Dr Hrekima Titi

I inkawm ang u

Dr. C. Lalhrekima - Jul 05, 2014

I inkawm ang u

Vawiin (6.7.2014) hi kohhran pakhat chuan ‘Health Sunday’ an ti a. An chawhnu inkhawmah ‘Rilru hriselna’ thupui an zir dawn a ni awm e. Chumi denchhen deuh reuh chuan rilru hriselna atana thil pawimawh tak kan titipui teh ang. Facebook te, whatsapp leh social network dang hmang hian a inkawm thui theih ta khawp mai. Hmun khata awm ang maiin engkim kan inhmu tawn thei a, Group-te siamin a huhote pawhin a titi theih! Mission Veng Badminton Club ho pawhin whatsapp group kan siam a, a nuam ve hranpa khawp mai. Mize inang lo pui pui, tui zawng inang lo tak takten thu thuhmun kan khelho vak tumte a awm a, mi titina kar laka thu dang daih rawn vawrh chhuakte an awm bawk. Hmanlaia pawl thum zirlai bua mi ni awm tak rawn chham ta zuah zuah an awm thul! A then Washington atangin an rawn tel a, Shillong LO a rawn pawr thei viau bawk. Kohhran upa te, Engineer te, PhD te, Central Service mi te, lukawlh deuh te, tattoo ngah tak te, zan lama zu in ve mai thin te, Cherhlun makpa rangkachak te, zirtirtu te, zirlai te, badminton-a lawmman la teuh tawh leh la la miah lo te, Under 15 a la khel pha leh 45 above a tel pha tawhte kan han titi khawm thin chu a ‘mixture’ hi a rapthlak thin a nia! Hlimawm tak a ni. Mahni awmna hmun theuh atangin rual duh kar hlaa leng leh thenawmpa hnaivaite pawh ngawi rengin kan inkawm a, inpawhna tha tak chu a ni ve tlat. Computer hmaa nilenga thu chung hian nula a rim theih a, thian a kawm theih a, hlimpui tham games a khelh theih a, movies tha tha a en theih. Nun chu hlim khat chuan a hlim ve. Nilengin pindan chhuahsan miah loin mi tam tak a kawm theih a, thil tam tak a tih theih. Mahse, hetiang ringawta inkawm leh mi dang hmu miah loa nun ngawt hian rilru hriselna tha a thlen tak tak thei lo! Hlimin mahnia khik vur vur chang pawh nei ve mah ila a tawk zo lo. Hmai chhana kan han inkawm a, kan han titi a, mita kan han inen a, tawng paha hmelin a ri lova thil tam tak a sawi lai han inhmuh ngei hi a tluk zo lo. Rilru hrisel tur chuan tu nen emawa inkungkaihna leh inlaichinna tha tak neih a ngai a nia. Mihringte hi a huhova cheng tur kan nih miau avangin inlaichinna tha leh dik, hlimawm hi kan rilru hian a mamawh. Thu khawm ve reng chungte pawh hian mahni sih sihin kan sik mial mial hlawm a, kan inbe mumal ta lo! Khawl hmang hian inkawmin inlaichinna thui tak siam theih mah se hmaichhana a taksa innek zawnga inkawm ngei hi rilru hrisel nan a tha bik. Eng emaw sawi dawn paha thiante han kawm zuk te hi a hrisel ve riau asin! Whatsapp-a thu nuihzatthlak deuh an rawn post tuma mittui tla sawka nui lai lem lo thawn let ngawt ai chuan, nuihho hawk hawk paha bula mite han sawi nawk nawkte hi a hrisel hranpa ve tlat! Fiamthu ngeiawma han inkahna thu inthawn chhanlet nana lungngai hmel leh thinrim hmel lem inthawn let ngawt ai chuan, dawhkan hnuaia intlawh sawk paha thinrim lo hmel tih hriat taka han inchum taih taihte hi a hrisel zawk! ‘I titha hle mai,’ tih nana kutzungpui pir lem inthawn ngawt ai chuan kut thinga inchibai ngei hian min pawt hnai zawk. Hmangaih leh duh entir nana thinlung lem sendang inthawn ngawt ai chuan mi hmuh loh lama kut zungtang insualtirte hian thinlung tak tak a pawh zawk! Phone kaltlanga dam leh dam loh thu inzawh hi a hlu. Chu ai chuan kawngka kik hawng ngeia inkan hi a hlu zual. Facebook-a status leh thlalak post in-like-sak ringawt ai chuan Biak In kawta kut thinga inchibai te hian inlaichinna a thlung nghet bik. Chhungkaw group a thu inziah chhawka titi hi hlimawm ve viau mah se, inlen pawh a, chhungkaw chaw eiho tluk a awm chuang lo. Ruai theh sawisel pawlin, ‘Mi dang tanpui nan hmang zawk ila, heti zat thawhte chuan chhungkuain hei aia tui kan ei thei,’ an tihte hi thudik mah ni se zing atanga han fatuho leh chaw dawh intlarho hlutna hi sawi nep chi a ni lo! Ral atanga ‘muah muah’ tih inthawn hian lung a tiphu ve det a nih pawhin, inchibai paha han inhmer selh leh inthen dawna biang han nawk zauh hian tiril a fan thuk zawk asin! Rilru hrisel i duh chuan i computer off la, i phone ak bo la, lo chhuak rawh. Mi inah leng la, dawr kawtah thu la, nula rim la, thingpui no dawm pahin hmai chhanah thenrual kawm teh. Mahni pindana nui put put lo khan lo chhuak la, infiam ila, khawtlang leh kohhranah telin i nuiho teh ang. I dawhkan atanga mi dang tanpuina sum thawh fel mai lo khan lo chhuak la, mi dang tanpui turin chem tum leh bawngtuthlawh huma hnatlang ve turin lo pen chhuak rawh. Ni sensa hnuaia hna thawhho bawrh bawrhte hian inlaichinna a siam tha a nia. Nangmaha a tha ber chhuak tur khan mi dang i mamawh a, mi dang pawhin an mamawh che. Ral atanga inkawm leh inngaihsak hi tha hle mah se, social network te hi hman tul chang awm mah se, a taka hmaichhana kan inkawm thin hi luahlan lul lo teh se. Hawh u, i inkawm tak tak teh ang u.
Share now