Lal Davida kha aw… a lo va’n fing tak! Kum 3000 chuang kaltaah khan a Sam-ah a ziak khiau mai—ropui taka dina duan a nihzia kha. Chu chu kan nihna a ni tih kan inpawm ngam lohna hi alâwm kan buaithlâkna ni zêla chu!

Kum tluklehdingâwn sang 4.543-a upa tawh he leiah hian ka lo piang ve a. Kum heti zozai khawvêl upat zâwng chhût chhuaktu chu mihring thluak tho asin! Mahse, ‘Ka thluak hian a chhût chhuak ve thei lo ang—Google mai ang,’ tia kan inngaihna tak hi kan saltânna a ni. He saltânna atanga kan chhuah nî hi a ni, min Dintu-in kan thluaka min pai teltîra chu. Chu mi hai chhuah hnâ erawh chu kan kutah a dah thung.

BTS emaw, Blankpink emaw ten an sam rawng an thlâk ruala thlâk ve ngawt hi kan hnâ ber tûr a ni lo. Danglam leh ropui, mi bîk ni tûra dina duan kan ni e. Kan danglamna leh kan ropui bîkna tûrin talent hran theuh pêk ka ni a; kan la inhai chhuak lo a nih chuan, a mawh kan phur ngam tûr ni—a chawh pawh kan chawh khawp maithei.

Pathian min pêk ka talent hi ka tâ a ni; tû tâ mah a ni lo. Chawi lâra vulh lian tûr pawh kei bawk. Ka tâ, ka neih chhun liau liau; min Duanga min Siamtu’n duhsak taka min present a ni. Ka talent—ka tâ hi a len zêl theih nân, ka duata ka enkawla ka châwm zui a ngai ve tlat.

Shawn Mendes leh Camila Cabello ngaisâng ngam china inti tûnlai kan ni ve a. Kan changkânna, finna, kan thiamnate hian, anmahni entawna nun chauh min hrinsak lo se… Ram ropui ze rim nam emaw, anni khing pha tûra kan nêpa kan nêu lohzia min hrilha min ti tangtuah hmang ve ngam tawh zâwk tawh ila…

Kan kutzia han inensak teh ang u. Mi bîk i nihzia mai chu maw—i chiang mai em? Nangmah ang rêng rêng siam ve lo thiamtu din i ni e—i va ropui êm! ‘Ka thei ve lo ang; ka tling ve si lo!’ ti ringawta nilêng apiangin tlin nî an hmu ngai lo. Theia tling ve tûra duan i ni asin. Pangchan châng apianga hruizên melh tai ringawt thin nulâ hi, a takah an tai ngai lo aw… Chhas-ten an break apianga bathroom ngaina êm êm ringawt hian amah Siamtu a hlat châwk! Bathroom atang khera amah Dintu a biak eih ka ring chiah lo!

Ngaihtuah chiah ila, a chhût ngam chuan chhût ila: khawvêl ka sawi lo, US emaw South Korea emaw ka huam lo ang—Mizo zîngah hian … ngawi teh … Aizâwlah hian … ngawi leh teh, i la sâwr zîm leh teh ang, kan vêngah hian—kei aia hmel chhia hi ka hre hnem ve êm! Ka chhe ber tawp bîk lo aw! Kei aia tling lo leh fel lo hi an tam ve êm! Ka tê ber tawp lo a nia. A nih leh, chhia ka inti viau a nih pawn, ‘Ka chhiat ang ang hian ka tha ve e…’ ti ngam tal ila!

Siamtu’n min din ruala min pêk, kan ta neih, kan talent hi ti pung tûra duan tel kan ni tho tih chhût ve thiam tûra siam kan ni a. Kan tâ, kan chanpual leh kan chanvo a ni a; hlut ila, ti pung ila, roh ila; kan talent—kan tâ hi a lian ber ni thei tûrin tan khawh ve tawh ila maw le… Mi tâ dawn kêp emaw, NLUP emaw SEDP emaw dawn lam a nih loh hi—kan chanpual ve rêng tûra Siamtu min pêk a nih hi.