng a.

Lalteii chuan a thutna kianga lungte chu chharin chhak deuh a hnim hnah ho chu a vawm a vawm a.

Chutia kan ngawih reng deuh hnuah chuan a rawn ri hmasa ta! 'Ri hmasa' han tih lemah 'E hem' a rawn ti  mai a ni.

Mahse chu 'E hem' chu ka bengin 'E hem' a hriat tawh azawngah a la mawi chungchuang ber a - 'Rimawi' a tling pha!
"Nge?" ka ti a
"Zir, min duh nge min hmangaih ve zawk?"
"A! Ka hre lo le"
"A nih, khawnge i lehkhabu hawhho"

E khai! Kei hian lehkhabu reng reng ka lo hawh hleinem a! Ka Librarian hriat chian loh Lalteii chu duh a thlang zawkin ka hmangaih hmasa Lehkhabu chu ka lo bansan ta zawk a ni maw!?

Kan inthlah fel a, Kawi thum kawi li ka tlan leh a, kawng sirah ka ding a. Rengchal leh thereng dang lo hram te, thinglera lo hram te pawh chuan "Unaupa engatinge, i hmangaihna hmasa ber i bansan tak?" min ti ni hian ka hria a - ka tum bur mai!